وقد خاب من دسّاها!

شعبان في رمضان

بعتُ سلسة الذهب، أي زهدت في سعره، وعدت من "المرشي مغاشي" محمّلا بكيسين من الخضروات والفواكه واللحم بما يعادل 5 آلاف دينار، لأنه لم يكن عندنا في البيت ولا شيء "يهز اللحية" ثم أن اليوم هو أول يوم رمضان في بيتنا، أول يوم نصوم فيه في بيتنا.. أي نفطر فيه!
وقلت لهم وأنا "أنهت" وأنفخ: أوووف.. لو كان غير فطرنا عند خالك "النفيخة" ولا هذا النفيخ..أوووف، عييت، ولا في واحد يعاون! لو كان على بالي هكذا، كنت نسلف سيارة خالك الأعور، نخدم بها شوية ونصرف ونجي وإلا على عمك! عندو ثلاثة وغير "مقاريين" في القاراج، علاش ما يسلفناش وحدة ندمروا بها كاش بنيادم وإلا كاش خرفان في سبيل الله؟! ردت علي بنرفزة كأني أطلب منها هي أن تسلف لي دراهمها: خويا ما يزيدش يسلف لك السيارة نتاع 700 مليون باش تدير بها أنت كلانستان، راه حالف، رديتهالو مفشوشة من ثلاثة، تعرف شحال تدير الجرارة نتاع مرسيدس؟ قد الدراهم اللي خونوهم لك! ما طلقت حتى واحد؟ كان غير خالي، وليت تطمع حتى في عمي. قلت لها: واش فيها عمك؟ الله يعطيه العمى.. ما راهش يشفو فينا بلا سيارة وهو عند ثلاثة؟ قال لي: اشري إذا عندك الدراهم.. راهم كانوا عند وكلاهم بوبي! قلت لها وأنا اصرخ وأقلد أم كلثوم في أغنية "ماتفكرنيش" ما تفكرينيش.. ما خلاص! ماتزيديش تهدري على دراهمي.. دراهمي مشاو الله يسهّل! والذهب نتاعك من اليوم راه في أمانتي الدائمة! نشري بهم لوطو..صافا؟؟ ردت علي بتتويغة كالصاعقة: واااالو.. هذه والله تكون لك.. نردهم للبوط! قلت لها: من الآن فصادعا لا بوط ولا كبُّوط..أنا ندسّهم... نشري "الكُفر" والصندقة (زندقة).. وغير أنا وأنت اللي نكونوا عارفين الكود نتاع دراهم البوط! وهذا البوط وهذيك الديبارا اللي في البلكون يخصنا لهذا المزفوط نتاع الخراد، انتهت مهمة البوط، كبنك مركزي! قالت لي: لو ما كنت داسّتهم في البوط، لو كان راه أدّاهم ذاك المسخوط، كيما دا دراهمك من الصندوق، المبلّع عليه في الخزنة بعشرين مفتاح وزربوط! قلت لها: باين باقي لك شيء تفاتف داسّتهم في كانش وسادة وإلا في كانش كاس مهرّس أو تقاشير مقطع، أحلفي بللي هذا ما كنت داساته! قالت لي: أقسم بالله.. وأحلف لك يمينا أنه ماعدا دراهم أمي اللي راها داستهم عندي.. وما نقولش وين.. ما عندي حتى حاجة أخرى داستها عليك.. راني حلفت!"، فتحت فمي كفواهة بركان "جاوا" من الدهشة وقلت لها: عندك دراهم آخرين داسّتهم.. بلا الذهب؟ قالت لي: قلت لك مش نتاعي.. نتاع يما.. راني نقول لك.. دراهم يما راها داسّتهم على بابا.. عندي! (آآآبابا ينوفا!.. ما كانش امرأة ما تدس على راجلها!) قلت لها:.. وشكون يقول لي بأن الدراهم هذوا، هم دراهم أمك ومش دراهم راجلك الوالا.. اللي تسرقوا قبل ما يتسرقوا التوالا؟ أي سرقات داخلية متكررة موصوفة سابقا!؟ ردت بعنف: واش حاسب راني نخون فيك؟ واش فيك ما يتخون؟ راني نقول لك دراهم يمّا!
مسكتها من الجيافة، فلم أتمكن، لأنها بلا رقبة من فرط الشحم، وقلت في نفسي: أحسن أن أجيف عمري..على أن أحاول عبثا خنق هذا الهيبوبوطام!
فكّرت مليا قبل أن أحبس أنفاسي وأقول لها: والله إن لم تقولي الحقيقة وتخرجي الدراهم المدسوسين من مغارتهم، لأؤممنّ ذهبك ولأنقلنّه إلى البنك باسمي.. وديري ثلاثة واقرصي..! سأفضحك قدام الجيران وأخبر فلان وعلان بأنك مدة 20 سنة وأنت تنهبين جيوبي من أجل إنشاء بنك في البالكون و"كونت" في البوط! سكتت قليلا قبل أن تقول تحت أنفها: الدارهم، دارهمك!. بصح دراهمي كذلك.. فلوس الخياطة نتاعي حتى أنا! حتى أنا.. تعبت عليهم..! راهم وراء المرآة مدسوسين داخل الكادر.. من الداخل!