نتائج الانتخابات بعدما تابعنا في الأعداد السابقة من مغامرات لقرع بوكريشة كيف ترشّح هذا الأخير للانتخابات البلدية، ورأينا الخطاب الذي حضره وألقاه على سكان الدشرة من أجل إقناعهم بالتصويت لصالحه، أو عدم التصويت أصلا (لأن ذلك يخدمه)، ومع أن سكان الدشرة لم يتوجهوا إلى صناديق الاقتراع، إلا أن النتائج ظهرت في تلك الليلة، وبوكريشة نجح بامتياز متصدرا قائمة المرشحين بنسبة كبيرة تقدر بحوالي تسعين بالمائة من الأصوات، والمقدر عددهم كليا بعشرة أشخاص، و"السي بوكريشة" تحصل على تسعة منها، وباقي سكان الدشرة لم يصوتوا، نظرا لفقدانهم الثقة في ممثليهم، لكن بالرغم من امتناع أغلبية السكان عن التصويت، إلا أن الانتخابات تعتبر صحيحة، ونتائجها سليمة ( حسب قانون الدشرة ) . مباشرة بعد ظهور النتائج، خلال الفترة الليلية وبينما السكان نيام، إذ بالبراح يطوف في أرجاء الدشرة معلنا عن نجاح السي"لقرع بوكريشة" بالأغلبية الساحقة، وتوليه عرش البلدية، وكذلك ليعلمهم بالتجمع الذي سيعقده هذا الأخير صبيحة غد في ساحة البلدية. * البرّاح : يا ديوان الصالحين يا ديوان الصالحين يا ديوان الصالحين على ربي والوالدين يا أهل الدشرة صباح الخير نوضوا بركاكم مشّخير رمضان راهو جاب الخير افطنوا يا المومنين خلاصت الانتخابات ورانا فرزنا لبراوات وأغلبية الأصوات للسي بوكريشة كاملين تسعين بالمائة منها راه بوكريشة يطمنها وذيك العشرة عتبرها من فئة الخاينين السي لقرع مول الكرش رايح يطلع فوق العرش والي غدوة ما يحضرش ايسجلو مالغايبين كانت شيرة ولا شير حرمة ولا طفل صغير عجوزة ولا شيخ كبير الكل تكونوا حاضرين حتى لعمى راه مطلوب عقون أطرش أومعطوب تتلاقاو عند ( اللوب ) عند الساحة كاملين يا ديوان الصالحين يا ديوان الصالحين يا ديوان النايضين ايبلغوا الراقدين ... الديسكور : بعدما نجح"بوكريشة" في الانتخابات البلدية، وأمر"البراح" بجمع سكان الدشرة في ساحة البلدية، ها هم الناس يتوافدون على المكان من كل حدب وصوب، صغارا وكبارا، أطفالا ونساء، وحتى المعوقون والمرضى والرضع وغيرهم... وعندما امتلأت الساحة عن آخرها، دخل السي لقرع بوكريشة بالزي الرسمي كعادته وفراشة العنق، والجديد الوحيد الذي طرأ عليه، هو المحفظة التي يحملها في يده على عكس العادة، فاتجه نحو صخرة في ساحة البلدية، يحمل في يده مكبرا للصوت، وراح يخطب في أهل الدشرة قائلا: " آن دو " ، " آن دو " ، يا أهل الدشرة أقعدوا، باه نبدو " الديسكور " نتاع " لاكومين " يا سيدي . أولتها حبيت نشكركم، أو بالأحرى نشكر العشرة اللي صوتوا من مجموع أهل الدشرة، ونشكر البقية ألي ما صوّتوش كذلك، لأنهم سهلولي المهمة باه نفوز"فالعنتخابات"، وراني فرحان، ومن نهار ربحت"الزيزيام" ما فرحتش كيما ليوم يا سيدي. وحبيت نقوللكم بلي راكم الكل معروضين للحفلة الي برمجتها في ساحة البلدية، وراه"المير""الي كان قبلي خلّى شي فرنكات فالصندوق، امالا قلت نكملوهم ونصرفوهم فالاحتفال، باه كي تدخل الميزانية الجديدة نبداو صفحة جديدة. ثانيتها... ياو راني كلّفت المستشار نتاع الأمن باه يعطيني"الليستا" نتاع لجماعة الي صوتوا ببراوات فارغين، ورانا باشرنا في عملية البحث على"ليزومبرانت" والبصمات نتاع هاذ الجماعة الي راها تدير ف"البوليتيك" فالدشرة ...ياو راهم يديرولي"فالبارباقوند" يا سيدي. وكذلك المصيبة لكبيرة، راني حاب نعرف شكون هذا الواحد الي ما صوّتش عليّا من مجموع عشرة، يعني هذا راه حاب يديرلي"كوديطا" نتاع البلدية، ياو فاقوا... ياو بيك ولا بلا بيك قير الكرسي الي قابضو، وباش تمنعني نتا لازملك تبات ساهر وما ترقدش. ما عدا هاذ الخونة الي ذكرناهم، نشكر البقية الي وضعوا الثقة فيا، ونقوللهم ماكاله تستناو"الريكومبوس"، وأنا وعدت روحي باش ما نفرّقش بين ولاد الدشرة سواء صوتوا عليا والا ما صوتوش بالكل، وبالنسبة ليا الكل كيف كيف... أما الجماعة الي صوتوا ضدي هاذوك حاجة أخرى، وحسابي معاهم بعد المراسيم والمواسيم، واذا ما قبضتهمش فالعهدة اللولة راني نقبضهم " فالزوجيام موندا " .. و" سيدي سويت " . وبالنسبة للعادات والتقاليد نتاع البلدية، وأنا من الناس الي يحافظوا على الثرات، راني نوعدكم بالثرات، والثرات المادي وماشي الغير مادي والغير ملموس، أو الوعود الكاذبة، وراني نوعدكم قدام"الميكرو""، قير نصلحّلكم حوالكم. أولتها بالنسبة للاستماع للسكان، راني كلفت مستشار باه يسمعلكم ويستقبل الرسايل والمسايل نتاعكم، ونشا الله يكون حسن الاستقبال و راكم تلقاوه يستناكم فالمكتب نتاع الاستقبال نتاع البلدية ومش"فالكولوار" ولا عند الدروج. ثانيتها بالنسبة لأيام الاستقبال الخاصة بيا، راني عارف بلي الي كانوا قبلي كانوا يهربوا في أيام الاستقبال، ويقولولكم راهم في اجتماع مع رئيس الدايرة أو الولاية، ولهذا قررت"نروكروتي" موظفة باه تتكلف وتتكفل بالاجتماع فالدائرة، و أنا نتفرغ لمشاكل السكان. وثالثتها، حبيت نعلمكم بلي الي كانوا قبلي قابضينكم، ياو كانوا يتمسخروا بيكم، وعاطيينكم"لادراس كترونيك" غالطة، وفي عوض ما يعطوكم عنوان البلدية"بوان كوم"، ياو كانوا عاطيينكم عنوان ترونيك البلدية"نات كوم" ولهذا رسايلكم ومسايلكم كانت تروح"فالكورباي" ولهذا قررت نديرلكم " البوان كوم " يا سيدي . ومنا للفوق الي عندو رسالة أو مسالة أو مشكل ما لقاش واش ياكل، ولا حقروه وما لقاش على من يتكل، ولا طلبولوا الرشوة باه يوكّل، والا المعريف نتاع"طونطو" و"هانكل" ياو راني فايقلهم بالكل، ولهذا حطيت تحت تصرفكم"الميل ترونيك" نتاعي، ألا وهو:"مير بوكريشة عار وباز جمل بوان كوم " .... " Mirboukricha@gmail . com " وفالاخير نشكركم على صبركم ونتمنالكم رمضان سعيد مع قدوم رئيس البلدية الجديد، ونتلاقاو في اقرب المواعيد انشا الله والسلام عليكم ورحمة الله وبركاته أتفرقوا ... * يوميات " بوكريشة " من خلال الخطابات التي يلقيها بوكريشة على سكان الدشرة نجد بأنه رجل نزيه في ممارسة مهامه، لكن نزاهته على عرش البلدية لم تمنعه من أن يكون بشرا مثل بقية السكان، ويرتكب بعض الحماقات والمخالفات والأخطاء التي لم يعصم منها أحد، وبما أن المنصب لا يسمح له بارتكاب الهفوات أمام منتخبيه، فنجده يفرغ شحنته في البيت مع زوجته أو في داخل البلدية مع العمال، وبعدما رأينا كيف كان بوكريشة يحضر لشهر رمضان سياسيا من وراء المكاتب والميكروفون، سنلقي من خلال هذا الركن نظرة على طريقة تعامله بعيدا عن الأضواء. التحضير لرمضان : يعود بوكريشة الى المنزل بعد يوم كامل من الغياب، وخلفه جميع عمال البلدية يحملون علبا من الكرتون وأكياسا مملوءة على آخرها ومحكمة الإغلاق، فاحتارت كرّوشة زوجته من تصرفه وأرادت معرفة ما بداخل العلب والأكياس. كرّوشة : واش آ " بوكريشة " ؟ واش هاذ " الساشيات " و" الكراطين " ، واقيلا رانا راحلين؟ بوكريشة : وعلاه؟؟؟ الي يرحل يخرّج القش ولا يدخّلو؟ كرّوشة : امالا راك رايح تنقل المكتب نتاع البلدية لعندنا للدار وتعود تستقبل الناس هنا؟ بوكريشة : ونديرك أنت " السوكريتير " ، ياك؟ ... كرّوشة : وعلاش لالا؟ واش خصني باش نكون " سكريتير " نتاع " المير " ؟ بوكريشة : ياو يخصك كلش ... كرّوشة : علاش ياك انا قاريا وعندي " الديبلوم " ؟ .. بوكريشة : ما يكفيش .. كرّوشة : وأنت علاش عندك مستوى سنة السابعة وراك حاكم بلدية بكمالها؟ بوكريشة : ماشي كيف كيف .. ياو ماشي الفايدة ف" الديبلوم " ، ياو " السوكريتير " لازملها تشد" السوكري ديطا " نتاع البلدية . كرّوشة : وعلاه انا ما نشدش السر؟ بوكريشة : تشديه ... ياو كي تشدي لسانك وولادك وتبعديني، ديك الساعة تشدي " السوكري " . كرّوشة : صحا .. واش كاين في هاذ " الساشيات " و" الكراطن " ؟ بوكريشة : هاذا الي فضل من " البيجي " نتاع العام الي فات، خلاّه " المير " الي كان قبلي، امالا فكرت نجيبو للدار خيرما يفسد خسارة . كرّوشة : ياوخدي .. وتخلي الناس للجوع وأحنا على بيبان رمضان؟ بوكريشة : ولاه رمضان لواش معمول؟ ... ياك للجوع أو العطش، باه ربي يجرب الصبر نتاع عبادو . كرّوشة : بصح كي يأذن الشيخ لازم ياكلو . بوكريشة : عليها أنا جبت السلعة نتاع البلدية للدار، باش الناس ما يبذروش، ويتعلموا يصوموا الصيام نتاع الصح . كرّوشة : واحنا تانيت واقيلا ماناكلوش؟ بوكريشة : آواه ماشي كيف كيف ... وأنت وين شفتي رئيس بلدية ما ياكلش؟ نوضي نوضي قلّيلنا هاذيك النعجة الي راها ف" الساشي " ، وما تديريلهاش الملح . كرّوشة : كيفاش ما نديرلهاش الملح؟ بوكريشة : ماتديريهاش " صالي " . كروشة : ونديرها حلوّة؟ بوكريشة : ها ياك نتيا " سوكريتير " ؟ ... يعني ديريها " سوكري " . كرّوشة : آه " سوكري ديطا " ؟ . بوكريشة :" نو " " نو " ... هذا يقولولوا " سوكري مرميطا " . بوكريشة " بوان كوم " نعلم سكان الدشرة، أنو كل من عندو مشكلة وإلا حقروه، أو مارسوا عليه الضغط والا البيروقراطية أو كلاولوا حقو، وكل واحد شاف حاجة معوجة، والا منكر فالطريق، أو طلبولوا رشوة ولا قهوة ولا محسوبية، يتصل بيا"فالبوانكوم" نتاعي، الي راه مدّون عند الباب نتاع البلدية، وتلقاوه كذلك في جريدة الشروق، والي هو :" مير بوكريشة عار وباز جمل بان كوم " ، وراني فانتظار الرسايل والمسايل نتاعكم . " MIRBOUKRICHA@GMAIL . COM " الرسايل والمسايل : * السلام عليكم، يا السي بوكريشة، أنا أمال من العاصمة، أحنا ما عندناش سكنة، ودرنا الطلب تاع الاجتماعي بصح ما ردولناش هاذو كثر من عشر سنين، ودرنا حتى التساهمي بصح والو واش نعملوا . الرد : وعليكم السلام، يا بنتي هي فالحقيقة هاذ السكنة راهي مشكلة الناس الكل، وأنت صرالك كيف ذاك الي كان يمشي صاب بقراج يعني (براد) في لرض، ضربو برجلوا خرجلو هذاك نتاع شبيك لبيك أطلب كلشي بين ايديك، الراجل فرح وقالو أعطيني سكنة، قالو: لو كان جات عندي سكنة مارانيش داخل بقراج؟؟ هكذاك أنا، ياو قير على جال السكنة رشحت روحي (للفوط)، ولكن ندبّر عليك... السكنة الي راها كاينة دروك هي نتاع محاربة الفوضى والسكن الهش، امالا قير أبني"برّاكة" فوضاوي"فالسونطرفيل" باش نرحلوك، خاطر هاذ الساعة رانا لاتيين بال"بوليتيك" نتاع"ليستتيك " و" التوريستيك " . * يا السي بوكريشة أنا عندي خمس ذراريي وحبسّوني من الخدمة، وراني في حالة ما يتصورهاش لعقل، واش تقدر تديرلنا؟ . الرد : أنا عقلي يتصور كل شي، وكل شي ممكن في دشرتنا، وكيما حبسوك من الخدمة الله يحبسّلهم قلبهم نشا الله"وأحنا على ابواب رمضان"، ياو حاسبين ساهل الي يقطع الخبزة نتاع الواحد، ندبّر عليك كثر من الدعاء عند الفطور، بصح كي تشوف الشربة تنسى الدعوة، أما بالنسبة للحل ندبر عليك رشح روحك للعنتخابات البلدية . * السلام عليكم، أنا راني حاب نروح حراقة، عييت من هاذ لمعيشة، شوفلنا كاش ما عندك معارف يالسي بوكريشة . الرد : ولاه؟؟؟ حتى"الحراقة" عادت بالمعريفة؟، ياو راني خايف يعودوا يشرطوا الباك باه"تحرق"، يا ابني أنا عندي معريفة باه تروح فالطيارة بالفيزا، أما الحراقة هاذي والله ما عندي معريفة، كاش ما يبان راني نقولك، وشنو هي ندبر عليك قير اقعد وين راك، لأنو الي فبلادو مادارش ساس، ياو محال يديرو فبلاد الناس ... * السلام عليكم ما رأيك في فتاة جزائرية تحب شخصا مصريا عبر النت وهو كذلك؟ وشكرا . الرد : الحب اذا كان نظيف"وسيريو"، مافيها والو، وبالنسبة للمصري أنا نظن أنو عبد كيفو كيف لخرين، بصح اذا كان يحبك تاع بصح، ماشي قير فال"بان كوم"، ياو الحب"فيكسيو" ماشي"كونيكسيو"، ما عليه قير يجيب والديه ويجي للدشرة يخطب، وش الي هو... برك ما يجيش يامات"الماتش". مسابقة ناس الدشرة كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله. نكت البيت المؤمن واحد الراجل استأجر دار، من بعد يامات كي سكنها سمع السقف يعمل صوت وكأنو راح يطيح، اتصل بمول الدار وخبرو بالمشكلة وطلب منو يرقع السقف، مول الدار قالو ما تخافش السقف راه يسبح، الكراي قالو بصح راني خايف يجيه الخشوع ويسجد. عادل بوشكيوة من تبسة الأغنياء الثلاث ثلاثة أغنياء أرادوا التبرع بأموالهم للفقراء وكان ثالثهم بخيلا جدا. فقال الاول: سوف أرسم دائرة وأرمي نقودي فالتي تقع داخلها لي والتي تقع خارجها للفقراء. وقال الثاني: أنا أرسم خطا وأرمي فما وقع على اليمين لي وعلى اليسار للفقراء. أما الثالث: أرمي نقودي في السماء التي تسقط لي والتي تبقى في الهواء للفقراء . د . كانون الطبيب والمريض المريض : شربت الدواء أمس ثلث مرات يا دكتور، وما دارلي والو ... الطبيب كيفاش تشربو ثلث مرات؟ ياك قلتلك تشرب كاس واحد برك كي تصحى من النوم؟ المريض : أو واش ندير اذا صحيت ثلث مرات؟ . د . كانون لمقانن قالك واحد السيد واحد النهار اشترى 02 مقانن (طائر الحسون) وحطهم في لقفص، واحد بدا يغني والثاني قعد غير ساكت، السيد راح رجع للبائع قالو"علاش واحد يغني ولاخر ديما ساكت"، قالو البائع:"على خاطر واحد مطرب والثاني ملحن". د . كانون الفضول قالك واحد النهار واحد السيد قاعد غير يدور، جا ليه صاحبو قالو واش بيك من الصبح وأنا نشوف فيك غير دور، رد عليه السيد وقالو : راني حاب نشوف ظهري . د . كانون المعاكس واحد ماشي ورا واحدة حب يعاكسها قاللها، واش هاذ الشابة موراها شغل، قالتلو لا لا موراها بغل .
