ادوهيل نونفذو

اش ابدى انوتاف انوسان نونفذو دالراحة ادورجال نغربازان تورننسان اتورزامان اغربازن اضضنين ايالفايدة نمزنان اورني انوبوي نالفايدة دوسقضع انوسان انولماد وسان نالراحة.
اش حد مان اقضع يلا وس اقضع غال اغربازن اوحفاظ نالقران يلا وس اقضع غال ورني انوعزام ادولماد انتوتلايين انغ اللغات يلا وس اقضع غال المكتبات اوعزام دوجد ايمال.
اغلان تدجور دس اقت العادة ايتزعم دين اش اتاف نونفذوا ادباب نغربازان ازعلاك ادوس يلا اسدسات اتسدجان ادوهيل اينلمادان دتنلمادين اتسجدان الدورات نالقران اموني مع وبدى نيور نجوان دجويلية المدة نيور ادسن اياران.
سالمعاهد الان ندهان احرشوا دين المعهد نامي سعيد اغرس اقت التجربة ايتزعم مان ايجروا يغلب ننلمادان اماس انتدارت انوعزام اتقمان اقت المدة حفظان دس القارن عزمان الفقه دالشريعة ادلمور نالدين.
اماشي اتوسدج دخ اقن التربص وضض اتبوخساتين اوحفاظ ادوعراض نالقران التربص ايتقم يدجور المدة انيور انيضان يلا وس اعرض القران يلا وس اتاوض غال الربع دالثمن ادوزجن.
اماشي الانت دخ يغلب انتدشلوين اتسدجانت ادوهيل يور نونفذو اتاوين دسن امزانان غال مناوت تمو انوغلان دالظهرة جبان غفسان مناو امقرانان المدة 15 اد 20 انوسان يلا وس اقضع غال ويدر نالل يلا وس اقضع غال تجموين انغ لغوابي نالظهرة.
اسدج ندوهيل ايمزنان امار نالعطلة اسويس باش امزنان بالخصوص امارو اولطوطين لحرام اولتقيمين تنضان اغولاد اتخولوطان قاع ويدوسين .
تغردايت :الشيخ باعلي واعمر