طالب أم عاشق ؟؟

محاولة لتصوير واقع الطالب الجزائري اليوم

دخلت الجامعة و في بالي نقرا و بالدراسة نكون ضاوي مستقبل
في أحلامي ربيت حلم الدكتورا و الإرادة لبستها طامع ما نفشل
بصح ملي شت في أول نظرا وحدة من لبنات جاية تتمريل
أنا عقلي طار ما عادش يقرا ونسيت دروسي ماعدتش نعقل
بان الحب و ضاع حلم الدكتورا من عينيها كيف ذا الراي تبدل
تدرس كل نهار وأنا في حيرا دهشتها ما بغات من الخاطر تنزل
الزين بلا بيها و الله مايصرا حتى الجامعة بلا بيها تتمل
نديها بذراع ما هيشي غدرا غي هي في البال بيها نتغزل
شفنا من يخطب في وحدة تقرا من بين شروطو لازم تبطل
و أنا شروطي ليك يا طفلة عشرا اتقلشي و قراي في الشرط اللول
و ديريني انا هو الدكتورا و نخرجو لزوج دار المستقبل
و داويلي لجراح من حبك نبرا و في قلبك خلي نغيس و نتجول
و زيديلي عينيك غي فيهم نقرا نقرا كل علوم محال نبطل
و كوني في لبنات أنتيا أميرة و قوليلهم مازال في قلبي لفحل
شاعر في الملحون هدرتو حرا غرسني في لشعار وردة ما تذبل
و بانيلي ديما كي مثل القمرا اذا جيت حزين على حبك نسأل
و نبقى نفتخر بوحدة دكتورة تقريني في الحب قراية ما تكمل
نكونو للعشاق بسيرتنا عبرا و للطلاب شكون يبني مستقبل
راه الحب صعيب في وسطو جمرا و اللي سكنو حب من عقلو يهبل
أنا قريت اعوام ومازالني نقرا و من حيلة لبنات ما لاقيت الحل
اقرا في التفسير في ذيك السورا في سورة يوسف قرآن منزل
كيدهن عظيم ما فيهش هدرا و اللي ركب هواه مواجو ما تسهل
مقدود يوسف