اضراب عن اللحوم

ديوان الصالحين

"السي لقرع بوكريشة" مباشرة بعد توليه رئاسة البلدية، واستلامه مقاليد الحكم، بدأت المشاكل تتساقط عليه من كل حدب وصوب، وهذه المرة وصله خبر امتناع أهل الدشرة عن اقتناء أو تناول اللحوم التي استوردتها البلدية من الهند، فغضب كثيرا، نظرا للأموال الباهظة التي انفقها من أجل استلامها، فأرسل " البرّاح " لكي يجمع سكان الدشرة في ساحة البلدية .
* البراح
يا ديوان الصالحين يا ديوان الصالحين
يا ديوان الصالحين على ربي والوالدين
يا سكان صبح الخير الله غالب واش ندير
نعلمكم بلي المير استدعاكم كاملين
راه سمع بلي اجماعة راهم خرجوا على الطاعة
فالدشرة طلقوا اشاعة يخوفوا فالمواطنين
قالك اللحم تاع الهند راهو حرام وفيه المرض
لأنو جانا من الأرض اديال الماجوسيين
كانوا يعبدوا البقرة وكي شرفت ولات عرة
جابوهالنا للدشرة باش نهملوا كاملين
كليتوا ولا لهلا كليتو أكرهتو ولا حبيتوا
غير اللحم نتاع " جانيتو " الي راكم شاريين
بركانا من هاذ السمير كليتو اللحم نتاع لحمير
وكليتو لحم الخنزير بلا ما كنتوا فايقين
وكي جبنالكم هاذ الهبرة وليتوا تديروا فالهدرة
وتخوفوا فناس الدشرة رجعوا الكل موسوسين
هاذي السلعة واش تحبو واذا كان قلوبنا هربو
نعاودوا نقلبوها جومبو كيما رانا موالفين
يا ديوان الصالحين يا ديوان الصالحين
يا ديوان الحاضرين ايبلغوا الغايبين .
*
الديسكور :
بعدما انتهى " البرّاح " من جمع السكان في ساحة البلدية، خرج " السي بوكريشة " حاملا في يده مكبر الصوت، وراح يخطب في أهل الدشرة :
السلام عليكم إخواني المواطنين، أخواتي المواطنات... الفاطنين والفاطنات، يا الي راكم تعملوا فالشوشرة وتخوّفوا فسكان الدشرة، راه وصلني "الرابور ديطايي" بلي راكم تعملوا فالشكوك حول اللحم نتاع "جانيتو" الي ستوردناه من الهند، واحد جايبهالي "بروفيسور" وراه يقول بلي اللحم فيه أمراض "الساركوزيست" ، (مش "ساركوزي" نتاع فرانسا)، وانما "الساركوسيست" هو مرض الله يحفظنا ، من أخطر الأمراض اللي تقبض "البقر" و "الجواميس" ، جايا من الهند، ولهذا نشوفوا لهنودا يشطحوا وينقزوا وقابضتهم "الفاشفول"، وهاذ المخلوق الي جايبها "بروفيسور" حاسب روحو يعرف خير من "باستور" ، وأنا شخصيا راني "سور" رسلت "الكوطا" الأولى للمعهد نتاع "باستور"، وراه باستور بصم بلي اللحم نتاع "جانيتو" صالح للماكلة، وكذلك كاين جماعة جايبينها علماء وراهم يقولوا بلي هاذ اللحم حرام، و ما يجوزش للماكلة، و راهم يقولوا أولتها ماراناش عارفين اذا ذبحوه والا خنقوه والا صرعوه والا مات مالخلعة أو مالزعاف أو مالقنطة أو أنو مات "مسويسيدي" ولا موت ربي، أو ربما مات كي عرف بلي راه جاي لعندنا للدشرة، وكذلك راهم يقولوا بلي هاذ اللحم، هو نتاع لبقر الي كانوا يعبدوهم فالهند، وقالوا كذلك بلي هاذ البقر كي ذبحوهم، ماقالوش باسم الله ...
شزف "الطرافيك"... وشكون الي يضمن بلي الي راه يصنع "الياهورت" راه يقول بسم الله، والا الي راه يخبز المطلوع راه يقول بسم الله، وشكون يضمنلك بلي اللحم نتاع الدشرة راهم يسموا كي يذبحوه، أو ماراهمش يخنقوه والا يقتلوه بالقنطة، ورانا شفنا كيفاه باعولنا اللحم نتاع "الحمير" وكليناه، وشفنا كذلك كيفاه راهم يربّوا الجاج بالدم المفسوح باه يسمان وكليناه، ولهذا حبيت نعلم ناس الدشرة بأنو هاذ اللحم مشكوك، و أحنا ناكلوه على رقبة "باستور" و على رقبة المستشار نتاع الفتوى فالدشرة، وكذلك على رقبة مستشار التجارة والفلاحة وقمع الغش، وبركانا من هاذ النش وخلوا رمضان يفوت على خير،واللحم نتاع الهند راني جايبو، والي عجبو عجبو ، والي ما عجبوش يقلبها جومبو .
يوميات " بوكريشة "
في هذا الركن نتعرف على " بوكريشة " في حياته الشخصية، وطريقة تعامله بعيدا عن السياسة والميكرفون و الأضواء .
" لحم رمضان "
السي بوكريشة بعد قضائه يوما شاقا من كثرة المشاكل في البلدية، وبعد الخطاب الذي ألقاه على سكان الدشرة بخصوص اللحوم المستوردة من الهند، ها هو يعود الى البيت وهو يحمل كيسا كبيرا على كثفه، فقابلته زوجته "كروشة" عند الباب...
كروشة : واش هاذ " الساشي " يا بوكريشة؟
بوكريشة : هذا اللحم نتاع رمضان، قطعيه وحطيه " فالكونجيلاتور ".
كروشة : واقيلا هاذا هو اللحم نتاع الهند الي راهم يهدروا عليه؟
بوكريشة : وين سمعتي ؟؟؟ سبحان الله نهار كامل وانت فالدار ، منين راكي تجيبي لخبار .
كروشة : قريت " فالجرنال " .
بوكريشة : واش قالوا فالجرنال ؟ ياك ما جبدوش البلدية نتاعنا؟
كروشة : جبدوا البلدية وقالوا بلي السي بوكريشة راه يطمن الناس بلي اللحم نتاع الهند ما فيه حتى مشكلة .
بوكريشة : نقولك الصح الصح؟ راني خايف لا كاش ما يصرى بسكان الدشرة وندي ذنوبهم .
كروشة : هاذ الشي ما راكش متأكد؟
بوكريشة : ولآه أنا " فيترينير " باه نعرف يصلح ولا ما يصلحش؟
كروشة : وجايبهولي للدار؟ حبيت تقتلني في هاذا رمضان .
بوكريشة : سبحان الله لبنادم نهار كامل صايم يعبد في ربي، وكي يأذن المغرب يفطر بالرب نتاع لهنودا .
كروشة : خرجو عليا .. خرجو، والله ما يطيح في فمي .
بوكريشة : ياو أسكتي وخليها " سوكري " هاذا خروف جابوهولي " كادو " من الجلفة .
كروشة : يعني أنت تاكل اللحم تاع الجلفة، والشعب أطبعلوا اللحم تاع الهند؟
بوكريشة : و لآه أنا الي جبت الكباش من الهند؟ عندي لبوابر انا؟
كروشة : بصّح أنت رئيس البلدية، وأنت الي يحاسبك ربي .
بوكريشة : ياو ربي يحاسب " البورطاتور " و " باستور " والي عمل الدستور، والمفتي نتاع " السيكتور " و " سيدي سويت " ، أما أنا راه عالم بلي ما عنديش الصلاحية و راني قير خضرة فوق طعام .
بوكريشة " بوان كوم "
بوكريشة يفتح لكم هذا الفضاء من أجل الإدلاء بآرائكم وطرح أفكاركم وانشغالاتكم، واقتراح المواضيع والأركان التي تهمكم، وكذا مشاركة "السي لقرع" في مشروع الإصلاح والإصلاحية ريثما يعطوه الصلاحية، و من أجل اتصالاتكم يضع تحت تصرفكم بريده الالكتروني: مير بوكريشة عار وباز جيمايل بوان كوم .
" MIRBOUKRICHA@GMAIL . COM "
الرسايل والمسايل :
السلام عليكم يا السي بوكريشة، أنا عبد اللطيف من بومرداس، حبيت نسقسيك ويلا ترجعلنا " فاسيليتي " باش نجيبوا " طونوبيل ".
الرد :باه تديرولي " الكومبرومو " وكي نكون فايت " فالكورتاج ديبلوماتيك " نتاع البلدية تعطلوني، والله قير تبقاو أتطبعوا فالطرولي .
يا السي بوكريشة راكن ورتلنا الشروق، واش عندك مشروع لصحاب " الطوابل " تاع الخضرة الفوضوية كيما يسمونا؟
الرد :الي نقبضو يبيع بدون رخصة نتاع " الروجيستر كوميرس " السلعة تروح " زيزي " وهو نديرو فالحبس نتاع البلدية، على خاطر راكم تعطلوا فالمصلحة العامة وما راكمش تخلصوا " ليزامبو " وما راكمش تخلصوا " التشيمبا ".
يا بوكريشة، لبحر هاذ العام خلاص بكري .
الرد : ماشي لبحر الي خلاص بكري انما الصيف، حسن اللغة نتاعك .
السلام عليكم يا عمي بوكريشة ماشي حرام عليكم واش راكم أتديروا فالشعب الي نتاخب عليكم .
الرد : ها ... الغلطة نتاعكم، لوكان نتخبتوا لوكان راه طلع رئيس بلدية وحدوخر كيما تحبوا نتوما، مادام ضربتوها " بجمانفو " ضربناكم بمثله .
يا بوكريشة، واش رايك فالظاهرة تاع السيوفا ولمواس الي ولات " لامودا " ، وكلمة زوج ينوضوا زوج حومات يضاربوا بيناتهم .
الرد : حوس مليح وشوف لا كان تلقى واحد متزوج أو يخدم رافد سيف او يتدارب .
السلام عليكم يالسي لقرع بوكريشة أنا حقروني فالخدمة وما حبوش يوظفوني، وكل شراه بالمعريفة، وعلاش ما تتكلمش على المعريفة فلبلاد .
الرد : أنا الصلاحيات أنتاعي تحبس فالدشرة برك، والبلاد عندها مولاها، بالنسبة للدشرة راني ندرس في قانون نتاع المعريفة ونخرجوا للضو في هذا رمضان نشا الله .
حبيت نقترح موضوع الزواج الي رجع بستين مليون ولا كثر، والفقير ما يقدرش حتى يتزوج ويجيب مرى، يا لوكان " فاسيليتي " ، واش أتدبر عليا يا السي بوكريشة؟ .
الرد : ندبر عليك جيب وحدة" أوكازيو " .
مسابقة ناس الدشرة
كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها،أو صور غريبة ويريد نشرها في الجريدة للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله.
اللص والقاضي
يحكى أن لصا يرتكب كل شهر جريمة فيحاكم على إثرها ، فسئم القاضي من حضوره إلى المحكمة كل شهر ، فقال له: ألا تستحي من نفسك ، فأنت تأتي إلى هنا كل شهر ، فرد اللص : وأنت يا سيدي لماذا تأتي كل يوم.
ع الرحيم قارة
كشف الكذب
واحد الماني اخترع جهاز قياس الكذب ، و حب يجرب الجهاز راح جاب واحد ياباني واحد انجليزي واحد امريكي أو واحد من تاوعنا، امالا قعد الياباني وقال راني نفكر نعمل مكتبه تطير، زمر الجهاز"كذاب" وحاوزوه، وقعدّوا الانجليزي وقال انا نفكر نعمل حذاء فيه هاتف محمول، فزمر الجهاز " كذاب " حاوزوه، من بعد قعدّوا الامريكي وقال انا نفكر نعمل حذاء يمشي وحدو، زمر الجهاز " كذاب " حاوزوه، قعدّو خونا الجزايري، وقال أنا راني نفكر .. زمر الجهاز " كذاااااب " ، ( ماكانش يفكر ).
عبدو من الجزائر " كذااااااب "
مشكلة معقدة
رجل أوشك أن يلقي بنفسه في البحر لولا أن سمع صوتا يقول له : أيها المجنون قف ...فأيقن انه لن يتمكن من الانتحار بهدوء فتوقف و هو يشاهد ذلك الرجل العجوز يتقدم منه وينهال عليه بعبارات التأنيب على يأسه من رحمة الله ومحاولة الانتحار، فسأله العجوز : ما الذي يدفعك للانتحار يا رجل ؟ فرد عليه قائلا : مشكلة عائلية معقدة.
فقال العجوز : وهل توجد مشكلة دون حل !! ما هذه المشكلة ؟؟
وبدأ الرجل يروي قصته :
تزوجت سيدة أرملة ولها فتاة مراهقة، وعندما بلغت الفتاة سن الرشد رآها أبي فأحبها و تزوجها، فصرت صهرا لأبي كما أن أبي أصبح في مقام زوج ابنتي وأصبحت " حما " لأبي لأن زوجتي حماته، ثم أنجبت زوجتي ولدا مني فأصبح الولد "سلف" أبي.وبما أن ابني هو أخو زوجة أبي، التي هي بمثابة خالتي صار ابني يعد خالي ايضا، وحدث أن وضعت زوجة أبي طفلا يعد أخي من أبي وفي نفس الوقت هو " حفيدي " لأنه حفيد زوجتي من ابنتها وبما أن زوجتي صارت جدة أخي فهي بالتالي جدتي وأنا حفيدها،وهكذا أصبحت أيضا زوج جدتي وحفيدها في الوقت ذاته، ونظرا إلى أنها جدة أخي فانا أصبحت جد أخي وبناءا عليه اكتشفت أنني أصبحت جد نفسي و حفيد نفسي لأنني ...هنا قاطعه الرجل العجوز قائلا : كفى ... كفى ... تعال معي.
فقال الرجل الى أين ؟؟
قال العجوز : لننتحر معا !!
محمد بركات
* الأحول
واحد أحول سجل في الجيش، حطوه في قسم القصف العشوائي .
خالد من المدية
* الرخصة
واحد حابس قالو باباه : يا أبني " البارمي " ماتلي، قالو لولد " بيان سور " نهار كامل وأنت تدور فالزنقة .
ياسمين العاصمة
* باكسثالث
مرة واحد باكستاني تزوج وحدة باكستانية جابو ولد اسمه بكسثالث .
ريم
الديك والدجاجة
الديك قال للدجاجة، أنت كيفاش تستفادي؟ تجيبي البيض والناس ياكلوه، قالتلو كيما أنت تأذن وما تصليش واش تستفاد؟
بونوة سفيان
* لحشايشية
زوج حشايشية كانوا فالمقبرة يتكيفوا ، زدمت عليهم الشرطة، واحد هرب أو واحد حكموه سقساوه واش راك تعمل فالمقبرة، قاللهم طلقت نقضي حاجتي برك ونولي للقبر .
ع اللطيف ش
لحشايشي
واحد حشايشي قال لصاحبو، سبحان الله الانسان كي لبنادم، اذا توفى مات .
فاطمة ز البليدة
" آ دومان "
واحد حابس قال لصاحبو، اسمع واش معنتها " آ دومان "، صاحبو قالو غدوة، قالو لا قولي دركا .
ميدو من الجزائر
قصيدة
الفانية
شيانت ولا بدات تزيان
وركبت أرضها على سماها
النّذل في حربها سيد الفرسان
و الحرّ عاطياتو بقفاها
الجاهل فيها بالهمّة والشّان
والعالم ما لقا سلاك معاها
البخيل تعطيه مالمال أطنان
والكريم شبعة يتمنّاها
من الريح للكافر دارت جنحان
والمومن ممدود نايم في اثراها
أتشعل نيرانها للّي هو عطشان
والرّويان تزيد تصبلو من ماها
الحرّة بايرة تنش الذبان
والفاجرة ألوف تطلب رضاها
لعجايز فالبانكة تعمل لاشان
و الشبيبة الباهية لبحر كلاها
الخاين في سوقها غالي لثمان
والمخلص بصلة ما يسواها
الزور في حكمها ولاّ برهان
و الحقّ ما عندو قيمة فاقضاها
دنيا غرارة و خادمها شيطان
سبحانه ربي، الفانية سمّاها
عبد الوهاب طيباني،
سيدي عقية - بسكرة
البراح
يا ديوان الصالحين يا ديوان الصالحين
يا ديوان الصالحين على ربي والوالدين
* يا سكان صبح الخير الله غالب واش ندير
* نعلمكم بلي المدير استدعاكم كاملين
* راه سمع بلي اجماعة راهم خرجوا على الطاعة
* فالدشرة طلقوا اشاعة يخوفوا فالمواطنين
* قالك اللحم تاع الهند راهو حرام وفيه المرض
* لأنو جانا من الأرض اديال الماجوسيين
* كانوا يعبدوا البقرة وكي شرفت ولات عرة
* جابوهالنا للدشرة باش نهملوا كاملين
* كليتوا ولا لهلا كليتو أكرهتو ولا حبيتوا
* غير اللحم نتاع " جانيتو " الي راكم شاريين
* بركانا من هاذ السمير كليتو اللحم نتاع لحمير
* وكليتو لحم الخنزير بلا ما كنتوا فايقين
* وكي جبنالكم هاذ الهبرة وليتوا تديروا فالهدرة
* وتخوفوا فناس الدشرة رجعوا الكل موسوسين
* هاذي السلعة واش تحبو واذا كان قلوبنا هربو
* نعاودوا نقلبوها جومبو كيما رانا موالفين
* يا ديوان الصالحين يا ديوان الصالحين
* يا ديوان الحاضرين ايبلغوا الغايبين .