همز ولمز واللازم منه..

السياسيون عندنا لا يحترمون بعضهم ولا يتوانون لحظة في غيبة أحدهم ولو كذبا وزورا وحتى يجتمعون فيما بينهم مضطرين طبعا لا يكفون عن الهمز واللمز.. وحضورهم الجماعي للقاء صاحب الشأن العظيم جعلهم يمارسون هذه الهواية علنية دون حشمة.
قال عمار غول المستأسد هذه الأيام لخليدة الروجية.. ياخي سلامات ما كان والو بعد الفضيحة تاع عيد الاستقلال؟
احمّر وجه خليدة حتى صار مثل حبة طوماطيش وجاوبته بغضب.. شوف روحك قبل يا واحد الثاثة.
قهقه غول في وجهها وقال لها.. تعلمت هذا منك يا عزيزتي. أنت السباقة وأنا تبعتك.. إلى راكي تحكي على حبيبي سلطاني أنا وياه متفاهمين ورانا نطبقو فالأدوار تاعنا ورانا سمن على عسل ماشي كما أنت والسعيد اللي كليتي راسو.
اغتاظت الروجية من كلام الغول وتوجهت بكلامها لسلطاني المقرفص في زاوية القاعة واش ياسي الخوانجي ما تحكمش فالغول تاعك؟
جاوبها أبو جرة وهو يقلب حبات السبحة في يده وقال لها.. الغول عندو ماليه خلاص خرج من طوعي وراكم كامل علابالكم.. ولا الغول تاع السلطة.
أطلق أويحيى ضحكة كبيرة وقال بسخرية.. أشغل أنت ماشي تاع السلطة.. أيا بركاونا من التمسخير.. لي يسمعكم يقول بلي كاش واحد راه يخدم من راسو؟
اعتلى صور جاب الله من هناك.. يا ربنا ثبت أقدامنا على القوم الكافرين وانصرنا عنهم واكسر شوكتهم في ليالي رمضان المفترضة.
سمعته لويزة التي لا تترك كلاما في نفسها فقالت له.. واش جماعة قطر قالولك ادعي علينا؟ أشكون هاذ القوم الكافرين يا بوشاشية؟
قال لها بحدة.. مارانيش نهدر معاك أنا نهدر غير مع الرجال مانهدرش مع النساء.
ضربت لويزة كفا بكف وسخرت منه قائلة.. وين راهم الرجال يا السي الراجل؟ عمبالك لي يلبس سروال راجل؟ راك غالط وأنا خير منك وعشرة منك.
تدخل أويحيى لفض النزاع وصرخ قائلا... أيا بركاونا طلعو المستوى لوكان يسمعنا صاحب الشأن العظيم والله والله ما يخلي واحد فيكم ياخي قوم ياخي.