الكسكيطة والبوقوصة... !

يقال إن رجلا ضخما عندو كسكيطة كبيرة جدا جدا وشلاغم بيوضا بزاف ورنجاص يدير الحس في كل مكان وزيد عليها عندو بوقوصة تعرف اطيب البركوكس بالمرقة الحمراء، تحطو في قصعة طين ماشي صغيرة وماشي كبيرة، شعرها صفر وقيس قيس، وهذا بوكسكيطة دايراتو خاتم في اصبعها الصغير وكما تقولو ايدير...
يا سيدي هذا مول هذه الأوصاف يقال هو اللي راه يخلط فالدزاير دارها مرميطة بركوكس وراه هاي هاي يحرك ساعة سعداني ويضرب ساعة التوفيق ومرات يبروصي لبوتفليقة.
همالا مرميطتو عندها بزاف وهي تطيب ولكن البوقوصة تاعو قالت لو بلي الفلفل الحار يبنن الماكلة عليها أشرا جردينة تاع قرون الحار ورماهم على ضربة فالمرميطة، الدنيا شعلت وولا الطايح أكثر من النايض وراكم تشوفو كيفاش راهي الدنيا قايمة.
قالت البوقوصة لبوكسكيطة السمينة أواه يا حبيبي راك حرحرتها بزاف ماشي هكذا؟
قالها... أش خداك أشكون لي غاضك فيهم خليهم يدخلو في بعضاهم
قالت ..بالصح هكذا رايح تخليها؟
قهقه عاليا وهو يضرب البركوكس الحار... هي مخلية من الثنين وستين يعني جات على شوية حرور هاذو؟
وزيد راني حاب أنشوف الجماعة الرجالة كيفاش يصرالهم كي يزدمو فالحيط
قالت الشقراء...راني خايفة قلب بوتفليقة يحبس
قهقه عاليا وحبس أكل البركوكس وقال... اهنا اسكتي كيفاش هذا بوتفليقة قلبو يحبس؟ لالا غير هذه لي ماتصراش أواه واقيلا طلعلك الحار للراس؟
قالت... خفت عليه راه مريض وماشي قادر على الحس
أجابها بحزم وهو يضبط الكسطيكة على الرأس ويضرب في كريشتو اللي تعمرت بركوكس... يحبس كلش فالدزاير إلا بوتفليقة وماتخافيش عليه راه قادر على الحس وعلى كلش ماتنسايش الحنش يجري الشيوخة والفاهم يفهم... بصحتكم البركوكس.