بوقالات15

خديجة‮ بن‮ قنة خرجت بدر البدور قالولها ماشاء الله راكي منورة بالحجاب، زعفت وقالت واش قصة هاذو اللي انقلبوا عليا وما وليت منهم نتحاب، ردوا عليها قصتهم قصة وبليتهم البلية.. أما انتيا راكي غالطة دنيتك زهات أكثر وتعمرت بلحباب!
عبد‮ القادر‮ عياض
نجمة ضوّاية طلت في الصحرا بالصباح الباكر، نادت عليا وقالت.. ليتيمة ما خرجت عليك يا ابني ولا راك ناكر، رديت وقلت بصح هوما اللي خرجوني من الغرقة وحاسي الرمل وحاسي مسعود والفقاقر، غابت النجمة بعدما قالت.. إذا راك حاب ترجع.. نرجعك.. وإلاّ سقم روحك يا عبد القادر‮!‬
زهية‮ بن‮ عروس
ليلة البارح نمت بكري وناديت الفانوس، وقلت هذا رمضان وعواشير وأنا نستنى ليلة القدر تجيني وتهنيني في منامي من الكابوس، سقسوني وقالوا يا زهية واش تتمني.. راكي حابة نزيدولك في الفلوس، قالت لالا، مجلس الأمة يقلع الغمة ويقضي على كل وجه عبوس.. راني متمنية برك نولّي‮ صغيرة‮ وندخل‮ الحكومة‮ وزيرة‮... ويفرح‮ بيا‮ الرايس‮ كي‮ لعروس‮!
بلال‮ العربي
ناس زمان قالو.. اللي حبك حبو واللي ما يحبك ما تسال عليه، أنا درت برايهم وخرجت من بلادي نحوّس على حبابي وعلى زهري ومّاليه، بصح وليت هايم بين قناة وقناة هذا يجيبني وهذا يردني لهيه، قلت ناس زمان يقولو تاني.. اللي ما تقدرش عليه واش داك ليه!
لخضر‮ بريش
آه يا زماني آه، اللي عطيتو من لحمي طلبتو قالي ماعنديش، واللي سكنتو بيتي سنين وسنين، عرضت روحي عندو قالي ما تجيش، واللي حبيتو من قلبي طعني في ظهري وقالي ما تزعفيش، بصح غلطتي أنا اللي سمنتلو دجاجو وخليت دجاجي بلا ريش، ربيتو عندي معلق رياضي ورجع عندهم يسمّوه الكابتن‮ لخضر‮ بريش‮!‬