تحنونت نالحاج عمر جلمامي انشان نوجرو نمقرانان نتقراولة

تحنوت نعمر جلمامي ادوسين اغلاد نمصطفى والي اماس ندزير دقت ستحونا الانت اداتفانت امزروي انغ التاريخ ندزير دقن ونشان دالشاهد نوخدام نتوات دعاون نودموان نتقراولة انغ الثورة ندزير السرية بلا ما ادسان حد غال اماروا.
تحنوت توغ دنشان نوملاقة نمقرانان نالثورة جار 1962-1954 توغ جرون دس ادموان دمقرانان نوسقم نالثورة تارين دس تكرداوين اتمفاهامن سالمخططات اوحارب نفرنسا قاع لوامر تفغند ستحنوت اتقم دقن السرال اسن تمنوننت ندزير، توغان خدمان دس البطاقات نسماون نالثورة اوتاف دوفوغ بلا ما اتفاق فرنسا دالعسكرس سسماون انغ امجاهدان اتوغان دجورن سالبطاقات امزورات اماشي اضران ازان نقت تكيردة توسانياسمقرنان نالعسكر نفرنسا مزورة اونفد نالاعدام فقن سالغلاة نالمعمرين اقارناس فروجي اتوحكم غفس سالاعدام ال امبعد فاقند بل الامر نالاعدام اتوزور فرنسا تقم دوخ دسات تواغيت دالدهات نمجاهدان.
الطابع انغ الخاتم نالجنرال ماسي دبيجار دمناو امقرنان نالعسكر نفرنسا توغان تسانياناسسان امجاهدان البطاقات دلباسبورات دوسماح اوتاف دوفوغ غال مناوت تمو اماس نتوامان بلا ما ادفاقان.
الطوابع توغان فوس نجلمامي الحاج عمر باب نالسرية دلمان اوشين دس امقرنان نالثورة الثقة مان توغان تملاقان تحنوتس ن ان سعد دحلب ددموان نترباعت نوسقم نالعسكر اولين اتوغان توجدان الاتفاقية نافيان اماس نتحنوت. بعد تمنوننت قاع ادموان اتوغان تونس ادوالنسان غال دزير قضعان طول غال تحنونت نجلمامي سسان بن خدة سعد دحلب الشرقي ابراهيم الهاشمي، امضان 15 نودموان اقضعان غال تحنوت نجلمامي تفكران وسان ندوملاقة دمساولان جروان دسات اقت الطابلة تبازانت توغان تارين دس قاع لمور نتقراولة اش اقن اولسين سوضضن اتوغ اتاسد غال تحنوت نجلمامي مان اسشان السرية نتوات ددباب اتوغان تامنان سيوش امقران .