يا بابا

هي كلمة خفيفة على اللسان ثقيلة في الميزان ، يقولها الرجال والنسوان والأطفال والصبيان، في كل مكان وزمان وفي معظم الأحيان، تكون أول ما ينطق به اللسان، كتقدير وعرفان لمن كان سببا في أن نكون إنسان، أو تكون آخر ما يقوله اللسان كندم وغفران وتأسف عن العصيان، ليسهل عليه بعد ذلك لفظ الشهادتان، كلمة تشعر قائلها بالأمان والإطمئنان، وتشعر سامعها بالحنان والنسيان، نسيان التعب والعمل والشقاء والحرمان، والتألم والتضحية والبلاء بشتى الألوان، يا بابا هي عنوان مكتوب على جبين ابن تائه في غربة الأوطان، يسأل الناس ويقول يا إخوان أين الطريق المؤدي إلى شارع يدعى جنة الرضوان....
يا بابا كلمة لا توجد كلمة تحل محلها، كثر الطلب حولها، من الناس بمختلف أشكالها، فمنهم من لاقوة ولا حول لها، يتامى حرموا من قولها، وعاشوا من دونها يبكون شوقا لها، وآخرون وجدوها أمامهم لكن لم يوفوها حقها، فمنهم من عقها ..ومنهم من بصقها.. ومنهم من رشقها.. بحجر أو صفعها أو ألحقها بدار المسنين و فارقها، أو طردها إلى الشوارع من أجل زوجة عشقها أبوه أقلقها فوجد نفسه بين كلمة يابابا وزوجته .. ، واختار في الأخير زوجته وما استطاع أن يطلقها، يا بابا كلمة خلقها ربنا لتكون حجة على العباد يوم توفي كل نفس مستحقها.
يا بابا
هاذ الدنيا حوالها غريبة ما نعملوش قيمة للحاضر
ونهار تروح الحاجة وتتخبى لتم الي نعملولها قيمة وقدر
كم من واحد عاش في غربة كان مشتاق مع ولادو يهدر
مشتاق يسمع كلمة بابا ويقعد في مايدة معاهم ويڤصر
بعد ما شقى وتعب أو ربى وعطالهم كامل واش قدر
بعد ما حمل شحال من ضربة ورفد كلشي في قلبو وصبر
خدم والخدمة كانت صعيبة وكان كي يلحق راس الشهر
يروح يجيب هاذيك الكاتبة ويجي يمدهالهم ليهم فاللاخر
الي يطلبوها كانت تتلبى وكان عليهم عمرو ما يتأخر
رافد في يدو ورقة مكتوبة ويدبر راسو منين يدبر
كان يعطيهم وبلا محاسبة وساعات حتى هو ما يفطر
غير باش ذاك الدورو يتخبى وولادو برك ما يباتوش للشر
هات يلبسوا الحاجة الشابة وهات المحفظة ديالهم تتعمر
وهات ما تخصهم حتى لعبة والحاجة الي يطلبوها تحضر
ولا كاش ما تكون كاش سبة ولاّ مرض لا ربي قدّر
ولا كاش ما تلحق مناسبة كان باباهم دايما حاضر
المهم برك وليدو يتربى فالعز وفالخير باش كي يكبر
يتكل عليه عند العقوبة ويصيبو كيما رباه فالصغر
المهم رباهم حبة بحبة عمللهم كامل واش قدر
زرع فيهم لحنان والمحبة لكن حصد شي وحداخر
ولادو كبروا وطلعولو ذيوبا وهذاك الخير ردوهولو شر
بين يديهم ولا لعبة ولا وليدو بيه يتمسخر
ولا قافز ويقولك بابا عبد قديم مزال متاخر
ولا لما يشوفو يتخبى ويحشم بيه قدام وحدوخر
يقوللو يا شيخ في عوض بابا هذا ايلا كان معاه يهدر
ولوخر ولا صحيح أو ربّى الرقبة والذراعتين والصدر
رفد يدو وضربو ضربة صعيبة بزاف باش تتنغفر
ولوخرا كبرت ولات شابة ولات تضرب باباها فالظهر
في غيابو تعمل ما راهي حابة ولا ساعات قدامو تجهر
ووليدو لاخر راح للغربة عجبوا لزين نتاع لقور
عجبو الزهو نتاع أوروبا وما زادش بان عليه خبر
ونسى حتى كيفاش تربى عمبالو وحدو هكذا... كبر
وستخسر في باباه كتيبة كلمة يطمنو بيها ويصبّر
وخوهم لاخر صاب السبة قالك الديق وبابانا كبر
راح رفدو يا عجابة لدار العجزة بعد العمر
لما قالوا أرواح يابابا باباه تبعو وما جابش خبر
عمبالو رايح يديه للكعبة ولا يديه باش يعتامر
هاذ الدنيا حوالها غريبة مانعملوش قيمة للحاضر
ونهار تروح الحاجة وتتخبى لتم الي نعملولها قيمة وقدر
واحد النهار صرات مصيبة باباهم مات وجاهم لخبر
جاو وتلايمو كامل في رحبة وتعاونوا باش حفرولوا قبر
قدام الناس بناولوا قبة وعمروهالو كامل بالنواور
كان حي كان مشتاق حبة كي مات علقولو عرجون تمر
عليها حبيت نقولك يابابا أنك ماراكش جايب خبر
بلي نكنلك واحد المحبة مانكنهاش لانسان واحد آخر
حبيت نقعد معاك في رحبة حبيت نضمك لهاذ الصدر
حبيت نقولك كلمة شابة دركا يا بابا قدامك حاضر
كلمة جاتني شويا صعيبة بلاك حشمة وبالاك قدر
ولا بالاك ولات غريبة ولات كلمة عيب تتنهدر
ولا بالاك ولات لمحبة حاجة تتمد بلا ما تظهر
كيما لهدية لمّا تتخبى أو تتغلّف أو تتمد فالستر
ولا بالاك لازم يتربى أو يتعود عليها مالصغر
المهم دير في بالك يا بابا ما عرفتش برك كيفاش نعبّر
وفاتت كم من مناسبة كم من عام وكم من شهر
كم من شمعة وكم شيبة كم من مرة ما قدرتش نهدر
هاذ الكلمة جاتني صعيبة من صاب نولي لأيام الصغر
كنت نقولها ضحكة ولعبة نقولها وبلا ما نجيب خبر
نشفى لما كنت نتربى يسقسوني شكون تحب كثر
دايما نحصل فالإجابة ما بين الشمس أو بين القمر
يما ونتايا شويا صعيبة نفكر ونفكر من بعد نهدر
يما قد السما ويا بابا نتايا نحبك قد لبحر
يا بابا دعوتك مستجابة عند ربي ما عندهاش ستر
لما نكون في وسط الغابة فالليل دعوتك عليا تنور
ولما نكون في وسط الذيابا بدعوتك يا بابا الأمور تتيسر
مادمت حي ما تزيدش تتخبى نحبك ونقولهالك قد ما نقدر
ويلا كان قدّر ومتت يا بابا نجي ونجيبهالك حتى للقبر
تأليف فيصل كرشوش
كل الحقوق محفوظة