الخاتم

بعدما تعرفنا على أهم أحداث قصة الخاتم عن طريق رسالة الأخ ياسين، منذ بدايتها وصولا إلى رسالة صابرين التي تخبره فيها بما حدث لها بعد الفراق، نصل اليوم إلى النهاية تذكيرا بكل القصائد التي كتبت حول هذه القصة التي وجدنا فيها دروسا وعبرا كثيرة تخص الأزواج، ولهذا ارتأينا نشرها كاملة وتحويلها كليا إلى قصائد من تأليف فيصل كرشوش.
الخاتم 01
التعارف
لله ماتلومنيش يا لخاتم ماجات مني لا منها هي
احنا فراقنا كان محتّم مكتوب عليها وعلّيا
ابقى غير فصبعي دايم مادمت حاجة منها هي
غيركي تشوف هكذا تفهم بلّي مزالها عزيزة عليا
مازال نبغيها وربي عالم ومزال هي فقلبي حية
وغير انت وحدك يالخاتم الي تقدر تشهد عليا
انت الي كنت معايا دايم كنت فصبعي صبح وعشيا
خصارة لوكان جيت تتكلم تروح لعندها تحكيلها عليا
قوللها شحال راني نتالم ومهاذ دموع اديلها شويا
تحطهم فعينها بلاك تتعلم تبكي وتفرغ هم الدنيا
ماكنتش قاع فروحي نخمم كنت نخمم غير فيها هي
كنت نخدم وغير نخدم الليل والنهار تحاماو فيا
وين نصيب دورو نزدم المهم الخبزة حلالية
كنت نبني نطلّع ونهدّم فحسابات ماهمشي ليا
ولحكاية كامل كانت لتم فوالديها واش شرطو عليا
والله ماني عليك يا لخاتم انت زدتك من عندي هدية
شروط اخرين حبوهم تمتم وغير الحاجة الفولانية
قبلت الشرط كان محتّم وما حسوا بيا غير والديا
بديت نجري بديت نلايم وبدات الدنيا تضلم فيا
وانا عمري ما كنت ظالم نحب نمشي غير بالنية
قلت نخرجها بلاك تفهم تحس بعذابي وتحس بيا
ماكانتش تحوس تفهم كانت الطفلة زهوانية
اعلى الناس تحب تتكلّم غير مالجيهة الفوقانية
عندها الدنيا غير دراهم وما تهمهاش اللخرانية
هي تضحك وانا نتبّسم وغير نغمض في عينيا
باش الدمعة تقعد لتّم وماتهبطش قدامهاهي
زادت قاتلي بلي لازم ما نسكّنهاش مع والديا
مزيا كنت نعرف نرسم التبسيمات في عينيا
شحال مراسم دخلنالهم تاكل وتشرب وتعرض فيا
ولاعمرها تحوس تفهم شحال عندي في يديا
لتم بالذّات بديت نفهم بلي الدنيا شافتها فيا
هاذ الطفلة راهي تحلم وحطت كل أحلامها فيا
بغات تعيش بغات تتنّعم خافت تعيش زواليا
المهم انا درت اللازم خدمت وشمّرت على يدّيا
لكني مالحقتش يا الخاتم حتى هي مرقتها شويا
لتما شفت بلي لازم تريقي ماهيش تريقها هي
لله ماتلومنيش يالخاتم ماجات مني لا منها هي
احنا فراقنا كان محتّم مكتوب عليها وعلّيا
قصيدة الخاتم 02
الفراق
لله ما تلومنيش يا الخاتم ماجات مني لا منها هيا
حنا فراقنا كان محتم مكتوب عليها وعلّيا
الي بنيناه كلّو تهدم ومن نهار الي راحت عليا
وانا قاعد غير انخمم بزّاف فراقها أثّر فيا
يالخاتم وليت متشاءم وليت نكره كل الدنيا
ما وليتش حتى نتكلم وزدت حيرت معايا والديا
والخدمة ماعدتش نخدم الماكلة ولات سامطة عليا
تقدر تقول وليت بنادم غير زيادة في هاذ الدنيا
يالخاتم... راني نتألم مانيش فاهم ڤاع وش بيا
ساعات نقول راني نادم كي خليتها راحت عليا
وساعة نقول وقتا نتعلم بعد الشّي الي دارتو فيا
وعلاش راني فيها نخمم وهي ما علا بالهاش بيا
لتم يالخاتم كان محتم باش انحيك من يدّيا
نحفر حفرة ونحطك لتم وما تبقاش تفكر فيا
نحيتك، ومازال نتألم مزال هي في قلبي حية
مزال نحبها وربي عالم ومزال خيالها يتبع فيا
وين نروح نلقاها لتم فكل مكان في هاذ الدنيا
الي نشوفها فيها نحكم من بعد نلقاها ماشي هي
كيفاش ندير قولي يالخاتم لخيوط كامل تخلطوا عليا
وهي درك... الله اعلم ايلا مازالها شافية عليا
ساعات نقول نعاود نتقدم بلاك تعاود توّلي ليا
بلاك عوّلت باش تتسقم وتعود تفهمني وتحس بيا
وساعة نخاف نولي ونندم ويزيد يعاود يصرا فيا
كيما صرالنا آه يا الخاتم فالخطرة اللّولانية
ساعات نقول نبقى صايم ملنزيد نعرف بعدها هي
والنسا ما نزيدش انامنهم نعيش وحدي فهاذ الدنيا
من بعد نقول لالا يالخاتم هاذ الشي حرام عليا
صلى الله عليه وسلم كان نهانا عن الرهبانية
وهكذا لبنات ربي خلقهم ما يتشابهوش فالعقلية
كل وحدة كيفاش تخمم وماشي كامل كيفها هي
كاين الّي تحب الدراهم وتحب واحد كاسب دنيا
ولوخرا تقولك... المهم غير يحبني ويحّس بيا
وكاين الي تحبك تخدم غير الخدمة الفلانية
ولخرا تقول المهم فاهم والصح كامل فالعقلية
وهاذي تحب واحد ملتازم بالمضاهر الخارجية
ولوخرا تقولك المهم هي الاخلاق والتربية
وكاين وكاين وكاين يالخاتم كاين بزاف بنات فاميليا
وكاين الّي ربي يهديهم راهي غارتهم هاذ الدنيا
المهم والله راني فاهم راك زعفان شويا عليا
كي نحيتك وحطيتك لتم الله غالب ماشي بيديا
حتى انا راني نتالم والوحدة راهي تقتل فيا
ومادا بيا نكون ملايم وندير دار او ذرية
ودعيت ربي وانا قايم نلقى وحدة الي تليق بيا
وحدة ترضى بيك يالخاتم ويرضاو والديها ووالديا
والحاجة اللّولة المهم انو ربي يرضا عليا
باش نجي نجبدك ملتم ونعاود نديرك في يديا
لله ما تلومنيش يا الخاتم ما جات مني لا منها هي
احنا فراقنا كان محتم مكتوب عليها وعليا
الخاتم 03
الرسالة
لله ما تلومنيش يا الخاتم ما جات مني لا منها هي
حنا فراقنا كان محتم مكتوب عليها و عليا
يا الخاتم مانيش فاهم ويلا فهمتني مادا بيا
تقولّي نبكي و لا نتبسم و لا نضحك من عينيا
وش ندير قوللي يالخاتم ماذا بيا تدبّر عليا
أسمع مليح من بعد أحكم راني جايك غير بالشوية
كنت كيما العادة هايم و لما دخلت للدّار لعشية
لقيت بريا قريت الاسم حسّيت الدنيا دارت بيا
... باسم الله نرفع القلم والصلاة على خيرالأنبيا
صلّى الله عليه وسلم قلت بالاك ماشي هي
ما كانتش هكذا تتكلم راك تعرفها زهوانية
ياك ما تحبش حتى تتعلم نجي نعلمها تضحك عليا
لتم هبّطت عيني تم تم سبحان الله أسمها هي
يا الخاتم كتبتلي كلايم هلكوني وكملوا عليا
قاتلت ربي سبحانو يعلم كامل الشي الي صرا بيا
ملي خطيتك وأنا نتألم ومانشفوش دموع عينيا
تفارقنا في جال الدراهم اعلى جال خماج الدنيا
خاطر قليل او منعادم وحتى والديك زوالية
تبّعت الناس وسمعتلهم او من بينهم حتى والديا
نشالله ربي يسامحلهم هوما كانوا يدبروا عليا
وأنت عييت فيّا تفهّم حتى حاجة ما نفعت فيا
قلت لي بلي الدراهم هَم شوفي الناس ألي أغنيا
كامل ربي واش عطاهم ماشي مهنيين فهاذ الدنيا
ديما بعاد على بعضاهم وأنا عايش مع والديا
اللي كاين نقسمو معاهم ولما نطوّل يتقلقوا عليا
فرح وقرح ديما معاهم وهكذا رايحة تكوني نتيا
لمّا كنت هكذا تتكلم نقول راه غير يصبر فيا
هاذ الإنسان راهو يحلم وأنا إنسانة واقعية
وفذوك ليّام ليا تقدم واحد خطبني من والديا
وليد ناس لا باس بيهم طمّعوني فرّشولي زربية
كانوا يحكولي على وليدهم وش كاسب فهاذ الدنيا
قعدت شحال وأنا نخمم وأنت ماكنتش فايق بيا
لتم بديت نقارنك بيهم لقيتك بزاف بعيد عليا
أما وليدهم كان كل دايم يجي للدار يجيبلي هدية
وش مذهب وش مدراهم تقدر تقول عمالي عينيا
ودركا نظن راك فاهم علاش ما قبلوكش والديا
لتمّا شفت بلّي لازم نشوف الّي يخرج عليا
قررت باش نخّبي الخاتم او نحّيتو من يدّيا
وتفارقنا أو ملتم بقات صورتك بين عينيا
ونسمع غير فزوج كلايم لمّا قلت لي أنا ونتيا
صرالنا كيما حواء وآدم لمّا بليس ما قدرش عليا
قالك لازم انفرّقهم امالا دار ليك نتيا
وعمالك عينيك بالدراهم وشهدت معاه حتى الحية
الناس الّي الله يهديهم أثروا فيك وماشي فيا
خرجت كيما كنت تخمم بصّح أنا بالنسبة ليا
قلت حققت ما راني نحلم فارس أحلامي طل عليا
الندم
تزوجت بيه او ملتم بدات تتبدل العقلية
وكل ما كنت معاك نتعلم عشتو او شفتو بأم عينيا
وليت زوجتو غير بالاسم او ما يحسش كامل بيا
نهار كامل و هو يخدم وما يسقسيش حتى عليا
ما فهمتوش كيفاش يخمم ما عندوش كامل عقلية
نهار كامل و هو هايم او يدخل سكران لعشية
ولما يصحى يولي يخدم ولا تصيبو يدي فيا
عند ناس ناكلوا معاهم ناس في غاية الأهمية
ولا عمرو أداني لدارهم ولا أداني لدار والديا
يديني غير وين الدراهم عند العائلة الفلانية
ولما نولو يبدى الهم يرد زعافو كامل فيا
تلقاه غير يشكرلي فيهم و أنا زوجتو يعاير فيا
لتم نتفكر و نبدى نخمم لما كنت تحوس بيا
نتفكر الجوايه الي زرناهم أو نتمشى على رجليا
الناس كامل نقعدوا معاهم مرفهين ولا زواليا
أنت ماكنتش بيا تحشم بالعكس كنت تفتاخر بيا
خلّي نكملك المهم الدنيا كيفاش دارت عليا
لحقت نخمم نشرب السم أو نتهنا من هاذ الدنيا
شحال وشحال وأنا نلايم زاد رفد يديه عليا