بوقالات10

فريدة‮ صابونجي طلبت من ربي ثلاث أمور نروحلها ولا عندي تجي، الصيام والصلاة ويقولو يا فريدة روحي حجي، رديت بيني وبين روحي.. (بوه عليا بوه) أمالا نحبّس الفن ومن بعد شكون عليا يفاجي، أنا فنانة كبيرة وعمري ما كنت راقدة ونمونجي.. سمعت صوت بعيد ينصحني ويقول (ما تطمعيش في ليام لخرين‮ يا‮ صابونجي‮)!‬
*
عامر‮ بهلول
*
رشيت باب العتبة وطلبت يا ربي ليتيمة نتاعنا تلقى الحلول، قالولي راك تتمنى الشي الصعيب والحال الأول ما يتحوّل ولا يزول، قلتهم عندي حلّ واحد جربوه ومن بعد ردّولي القول.. سألوني واش هو..رديت وقلت.. واش رايكم نبيعوها لعامر بهلول!
*
*
جمال‮ بن‮ علي
*
جمعت الناس ووقفتهم شهود على الزمان المرّ والحلوّ، قلتهم يا درى واش تخبّرو الناس ولا مازالكم عايشين في نفس الجوّ، قالولي قدّام ما تهدر معانا أنت صديق ولا عدوّ، جاوبتهم أنا ولد الشروق زمان وديما في العلوّ، واللي توحشني اليوم يروح يتفرجني (في دائرة الضوّ)!
*
*
أمين‮ الزاوي
*
أيامي تصعاب ومحنتي تزيد كي نعرف بلي الكتاب راهو ينقاس، شفت هنا ولا لهيه بقيت حاير في الناس، المكتبة الوطنية رجعت حمل كبير وسرّها ما ينداس، يا العالي مولانا ردّني وزير نحلّ المشاكل ولا رجعني نقدّم حصة أقواس!
*
*
ربيعة‮ جلطي
*
صغيرة في العمر كبيرة في العقل هكذا غنى عليا جلطي، نكتب ونشعر، وفي الوعدات والزردات الثقافية ما نراطي، اللي قال كاين ثقافة بلا بيا في البلاد راسو ماشي مرفوع وإنسان واطي، أنا هي (المخيّر نتاع المخير).. وعلى حبيبي أمين برك نفوطي!