ليه الوليد بيبكي وقت الميلاد بعلو الصوت مع إنه لا شال هموم ولا شاف حكم طاغوت بيبكي عشان هيعيش الحياة ولا عشان مصيره يموت ؟ ** ** ** ** ** ** ** ** بين فصول السنة مظلوم يا خريف يصوروك قاسي ويرسموك مخيف مع إنك بتبكي ورق شجر كما اي طفل ضعيف ** ** ** ** ** ** ** يوليوس لاجل الخلود - من التقويم- أختص نفسه بشهر ولإنه ملك زاد عليه يوم من أيام فبراير بالقهر غار اغسطس قلده فزاد فبراير فقر لانه طيب زي العوام عايش من غير ضهر وعن ظلم الملوك إكتب يا تاريخ وإشهد يا دهر *** **** *** **** هلّ الربيع والحلم جوه القلوب إتولد عكس الجميع قلبي صابه الرمد ده كل شئ له اوآن وأنا حزني بطول الأمد ** ** ** ** ** ** علامة تعجب في المفتتح من دنيا لونها غامق وساعات قوس قزح وناس قادرة تضحك رغم الحزن وناس بتبكي في لحظة فرح ! ** ** ** ** ** ** مشربية ارابيسك عثمانلي بيطل من وراها قلبي اخاف اقفلها تضلم الدنيا واخاف افتحها ع البحري! ** ** ** ** ** ** وقفت قدام بابك المقفول لا حول لي ولا قوة وكان في ايدي مفتاح غير كل المفاتيح قلت اكيد هوه وبعد ما هيأت نفسي للدخول لقيت مفتاح تاني من جوه ** ** ** ** ** قلبي خايف بيرتعش من يوم الطوفان يا قلبي إثبت ولا تخف من نجا نوح قادر ينجينا إحنا كمان يرد قلبي يقول الأصعب م الموت بالغرق التوهة في سفينة بلا قبطان ** *** **** *** ** محدش بيموت م الوحدة قلتها من كام سنة وهجرتها وبعد سنين الوحدة رجعت اقول محدش بيموت م الوحدة الا انا . *** **** **** ** اه يا موت يا ابو صمت حزين بتدق بابنا مستني رد مين انت الضيف اللي ما يقدر حد يكرمه يستوي في ده أشرار وطيبين . *** **** ***** درويش أنا في ساحتها مجبر ع الدروشة في حلقة عشقها قلبي الحزين إنتشي فكرت اقول بحبك لكن لساني إختشي ** **** *** *** وقفت ع الشط وبصيت بعيد شفت السما بتلمس البحر وتمد له 100 الف ايد وايد قلت اطمني يا حبيبتي مصيرنا نلتقي في يوم اكيد . *** *** *** *** دولة المماليك مكنش فيها راجل حر أصل المصير كان في إيد واحدة من الحريم إسمها شجرة الدر قدرت علي اتين سلاطين وشوفوا كيد النسا بنت جنسها دوقتها المر !! *** *** *** **** بين جموع البشر طفت ادور علي هابيل في السكة التقيت 100 قابيل وقابيل غريب امرك يا ابن ادم خلدت مين قتل ونسيت مين كان للحق قتيل *** **** *** *** أضحك يا حزين وأملا الكون قهقهة اعمل حسابها اه وأياك تخاف غدرها ده اللي يخاف يعيش اسير وراح يموت من قهرها . *** *** *** ** معدش ليُّ فيكي إختيار مبقتش عارف لك صيف من شتا في برد طوبة فاتحة الزرار و في حر يوليو متكلفتة وانا بموت م الانتظار أسير حساباتك المُربكة *** *** **** أعمل حساب الزمن ده العمر مش بعترة لو القطر فات إيه فايدة التذكرة ؟ *** *** *** تامر عبد الحميد
