أغروم نتخميرث نتا آغ يسحلاين لمكالكلث نرمطان ذي لوراس أمقران

سي قبل مهدعدا رمطان العظيم ولعوايل انلوراس امقران توجذنتاس ذي لباس نتغاوسوين، وسيسنت ارن يحلان بشام أذتموقا ايس أغروم انخميرث أقلا اقرناس المطلوع بشام اذفطرن ايش يا أقلا زومن.
ويتاسد اغروم انتخميرث زاث لباس نتغاوسوين ذي رمضان سيتو الخلاث اقلا تيلينت اسقاس كامل اثتقنتش وتعاوننت ايماننسنت سالخبز انيغ البريوش ذي رمضان العظيم لازم اذقنت اغروماي، وارقازن انسنت شرطن لباس اغروم ذي رمضان، وبشام ايرق اغروماي يحلا لازم اذيلي ارن انس يحلا وينغذ مليح ويتموقا امين اغننانت لباس نلخلاث اقلا يقاهنت الجرنال ن»الشعب» بلي رمضان ذي لوراس انيغ ذي الجزاير كامل اذتحلايش بلا أغروم نتخميرث.
وماني نسقسو فموقي انس أننتانغ بلي لازم اتقذ ارن ومن بعد استقذ امان احمان ومنبعد اتخلط طلشي ايذ نقلي نالملح وثاخميرث من بعد اخمرذ مليح وتعجنذ لباس بشام اديرق يتواعجن امشخشوخ نالنعمث ومن بعد اتسرس قلي بشام اذخمر واتغطيذ.
ومن بعد اتوليذ اغرس واتقذ تعنونا سنت انيغ تلاث امين اسخس ثقيار انوخام، ومن بعد اتبذو اتتشاث واتق ثرخساسنت نغروم واتسوم فوفان، اقلا يتيلي زنق العافيث ديج اغرسي قلي نالوقث .
وسالخصوص نفان لازم اذيرلي يتواخذم سي ثلاخث واذيلي ينقش قلي بشام اديرق اغروم يحلا ويزوغ مليح، وبغير اتقرذ زنق فان اتقيمذ اتتعوسيث مليح بشام اذحرقش واتظرنذ بلعقل وبغير اذيوم فذماون انس ايسنين اتكستيد ومن بعد اتسومذ فلجناب انس واتسرسذ ذي ثكوربايث اذيبرذ قلي ومن بعد اتبيذ سخذمي واتغطيذ بغير اذيدن لذان واتكستيد بشام اذمغربن فلاس لعباذ انوخام.
باتنة:لموشي حمزة