شادي‮ (‬بادي‮)... ندّي‮ هاذي‮ ولا‮ هاذي‮!‬

مباشرة بعد الإعلان عن توقيف برنامج (حال وأحوال) من البرمجة بعد الإفطار على شاشة اليتيمة، فكرنا في قناة ما عندناش وما يخصناش في الاتصال بالسيد محمد صحراوي المعروف ب»بادي« من أجل الاستفسار عن حاله وأحواله، وعن سرّ التوقيف وما ورد أنه تم (بالسيف)،
فرد علينا المخرج الزعفان.. »صح رمضانكم، أنا بروحي كنت راح نتصل بكم باش تبثوا في قناتكم ما تبقى من الحال والأحوال«.. فأجبنا السيد صحراوي قبل الدخول في البث الحيّ.. »والله يا سي بادي مازلنا في قناة ماعندناش وما يخصناش نبث الأخبار برك، ربما العام الجاي إذا وسعنا البث للسكاتشات نشوفوا مسألة شراء وعرض الجزء الثالث من عمارة الحاج يعقوبيان ومعاها المسلسل نتاع قلة الحال وغمة لحوال«.. وقبل أن يهز صحراوي رأسه موافقا قذفناه بالسؤال الثاني عن سر توقيف المسلسل بعد حلقتين فقط فأجاب.. »يا خو واش حاب نقولك، أنا يسموني بادي بصح عمري ما شفت برمجة تتم بنظام شادي بادي ندي هاذي ولا هاذي إلا في اليتيمة نتاع شارع الشهداء«.. وعندما استفسرنا الأمر أكثر، قال بادي الذي يحب أغنية (حبك هادي).. »أنا كيما تعرفوني نفهم بزاف وفهامتي معروفة وطنيا لأنني مخرج برنامج الفهامة لذلك أقول للمسؤولين على التلفزيون إنّ مثل هذه القرارات ما تفوتش عليا بدون ما نعرف مصدرها أو نشمّ مولاها من بعيد..« وهنا وضع السيد بادي أصبعه على أنفه فعرفنا بلي المسألة نتاع نيف صح، ثم سألناه.. »لكن يا السي بادي.. جميع المشاهدين انتقدوا الحلقتين اللتين عرضتا في التلفزيون بعد الإفطار وقالوا إنك أصبحت بعد الفهامة مخرج السماطة؟«.. وهنا أحسسنا بأن السيد بادي تغيرت حالتو وتبدلت أحوالو، فقال فورا.. »يا خو راني نشوف بلي نتا اللي بديت تتفيهم عليا، أنا أب الفهامة في الجزائر، وين شفت السماطة يا وحد السامط« ثم أضاف المخرج بادي بدون أن نسأله.. »شوفوا واش داروا في بلاصتي.. هاذي سوسو وهذا نونو.. الجمعي والسبتي.. كاينة سماطة كثر من هاك...« وقبل أن نفكر في إنهاء اللقاء كان مخرجنا قد هز بيده خلف الزجاج أن هذا الحوار قد لا يبث في القناة (مثل حلقات حال وأحوال) لأنه حوار سامط!