الأخطبوب وبن بوزيد

وقال بحليطو: اقتحم عليّ صديقي الحمار خلوتي، وقال لي: واش بيك، غرقولك البابورات؟ وقلت: واش من بابورات عندي· أنا أفكر في الأخطبوط· وقال: واش من أخطبوط، ما تقوليش بول؟ قلت: هو بالذات، وأضفت: لو كان ربي رزقني بأخطبوط ذكي كيما هذا، ماشي خير من الفيقورة أنتاعك؟ وأضفت: هذا الأخطبوط تنبأ بفوز إسبانيا بالكأس وقالوا أنه تنبأ بالرئيس الروسي المستقبلي، وربما رايح يتنبأ بالكوارث الطبيعية القادمة قبل وقوعها، من زلازل وبراكين وغيرها حتى تتجنب البشرية الكثير من تداعياتها· وقال: وهذا الأخطبوط واش من لغة يتكلم؟ فقلت: والله غير أنت حمار أنتاع الصح·· وبعد صمت قلت له: تعرف واشي هي الأمنية أنتاعي؟ فقال: واش هي؟ فقلت: حبيت نتلاقى مع الأخطبوط بول وعندي ليه سؤال واحد· فقال: واش هو هذا السؤال؟، فقلت: نسقسيه إلا يبقى بن بوزيد وزير قبل نهاية هذا القرن، وإلا رايح يبقى في القرون الجاية·