شوربة انرفريك لماكلث آغ لازم اذيلي ذي طوابل نرمطان ذي لوراس

بذونت لعوايل انلوراس امقران توجاذنت إسدنا رمضان العظيم سلباس نالوقت واتغاوسوين، وسيرتو ثيا اقلا غرسنت العلاقث ديركت ايذ نتمرميط انلفطور، ويتاسد لفريك ذلحرور فإخف نتالحضيراثاي، سيرتو لفريك خاطر نتا اقلا يتموقا ايس الشوربة ذي رمضان وأقلا لازم اتيلي 30 يوم زنق المايدة نالمغرب ذي كل ثدارث ذي لوراس امقران.
الشوربة انلفريك لبلا يتوخذام مليح سالقارض ذالدبشة بغير ادياجذ وقبل تخيارنت لخلاث انلوراس لفرك يحلان مليح أقلا يتيلي ذاوراغ ويقعمر مليح ومن بعد ادسغنتيد انيغ اذكسنتيد سثرعقاي واثحرقنت مليح ومن بعد تتدجانت بغير اذقار واثصفانت ومن بعد رحانت ذي ثاسريث انيغ ذي لماش ناقلا ارقنتيد الوقثاي.
وبغير اذتورحا اذعاوذنت اثسفانت مليح مليح ومن بعد اثفرنت ذي ثبلارين وكل اس بغير اذبونت اذنصبنت اشورة تكسنتيد قيتش واثقرنت ذي المرق وثقرانغ الحاجة فتيحة بلي تكسنتيد ازيل نالكاس نالتاي ذازقن سيس وشياي يتموقا حسب لعبا اقلا هذمغربن بشام اتفياش.
وبشام اديرق المرق نالشوربة يحلى مليح سيرتو لعوايل نلوراس تقنت ديما بغير اذكمل رمضان لازم استخير لحرور انس اقلا حلان مليح ايذ نالقارص ذالدبشة تقديت نالمال خاطر الشوربة نالفريك ثحلا مليح نأكسوم نالمال خاطر يتوتشاش القو يحلا.
وثقرانغ الحاجة فتيحة بلي الشوربة ثتموقا غير سالبصل ذالطماطم و ثيشرث والفلفل ولحرور ولفريك واكسوم، والبطاا اثتيليش ذيس طول خاطر المرق نالشوربة يتيلي ديما يخثر وبغير اتيلي ذيس البطاطا يتولى ذالمرق نالخوضر يخطا ذالشوربة اقلا ثتموقا حتى إقمريضن.