والفت على الشمس

شعر شعبي

محمد مقراني من فحول الشعر الشعبي في تيسمسيلت ،كثير ماء الشعر كما يقولون ، وجدت هذه القصيدة مكتوبة بخط يده ، رحم الله شاعرنا وأسكنه فسيح جنانه.
والفت على الشمس في باب الليسي نصبرلها غير ترضى نصيرة
سلبتني راني مهول يا ناسي مانهدر للناس ما نسمع هدرة
وتلف عرفي يا الخو رحت نسقسي حتى قمت على وكر ذيك الحرة
نخلة نبتت في هوا وارسنيسي يسقيها ريح البحر مع الصحرة
تطوال وتخضار بغصنها قاسي رواها برد الجبل دايم خضرة
قلتلها يا غافلة كان اتحسي ريح غرامك شعلت فيا جمرة
حتمت عليك يامرا ذوقي كاسي حتى تعرفي شتى فيه امرارة
هذا قلبك هكذا هو عاصي وراني غير انا نصاول في حجرة
راح معاك السعد وبقالي نحسي والقسمة جات فيك وانت حقارة
يا من صابك شيخ يشرحلي درسي وجهك وعينيك ليا سبورة
نقرا عندك علم دوخلي راسي علم الحب الي اجحدتيه آ عدرة
ولا رفيق على يماني في كرسي من غير اكتابات في كفك نقرا
اسمك بيه الفال طابع كراسي سيف ويقسم قلب وعليهم زهرة
وحروف اسمك جاو في العد اخماسي عد اصباعك كل حرف بإشارة
من صابك انت العروسة في عرسي ونقول انا سعد قلبي بالسمرة
مقسى ذالمكتوب قوى تكداسي والغريب مع الحوال الغرارة
حتى بقيت وحيد في بحري راسي والا هي غوصت لبحور اخرى
قلتلها ياعذاب قلبي وهواسي خليتيلي غي المرسم والمارة
ايلا راكي ناسية ماني ناسي كان نسيت الحب نذكر الغدرة
لبستك ثوب الوفا ذاك الباسي وعريتيني بالخدع يا غدارة
ثوب الفاني مايعري مايكسي والباقي ثوب الوفا شان وسترة
عييت انراود فيك وتلف قنباصي ضيعت ايامي وراحت اخسارة
ياشمس شرقتي بضيك تبقصي اغربتي وامشى اليل على الحرة
راه سبع هول الظلام على نفسي بعد افراقك صار فيا واش اصرا
نقلها : أبو محمد طه ياسين جامعة تيسمسيلت