برج الحمل اقعدت تحت النخلة قالولي دڤلة نور جات أدور اطلعت فوق النخلة وبالعسل رشيت الصور، معاه المعيشة تحلى، حبيبي الساكن في القصور. برج الثور جيت ساميت البحر شفت الحوت يعوم عرفت ما عندي زهر في ذا الحظ المحموم، كي غاب ضي القمر ما ردت ضي النجوم. برج الجوزاء شجرة ياسمين نايضة في وسط الغرفة عروقها سكنجبير وأغصانها قرفة، والله ما ننساك يا زينة الوقفة. برج السرطان غرست ياسمينة في وسط الدار عروقها سكنجبير وأطرافها نوار، يما يا يما محلى عشق الجار العين تخز في العين والقلب شاعلة فيه النار.
برج الأسد أصلك أصلك وما ينفع غير الصح، مولاة النية الصافية عليها ربي يفتح أطول ولا تقصر يجيها السعد و الربح. برج العذراء يا مولاة القلب الكبير ربي يعطيك ويوسع عليك، ما عندك لا ذهب ولا حرير وأنت دايما زاهية و ربي مسهلك، ما دريت من حيلة ندير باش نكون مثلك. برج الميزان التمر و الحليب في طبق وسط الخيمة نهديهم للحبيب باه يوالف ديمة، ما يعزش اللي في الجيب هذاك زوجي يا لميمة. برج العقرب يا لتفاح الجربى يا مكر بع محلاك، نهديك أنا لحبيبي و بيه نرفع اشناك كي حن عليا ربي أرافقو أنا وياك. برج القوس يا لالا يا لالا يا مولاة القلب القاسي حني على حبيبك يالي طيرتي مني نعاسي ملي شفتك، راني نتعذب عليك نعادي اماليا وڤاع احبابي وناسي. برج الجدي حكمت الطير بتكة الحرير وما ظنيته يطير من بعد ما والف خلى قفصي وعمر قفص الغير، واقعدت أنا في البحور نتمشى تالف لا سواري لا قلاع لا وجدت مقاذف، هذ الزمان يعطي ويخالف. برج الدلو علي يا علي يالي سومك غالي من صابك تجي لعندي نفرشلك مطرح حرير ونغطيك بيزاري. برج الحوت عيطت على سيد الملاح صبت الناس رقود، هزيت الدالية طاح منها عنقود النجوم، قالت النجوم نحكي وقال القمر نذوب اصبر، يا قلبي ياك كل شي مكتوب.
