باسم الله بديت 22

- الشمعة يا الشمعة يا الشمعة الضواية لو كان نعرف وشبيك نمسح هذيك الدمعة من خذيك ونرد وجهك مرايا يا ربي يا معبود اقبل دعاية يرجع لي زهو الزمان ويعيا الحبيب قاعد معايا.
- اطلعت للسطح وفرشت زربية حرقست حرقوس الذهب حتى لوذني افرحي يا يما سعدي ولا ليا نستشفى فالعدو كيما استشفى فيا.
- فاطمة يا فطوم ويمن ما تكوني نرسلك مرسول اذا سكنتي السماء نديرلك عصفور والا سكني البحر نديرلك عواكة والا سكنت القبور حسيبك مولانا.
- علاش يا لالة التخمام رحمة الله واسعة وكبيرة لوكان جلت بالكلام نتحدثو ونعطوك تدبيرة بصح كل شيء بالمكتوب ويعيا والخير يبان وتزول عليك الهموم وتروح الحيرة.
- اعلميني لا لالا نهار تروحي لحمامك نرفدلك السلة ونمسي قدامك ندور على يمينك ونزيد على شمالك ونبقى لك خديم وطايع على طول زمانك.
- السفينة الي جات باش نلاقيها بالوز والسكر نرش سواريها والورد والياسمين نهديه للركاب اللي فيها وبالمسك والعنبر نعطر ماليها ونطلب من ربي الكريم للحج يديها.
- يالشمس الضوايا يا العالية في سماك لوكان صبتك مرايا ونشوف وجهي بضواك يعود ربحي وغنايا ويقسم سعدي ذاك.
- في الساقية الما يجري والحشيبش نابت متخالف بالشوك مليت حجري من هذاك لراي التالف كي غبت وغاب زهري زلا الي يجيني خايف.
- اقعدت تحت النخلة قالولي دقلة نور جات ادور طلعت فوق النخلة وبالعسل رشيت الصور معاه المعيشة تحلى حبيبي الساكن في القصور.