امجاهد اطفيش محمد بن ابراهيم

اطفيش محمد اقن ستروى نات ازجن ايلولد اسقس 1919 اسماس نتقراولة سي سليمان دقن سالتجار امقرانان نوغرم انوهران.
اسقس 1955 اسوتر عبان رمضان سمفدي زكريا اوسدج نقن وجرو تم نالقبة مان يتوغ يكرم دس عبان رمضان اسوتر اسموفدي زكرياء باش اسيوش اسم نقن ستوات دس الثقة دالاخلاص باش ادسجور لمور نالثورة اغرم نوهران اتشلان غفس ادقان جار التجار دمجاهدان اتوغان الولايات ندسان نوغرم نوهران.
مفدي زكرياء اخير محمد اطفيش اقن سالتجار انوهران باش اديلي اسجورى لمور نتقراولة يبدى سقت الخلية اوجرو ندرمان دالتبرعات دالاشتراكات مع اسوض انوزال دفغولان تمجورتس غال وورير مع اسدج نالاتصالات جار التجار انوهران دتيارت دبلعباس دمناوت تمو تغربيت.
يور نافريل اسقس 1956 اتوطف اطفيش فوس نالعسكر نفرنسا اماس نوهران يد اجار 45 نالتجار انوات ديغلب امناضلان اخدمان يد اطفيش. تموسني تحكم غفس ادخلص 100 الف فرنك نختن .
دفر اتوسيب سالحبس نوهران اسبدل قاع الولاية يقضع غال البليدة مان يملاقة يد امقران نالناحية جلول ملائكة توغان اتملاقان تحنوت نترشين محمد بن يحي البليدة دتحنوت انبهون محمد بن ابراهيم اونسق ادوخدام السرية اجرو نريال ادوزان انوزال غال اورران.
اسقس 1957 وسان نالاضراب انتام انوسان العسكر نفرنسا زيران تحنوتس وهران اقارن بل الان جروان دس امجاهدان اسوطانتد توورت نتحنوت سفغولان اوكران قاع ايتليس اماشي يلا.
اتوطف لحبوسات جار وهران ادبلعباس انجم ادرول سالحبس يولي غال وورير اعاود اتوطف يقم اتمرقاد لحبوسات ال تمنوننت ندزير.
وني دقن سيغلب انتوات اخدمان بلا ما ادسان حد غير يوش امقران سبلان اماننسان دتمدورتنسان اوحرر ندزير سالاستعمار ادوس يدجور ادس.