لعوايل انلوراس امقران بذون فتلنت أبرباش سلمعاونت

ورعان لعوايل انلوراس امقران اتحفاظنت لباس فالعاداث ذالتقاليد أنست، سيرتو ثيا أقلى غرسنت العلاقث إذ نتخامين ثمقرانين، خاطر لعوايل انلوراس كامل ذي باثنت انيغ ذي خشلة انيغ ذي ام البواقي تخيارنت الوقث يحلان بشام أذمعاونت اذفثلنت أبربوش بشام أثافنت ذي المشتا خاطر اذتحبانتش أذفثلنت ذي المشتا وادسهقاينت ثيربا ذ إسيارن امين أثنا الحاجة نعيمة إجرنال ن«الشعب".
والوقث نيوراي أفريل اذماي نتا ذالوقث أقلا يحلا لباس أقفثال خاطر يتيلي الحال يحلى يخس أقفثال انيغ أقسغاري نبربوش، ونسقس الحاجة نعيمة مامك إفتلنت لعوايل انلوراس أبربوش، ثنانغ بلي تمجمالنت 4 انيغ 5 نتقيارين ذي ثداه انتيشت وأذمعاونت كامل فبربوش وفتلنت محسوب أقنطار إثخامت.
ولان خام نتاث اهنتدعرض واتقوم إسنت واسنتق لفظور يحلى مليح، ولازم اتعرض الخالاث أقلا تيلنتس اثتمفهام إذسنت مليح بشام اديرق أبربوش انس يحلىن وبغير أذكملت نهتين إلفثيل، تاسنتيد ثهيوين نالوقثاي بشام أسومنت وأثحمصنت مليح اومبعد لال نخام ثسفراغ ثداه انيغ سنت بشام اتسغر أبربوش واتقيم ثلثيام نتاث أظرن ذيس بغير اذقار أومبع اتخمل ذي سوشاي واتفر وبغير اتحواج أتتكس قلي قلي وأتسقم ذاقمان واصتنصب واذيوم ليه ليه.
ولعوايل انلوراس امقران اتقنت شياي خاطر ذي المشتا أقيلن وسان ويصمت الحال لباس أنيغ تاسند غنجيون ولال نقوار أثكالش كلا كاس نتاث اثفتل.