فتاوى الكيوي والاناناس

زعفت حتى طلع كل بترول حاسي مسعود إلى رأسي وطلبت بعدها غلام الله على الهاتف وما أن عرف صوتي حتى تحجج بأنه مشغول وليس عنده وقت حتى يتكلم معي ولكني قلت له مانشدكش حبيت نقول زوج كلمات راهم حاصلين في قرجومتي ونخليك ...
شوف يا وزير الدين يا تقدر على روحك يا ماتقدرش..واش هذه التبهدايل اللي راهي صارية عندك؟ زوج جوامع ماقدرتش عليهم؟
رد بخنقة...أشكون قالك ما رانيش قادر...ماراكيش تقراي البيانات هذا مور هذا
قاطعته ...يا حصراه والأخر تاع البارح اللي هدر على الفتوى راني عارفة حقا واش تقصد بالفتوى المستوردة ...يعني مستوردة كما الكيوي والاناناس واللحم تاع الهند؟
أواه يا غلام الله في وقتك فسدت الحالة و ثارت الدنيا طاق على من طاق وكل يوم عندك مشكلة واقيلا عديانك بزاف؟
غضب من جديد من قضية الاستيراد هذه وقال راكي تشوفي فيا بزناس واقيلا باش تحكيلي على الأناناس والدلاع؟
جاوبته ..ماكاش بزنسة رابحة أكثر من البزنسة فالدين ثم اشكون استعمل مصطلح اقتصادي أنت اللي قلت استيراد وأنا نزيدلك التصدير من عندي هيا ما تزعفش..بالصح أنقولك الصح الصح والله حوالك ما تعجبش
قال ..المهم أنا نعجب بوتفليقة و أنتوما موتو يا شعب الهم
قلت صحيح بوتفليقة راك عاجبو بدليل أخر تبديل ما نحاكش و ممكن التعديل الجاي ثاني ما ينحيكش يرم بوط وين جاي الطالب تاعك؟
انفجر وقال ..طالبي صحيح جايبو من برا فهمت علاش منعت عليكم الاستيراد الديني باش نبروفيتي وحدي من الخبرة تاعهم يا خي شعب يا خي تعسوا كلش !