هاج مُوجي طلع ببالو مُوال فْلَت مني و صَدّْ يْلبْد فالمالح غناج عَودي ما يساعفني في لقوال ما رضى يْسْمَّعني في القول غير القاسح آش يرجى يْصدّق شلى افعال وجه صافي امام بدينو يتبجح و الركيزة عندو راشية الخصال لا دنى من الدنيا و لا لاخرة لي عنها ينصح شين لوصاف الواصف حالو غزال و افعالو من التوت سودة واضح ما يغطي الثوب عيوب لهبال و لا ركب بابور الكاغط موجو يردح شحال يشد الورق و يعافر لهوال شحال جهدو يقاوم و يسبح شحال عندو في العوم حاسبه تكسال شحال قدو ينفخ في لي ما يصلح شا تشد الحلفة و الند لوح بابور شق أميال شوف ندّك قدّك روما تفلح لي عنق الموجة يحوس عدلال لا تنسى المقادف كونك مسلح لا تخزر فشمس الخزرة فيها محال شحال من عماتو و ما عاود فتّح شحال نكرة غرقو ما شدو حبال حسبو العوم دورة و اتفسح غرتهم الغواية عيطة رجال رغبو الصيد و الموجة ما تسمح الشبكة لي نصبو بحزام اسوال جرتهم و انقلب قايمهم في المالح آش يدير النسر الطاير بين الجبال كان بطنو تنزلو للواد اللامح بعد عزة ضاين و طاح مال واش يفرق سردوك عطير الجارح الصورة هيبة و الصح تحشم ينقال وسط قانة بخسو كباش تتناطح كي دير تصفي القمح اذا انتقب الغربال يتخلط صحيح مع لي ما يصلح يتغطى الحب الصافي بكثير انخال واش جاب معدول المشية لخطوة لفجح اذا كيلت العسل شد مليح المكيال لا تجمعش نحل مع رزوزي في الجبح الزعامة في الأصل جملة خصال ما سلخ شاة لي ما يعرف يذبح ما صلح من لاعرف قيمة نسا و رجال و من جهل قدرو أبدا ما يصلح هاج مُوجي طلع ببالو مُوال فْلَت مني و صَدّْ يْلبْد فالمالح غناج عَودي ما يساعفني في لقوال ما رضى يْسْمَّعني في القول غير القاسح