حوار الطرشان

الرفاق حائرون يتقابلون يجتمعون يتشاجرون يختلفون يتفقون يتحاورون حوار الطرشان لأن الرئيس بديع لم يحضر و زوجاته الأربع والنتيجة صفر , لقاء وجلسة شاي وقهوة عالريحة بيفكرني بنفس حوار الدستور بالظبط نفس الأسلوب نفس السياسة نفس التعاسة حتى للأسف نفس النجاسة والنخاسة الفكرية لأن مفيش فكر طاهر لا مؤاخذة لا من رئاسة ولا جماعة ولا معارضة محترمة ولا جبهة كلام فاضي ,
حسبي الله ونعم الوكيل فيكوا كلكم , حسبي الله ونعم الوكيل في كل واحد دخل سلاح في مصر ونشره في كل مكان وخلاه وجوده أسهل من رغيف العيش , و حسبي الله و نعم الوكيل في كل واحد استقوى عالتانى فينا وعمل عضلات بصندوق انتخابات سرقه بالجهل وحاجة الناس ولا قام بمظاهرات وإضرابات من غير سبب وحرق بلد أكتر ما فيها غلبان ومش لاقي ياكل وكل محافظتها مليانة ناس ما بتعرف تقرا اسمها ويقولوا بعد كده انتخابات حرة سلامتها الحرة وسلامة الصندوق واللي جابه وحرق بيه بلد ,
وبكرة يطلع اخونا العزيز الدكتور العوا بكلمتين حامضين يحلل بيهم حلاوة القعدة و يولع اللي يولع وتتخرب البلد على اللي فيها لأننا ما بنبصش الا تحت رجلينا ولا عندنا رؤية لمستقبل ولا قراءة لخطر إسمه الكراهية المطلقة اللي بقت بيننا , كراهية للحزب الواحد وكراهية للسلطة المطلقة و كراهية للمتاجرة بدين و كراهية للغة القوة وطريقة لقد قررت ولقد أصدرت ولقد فعلت ولقد حلمت ولقد صبرت و صبر البلد طال واستطال ,
ومفيش حد قادر يوصل لفكر الشباب اللي في الشارع الثوري الحقيقي منهم اللي كفر بالرئاسة والإخوان والمعارضة ولا الشباب المغيب المضلل اللي ماشي في الزفة ولا حد عارف يتحاور معاهم , لأن كله بيلعب على حبل واحد حاوريني ياطيطة ورقصينى يا لمونة وحزمني يا صندوق العبي يا قطر واشربي يا قناة وصوتي يا مصر وافرحي يا إسرائيل ,
تمخض الاجتماع فولد بيان وكل قعدة عاوزة أضحية واخونا هشام قنديل طاير طاير يبقى نعجل ونضحي بالجنين عشان تعيش أمه اللي في المقطم وتفرح وتحصد وتجني كل الكراهية والخراب اللي عشش في البلد , وعاش لنا صباع الرئيس ويفضل على طول في عنينا مش خسارة فيه أهو بيتعلم ونتحمل بعض طالما لسه في كي جي رئاسة ومفيش حد بيعرف يكتب له كلام يألف القلوب ويلم المفقود ويداوي المجروح ..... اللهم طولك يا روح .