بولحية يا بولحية.. !

تصريحات سلال حول جماعة بولحية الذين رحب بهم وقالهم عسلامة معنا في وطن واحد جعلت علي بلحاج يبلق عينيه ويتصل به ..
الو واش راك السي سلال ؟
رد سلال اشكون هذا اللي ينوض فيا على الخمسة تاع الصبح ؟
تنحنح علي بلحاج وقال ..انا علي بولحية راني نوض فيك تصلي الفجر ياخي قلت رانا ولينا خاوة في وطن واحد ولالا ؟
نهض سلال من سريره مسرعا وقال ..أنا قلت رانا خاوة ؟
رد عليه علي بلحاج هكذا سمعتك تهدر في معسكر
قهقه سلال عاليا وقال ...هذاك كلام تاع سياسة يا حبيبي ماشي كامل واش تسمع صح أما الحقيقة شيء آخر
قال علي بلحاج..يعني تقصد بلي مارناش خاوة وحقوقنا السياسية ما ندوهاش وفوق هذا كله كلامك كان تبلعيط فقط ؟
رد سلال ساخرا..واش من حقوق يا بولحية ؟ روح حفف لحيتك ونحي العراقية والقميص وزيد ساند بوتفليقة لعهدة ابدية من بعد نشوفو قضية الحقوق هذه.
صرخ علي بلحاج في وجهه .. والله تحط الجنة في يدي مانحيش اللحية ثم انتم كذابين وأفاقين وكل كلامك لا أساس له من الصحة.
قال سلال هذه هي السياسة يا حبيبي وأنت تعرفها خير مني .
حوقل بلحاج وبسمل وضاقت به الدنيا عن آخرها ثم قال له بصوت صارخ الله لا تربحكم يا سلطة الكرطون لكن حقوقنا سنأخذها لمحال وما تعيا تشوفني نحكم الدزاير.
قهقه سلال عاليا وقال ...واش هذا الهبال كلكم تريدون حكم الدزاير غير انا لي راني حاكم القايطة ونغيط ..أنت والفلوس والحنونة و
قاطعه بلحاج ..وبوتفليقة نسيتو هل ما تفعله لأجله يستاهلو؟ انت بداخلك تعرف أنه مايستاهلش ومع ذلك تكذب على الشعب
اقفل سلال السماعة وصرخ عاليا ...هبلتوني روحو للجحيم انت وبوتفليقة وكلكم ثم استدرك قائلا ..قلت بوتفليقة ؟ لالا بوتفليقة لا آه أخاف من زلات اللسان التي تجرني الى الهاوية.