مغامرات " لڤرع بوكريشة "

ديوان الصالحين

هلال رمضان
بعدما تابعنا في الأعداد السابقة من مغامرات "لڤرع بوكريشة" كيف تعامل هذا الاخير مع منصبه الجديد على رأس البلدية، في هذا العدد يوافق "السي بوكريشة" أول أيام شهر رمضان الكريم، ولم ينسه كعادته وحضّر له خطابا على طريقته الخاصة وسيلقيه على سكان الدشرة بعدما أمر " البراح " بجمعهم في ساحة البلدية كما جرت العادة .
*
البرّاح :
يا ديوان الصالحين يا ديوان الصالحين
يا ديوان الصالحين على ربي والوالدين
واحد الغاشي في لسواق أو لمليحة للفواق
والي لتحت عمرو ذاق لا بنة لا فيطامين
في رمضان ذاك الغاشي واحد يجري واحد ماشي
واحد طايح لرض معاشي واحد عينيه خارجين
هذا لحق الزوج " يلاشي " تقول خصاتو حبة " كاشي "
كي النحلة العورة ف " المارشي " ما طلق الناس كاملين
كي يكمّل قاع الغاشي يروح للدار يزيد " يشارشي "
منا " ساشي " منا " ساشي " والله ماكم سالكين
هذا لحم هذا " فيونداشي " هذا فلفل حر أو طرشي
زيد الزلابية والمحشي و " تشين تشين " " جريم كين "
كي يأذن الشيخ يعشي ما فرا " درواتي " لا " قوشي "
ياكل حتى يعشي يمشي يا برحمة الوالدين
يقوللهم حطولي فراشي راها توجع فيا كرشي
في نهار صرالي هاذ الشي ومازالو تسعة وعشرين
يا ديوان الصالحين يا ديوان الصالحين
يا ديوان الصالحين على ربي والوالدين
الديسكور :
بعدما انتهى "البراح" من عملية جمع السكان في ساحة البلدية، خرج "السي بوكريشة" كعادته، بزيه الرسمي أو بالأحرى (الموسمي)، والفراشة في عنقه كالعادة، ويحمل في يده مكبر الصوت، وراح يخطب في أهل الدشرة قائلا:" آن دو " ، " آن دو " ، يا أهل الدشرة أقعدوا، باه نبدو " الديسكور " نتاع " لاكومين " يا سيدي .
بما أننا في شهر الصيام، شهر التوبة والغفران، شهر الصلاة والقرآن، شهر العبادة والذكر والدعاء، الي للأسف عندنا أصبح شهر الدواس أو "ليبروبلام"، " لاكومبرومو" والازدحام، شهر الشربة والعصبان، شهر الباراكة والبوراك، شهر كرشي كرشي، شهر أرقد حتى تعشي مغاشي، وتنوض عالطناش تخرج تمشي، كاشما "تشارشي" للغاشي، من بعد تروح "للمارشي"، وتطيح عليها بطاطا والطرشي، الجاج (والفيونداشي)، وكلما تعمر ساشي تزيد ساشي، حتى ما تقدرش تمشي، وترجع للدار كاشما تزيد "تشارشي"، حتى يأذن، ولما يأذن تاكل كل شي "اطاشي"، من بعد تقول وجعتني كرشي، بعد ذلك تخرج تمشي، تدير " دومين " سابع راشي، وكي تكمل توّلي للدار تضرب الزلابية والمحشي، من بعد تروح " تكوشي " حتى لغدوة منداك تعمل نفس الشي .
ولهذا قررت باه نبدللكم " الريجيم " نتاع " الجورني " نتاع رمضان .
وراني عارف واش كان صاير فالدشرة خلال شهر رمضان الي فات، وكنت نمشي ونشوف "لاباڤار" ف"الطرولي" وفي "لاقار"،ولهذا قررت باه نعمل قانون، الي يشوف في خوه "طرافار" و إلا يشنف عليك برك، نبيّتو فالحبس نتاع البلدية ونصوّمو 48 ساعة.
وبالنسبة للزيادة فالأسعار،راني نشوف كيفاه كل شي راه يقلى في هاذ ليام، والسبب أنهم الكثير من التجار، كي يلحق رمضان يولوا فجار يا سيدي.. ويتلاعبوا بالأسعار، سواء بقال ولا خضار، لما يشوفوا الناس تشري بالقنطار، آمالا يشعلوا النار، ولهذا قررت باه ندير قانون، الّي نشوفو رافد أكثر من خمسة كيلو تروح "زيزي"، الي يشري بالزيادة تروح "زيزي"، الي يشري فوق خمس خبزات تروح"زيزي"، وهذاك "الزيزي".. نعتابروه صدقة للمحتاجين كنفقة، ونطبخوا بيه المرقة للناس الي مطايشة فالزنقة، سبحان الله.. واش هاذ اللهفة الي راها طايحة عليكم؟
وبالنسبة للفجار الي يزيدوا فالأسعار، راني قررت نخلّيهم يزيدوا .. من بعد هاذيك الزيادة تروح " زيزي " ، ونشروا بيها لحوايج للذر نهار العيد، "بوان آ لا لين " .
ثالثتها.. راني عارف بلي كاين عيباد كانوا ياكلوا في رمضان بالتخبية، ولهذا راني درت قانون.. والله الي نقبضو هاذ العام ياكل في رمضان قير نديرو "دودان"، نديرو "باساج كلوتي"، ولا نربطو في ساحة البلدية ونصوّمو ستين يوم.
و حاجة أخرى.. راني نطاوع في لجوامع راهم فارغين، وما نهدروش على لفجر الي عاد الامام يلقى روحو قير مع المؤذن، ولهذا قررت باه نديرلكم "لبوانطاج" فالجامع في الصلاوات الخمس وبالنسبة لصلاة المغرب، راني تفاهمت مع المؤذن واعطيتلو "ستريكسيو" لوكان يلقى قير واحد يخص فالجامع عند المغرب، ما يأذنش .. . " روبورتي " لقدوة، ونخليكم بلا فطور " بوكريشا فا "
أما "الموفيسا" لكبيرة راها فالسهرة، ياو كنت نشوفكم ملمومين على "الكارطا والدومين"، ولا فالقهوي تاكلوا فالكوكاو، ولهذا قررت نبقى نعس، باش الي ما "يبوانتيش" فالطراويح، وما يصليهاش واقف حتى يفظ الامام، قير نحكم عليه بالاعدام،، ونخرّج عليه جفنة طعام، سبحان الله.. ربي عطالكم حداش نشهر ليكم وشهر واحد ليه ما قدرتولوش، ولهذا قررت نعلنها دشرة إسلامية خلال شهر رمضان، ونبدّل القانون.. والي يسرق نقطعلو يدّو، الي يشرب الشراب نجلدو، الي يغش نوخدّو، والي ما يصليش نبعدو على الدشرة والله لا يردو.
ومادام شهر رمضان هو شهر القرآن راني قررت ندير قانون، الكل تقراو وتختموا المصحف الشريف في شهر رمضان، ونفوت عليكم فالسوق ونقبض واحد فيكم "سوربريز" ونلقاه ماشي حافظ القرآن قير نديرو فالحبس نتاع البلدية، ونطلقو نهار العيد نتاع "لاقراس" هاذيك، والكل تحاسبوني بزوج أحزاب فالنهار، باش كي يخلاص رمضان تختموا ستين حزب، ومادابيكم ستين حزب برك، ما كا الله هاذوك الأحزاب نتاع " البوليتيك " هاذوك .
وفيما يخص النسا الي راهم لاتيين بالمسلسلات، راني قطعت وعد بلي الي نشم "المرميطا" نتاعها تحرقت في هذا رمضان قير نطلقها من راجلها، ونردها لدار باباها يعاودلها "السطاج براتيك" نتاع "فام أو فوايي".
وفيما يخص الثقافة، راني قررت في عوط ما نجيب "ماجدة رومي"، ها نجيبلكم الديك الرومي، وفي عوط "جورج وسوف"، راح نجيبلكم كبش واد سوف، وقررت كذلك نجيبلكم اللحم نتاع "جانيتو" مالهند، لأنو اللحم نتاع السودان قالك فيه الديدان، لأنو يشرب من الويدان الي غرق فيهم فرعون وجماعتو، ولهذا كرهتوا ولا حبيتوا، كليتوا ولا لآه لا كليتوا، راح نجيب اللحم نتاع " جانيتو " .
و فالاخير حبيت نعلمكم، بلي الي كانو قبلي قابضينكم، كانوا يتمسخروا بيكم، وكانوا عاطيينكم "لادريسا" غالطة، وفي عوض ما يعطوكم عنوان كتروني نتاع البلدية "بوان كوم"، ها كانوا عاطيينكم البلدية "نات كوم"، ولهذا البراوات والشكاوات دياولكم كانوا يروحوا "فالكورباي"، ولهذا قررت نديرلكم "البوان كوم" يا سيدي.. . وجميع من عندو اقتراح شكوة مشكلة سياسية سياحية اجتماعية ثقافية اقتصادية يراسلني فل"بوان كوم" وبربي نشا الله نوعدكم بلي براواتكم ما تروحش "فالكماين" نتاع "البوبال"، وانما تروح ف"الميل" نتاعي، والي هو: أكتبوا عندكم " ميربوكريشة عار وباز جمل بان كوم " .
" MIRBOUKRICHA@GMAIL . COM "
وفي الاخير نتمنالكم رمضان سعيد، وعمر مديد، والمزيد من الوعد والوعيد مع قدوم رئيس البلدية الجديد، والسلام عليكم ونتلاقو في أقرب المواعيد .
يوميات " بوكريشة "
" لومبارڤو "
دخل بوكريشة الى البيت بعد يوم شاق ومتعب، مما جاء فيه من "بوليتيك" وخطابات وزيارات تفقدية، زيادة على ذلك صيام أول أيام رمضان، وعندما دخل الى البيت توجه نحو زوجته في المطبخ فوجدها تحضر الفطور.
بوكريشة : السلام عليكم يا رئيسة البلدية نتاع الدار .
كروشة : وعليكم السلام، أنا على الأقل صوّتو عليا ولادي بنزاهة وديمقراطية .
بوكريشة : واش راكي تمعني؟ يعني أنا صوتوا عليا " بالطرافيك " ؟
كروشة : أنت ما صوتوش عليك أصلا .
بوكريشة : أمك هي الي عينتني على رأس البلدية، لوكان ماشي الشعب والأغلبية .
كروشة : واش من أغلبية؟ ياك ناس الدشرة الكل ما صوّتوش، وأنا وحدة منهم .
بوكريشة : ما صوتيش؟ واقيلا حطيتي بريا فارغة؟
كروشة : لا لا .. أنا صوتت على " السي مقران " خويا، قاري وعندو الخبرة والثقافة .
بوكريشة : أنا ماعنديش الخبرة والثقافة؟ أنا عندي الخبزة والقفة أنا .. ، امالا روحي قولي للسي مقران خوك يجيبلك القفة، هاذ الشي انتي هي الواحد فالعشرة الي صوّتي ضدي؟
كروشة : ايه أنا، على خاطر نعرف خرايبك، ونعرف وين راح توصّل الناس بفكايرك .
بوكريشة : امالا السي مقران خوك، منا للفوق هو ولي أمرك، ويعود هو يوّكلك بالثقافة والخبرة نتاعو .
كروشة : حتى أنا ما تكلتش عليك، راني رحت قضيت وعمرت القفة .
بوكريشة : ومنين لك الدراهم باه تقضي؟
كروشة : " خويا مقران " أعطاني مصروف كي صوّتت عليه .
بوكريشة : هاه .. الرشوة؟ تصوتي عليه بالدراهم؟ وتوكليني الدراهم نتاع لحرام في داري؟
كروشة : ايه الرشوة .. وأنت وين راحوا الدراهم نتاع الحملة الانتخابية؟
بوكريشة: انا لصقت بيهم التصاوير فالطرق، وعملت بيهم الدعاية والإشعار، وخلصت البرّاح، و"الطرنسبور" نتاع الذر نتاع "الكولوني" ونتاع المسايد ونتاع "السبور" وما الى ذلك من "درابوات" و "بوستير" و"كاسكروطات" "وفيميجيل" .. "سيدي سويت"..
كروشة : ايه، ياك رانا فالديمقراطية، ومن حقي نصوّت على من نحب، وهاذوا هوما حقوق المرأة الي كنت تتكلم عليهم .
بوكريشة : أنا تكلمت على حقوق المرأة أنا .. ؟
كروشة : فالخطاب نتاعك نسيت؟
بوكريشة : أنا ما قلتش حقوق المرأة، أنا قلت عقوق المرأة .
كروشة : ايه أنت " الحاء " تقولو " عين " ، لكن قصدك كان حقوق المرأة .
بوكريشة : يعني جاتني صعيبة باه نقول " حقوق المرأة " ؟ ياو انا قلت " عقوق المرأة " وراني عارف واش نقصد، " وفوالا " " لابروف " ، ها زوجتي عادت تصّوت ضدي وتديرلي " فلومبارڤو " مع الرجالا .
كروشة : هاذا خويا، وماشي غريب، وهوالي يستحق باش يكون رئيس بلدية .
بوكريشة: ياو أنت حاسبة ساهل باه تولي رئيس بلدية، ماكيش عارفة بلي راه منصب في غاية الخطورة.. ماكيش عارفة بلي الشعب نهار يزعف ما يلقى قدامو قير المير؟ ماكيش عارفة بلي عطاوني المنصب وأعطاوني الدراهم، بصح ما عطاونيش الصلاحيات، ياو راهي استقلال بلا حرية.
كروشة : ايه واش اداك ترشح روحك؟
بوكريشة: باش نصلح البنية التحتية نتاع "الريجيم"، ماكيش عارفة بلي الصندوق نتاع الطماطيش يبدا يخماج ملتحت؟ اذا نضفناه ملتحت وعرفنا شكون نعينوا على رأس البلدية، ها ماتكونش العدوة، والصندوق ما يخمجش، والطماطيش الي راها ملتحت هي الي تصلح وتراقب الي راها ملفوق، والشعب كي يشري الطماطيش، ها الخضار يبيعلو ملتحت حاسبها فاسدة، ومنين تطلع حبة صالحة راها تغذي مولاها وتنفعو، وان شاء الله هاذ الحبة تكون أنا .
كروشة : امالا شوف يا السي طماطيشا، أنا نروح نطيب لعشا ونخليك تفكر كيفاه تخرج من الصندوق الي راك فيه .
بوكريشة : راح نخرج من الصندوق، باه ندخل فصندوق شويا لفوق .
كروشة : وين تطلع؟
بوكريشة : رئيس دوايرة، من بعد نزيد نشوف .
كروشة : رئيس دايرة؟ ومن بعد وين تزيد تطلع؟
بوكريشة : رئيس مزلش الولاية .
كروشة : أو من بعد؟
بوكريشة : رئيس مزلش الشعب والعمة .
كروشة : أو من بعد وين تزيد تطلع؟
بوكريشة : رئيس مزلش الوزراء .
كروشة : ايه يا سيدي، أو من بعد وين تزيد تطلع؟
بوكريشة : هانا لحقنا ليها .. واقيلا راكي حابة تطلعيني للحبس؟ هايا روحي شوفي عشاك وبركاك " مالبوليتيك " .
بوكريشة " بوان كوم "
نعلم سكان الدشرة وقراء الشروق كذلك، أنو كل من عندو مشكلة وإلا حقروه، أو مارسوا عليه الضغط ولا البيروقراطية أو كلاولوا حقو، و كل واحد شاف حاجة معوجة، والا منكر فالطريق، أو طلبوا له رشوة ولا قهوة ولا محسوبية، يتصل بيا "فالبوانكوم" نتاعي، الي راه مدّون عند الباب نتاع البلدية، وتلقاوه كذلك في جريدة الشروق ملتحت، والي هو : " مير بوكريشة عار وباز جمل بان كوم " ، وراني فانتظار الرسايل والمسايل نتاعكم .
" MIRBOUKRICHA@GMAIL . COM "
الرسايل والمسايل :
* السلام عليكم يا السي بوكريشة، أنا عبد الرحمان من البليدة متحصل على شهادة ليسانس، وراني نحضر " فالماجيستير " بصح ما لقيتش خدمة، كاش ما تدبرلنا خدمة فالبلدية تاعك .
الرد : يا بني فالحقيقة ما عندناش مناصب يحتاجو هاذ المستوى، وأنت راك رحت بعيد بزاف بالقرايا نتاعك، ياو أحنا هاذ الساعة رانا محتاجين من " الزيزيام " للتحت كاش ما تقدر تدبر " سرتيفيكا " .
* مرحبة بيك يا السي بوكريشة ومبروك عليك المقعد السياسي، حبيت نعرف السياسة تاعك فيما يخص غلاء المعيشة وارتفاع الاسعار واش راح تعمل؟
الرد: المشكل راه فينا ماراهش فالتجار، وعندهم الحق يزيدوا لما يشوفوا الناس تشري بالقنطار وطايحة عليها اللهفة، ويخبيو السلعة فالفريجيدار وكأنها رايحة تنقرض، سبحان الله أنا فالحرب نتاع ربعة وخمسين ما خبيتش البادنجال "فالكونجيلاتور".
*
مسابقة ناس الدشرة
كرة القدم
قالك زوج محششين يشوفوا فمقابلة كرة قدم من بعد المعلق حفيظ دراجي قال، " تماس لصالح كاكا " ، لوخر قالوا، والله حتى لليوم باه عرفت بلي كاكا وسمو صالح . ياسر سرير عبد الله بومدفع
الطبيب النفساني
دخل مريض الى عيادة الطبيب النفساني وقال له .. يا دكتور أنا مصاب بداء النسيان فبمادا تنصحني ! فرد الطبيب .. أنصحك أن تدفع ثمن الفحص مسبقا .
منى . م
الكاتش
عجوزة سألت صحبتها : شفتي " الماتش " نتاع " الكاتش " ؟، قالتلها : يوه لوكان ما طفيتش التلفزيون كانوا يتقاتلوا . أمير من العاصمة .
الشرطة
واحد حابس اتصل بالشرطة وقاللهم : واش نتوما لوكان ما نديروا والو ما تسقسوش؟ . رياض . ب
العين الخضرا
واحد حابس قال لصاحبو عيني راهي حمرا واش ندير، قالو كي تولي خضرا أمشي . سامية من الأغواط .