لباس انلعوايل ورعان اتحفاظنت فلعوايذ نالجدود ذ العيذ أمقران

اذقميش لباس العيذ امقران وأدعدا ذي ثمورث انغ سالخير اذلهنا، وابذونت لعوايل انلوراس امقران اتراجنتاس ، بشام ادخلظ غرسنت إميرا كم ، خاطر ذيس لباس نلعوايذ اتقنهنت زيك اوزيكن ورفذنهنت فلجذوذ انغ، وسلعوايذاي احني إقخف نالعيذ، وأسسرذنت اقرزي أنس مليح وأسوشنت أذسو أمان بغير اذيروا قبل ما أسغرسنتن لعوايذاي اتقنهنت لعوايل انلوراس امقران بشام ربي ادسرس الخير اذلهنا ذي لبلاد سالعذاين وأس انقارو انعارفة ثتاويد ثمقرانت انوخام قل نالحني واتق أقفريك واترني أستق ثمحرمت تززاوث بشام أسقاس ذين ايلي ذأززاوس سالخير اذلهنا.
وبغير اذسمان سيسم انربي سبحان وأسغرسن امين إثنا الشريعث اذبذونت الخلاث أسرانت لمزامز انس أسومان وإرقازن أثتازين مليح مليحن وأمقران انوخام يسنعاث إثاروا انس مامك اذغرسن وأذازين العيذ بشام أذثعلمن مليح أذتحاوجنش، اومبعد أتاوي لال أنوخام الكبدة واتقلا سيس بشام أي اقلا حضرن الذبيحث اذتشن سيس، اومبعد أداوينت بغير أذكمل ثاغراست مليح امان يحمان بشام أذخذمنت بوزلوف وأثحرقنت وأثسعذلنت مليح، ولانت أيط انلعوايل أقميرا أتقنت بوزلوف أس أمزوارو وأيط أتفرنت ذلفرجيدار بغير أتعقب قلي نالسمانت خاطر لعباذ أنوخام ولان أعيان أثتشن أس امزواروا سيرتو ذلعوماي انقورا ماني إديرقا الشوا.
بصح ورعان لعوايل أتحافظنت فالجزرا بغير اس الثاني واتبذانت زيك نالتصبحيث بشام لال انخام أتق الكسكس سطابق، واتبذو ثتق السبوب إلفاميلت أنس ونهنين اتوعان السبوب ذين والشياي أتق لمحبث جار لهل ذالفاميلت.
ونخس انيني بلي صح لباس انلعوايل أقلا تحافظنت فلعوايذ نالجدود بصح ألانت لعوايل يط سيرتو أيا أقلا اتيلين ذي الباطيماث ولان سرفن إيخف نالعيذ البطوار بشام اذتواغرس وأدولا يوجذ خاطر يحشر الحال لباس، وإذامن ذين اتفيان أروقراث نالباطيماث.