الاحتراف فالدشرة

تابعنا في عدد سابق كيف قرر السي بوكريشة رئيس البلدية انشاء فريق الدشرة لكرة القدم، وكيف صرف عليه الكثير من الأموال ليصرف به نظر السكان عن التخلف الذي يعانونه، والتأخر الذي تعرفه المشاريع التنموية بالبلدية، والظاهر بأن خطته قد نجحت والسكان استحسنوا الفكرة أو بالأحرى (ابتلعوها) وأصبحوا مدمنين على كرة القدم، فارتأى السي بوكريشة التعمق أكثر في المشروع والانتقال نحو عالم الاحتراف؟! ، واكتفى بإرسال البراح إلى الدشرة ليحسس الناس بالمشروع، بينما قرر هو التفرغ لمهمة الاستماع للسكان وحل مشاكلهم المتراكمة على مكتبه، والابتعاد من اليوم فصاعدا عن لغة الخطاب والتطبيع، والانتقال إلى لغة الفعل والتطبيق .
البرّاح
يا ديوان الصالحين يا ديوان الصالحين
يا ديوان الصالحين على ربي والوالدين
قررنا فدشرة الكاف باه ندخلوا الاحتراف
أو خصصنالو غلاف بالملاير والملايين
باش يولي منا وهكا كل نادي عندو شريكة
ويشوف على من يتكى ويحوس مموليين
نوادي كرة القدم تولي شركة بالأسهم
حب يقول يدبروا راسهم صايي حنايا خاطيين
كل نادي يدبر سوسييتي يخدموا بالكومبليسيتي
هو يدير البوبليسيتي وهي تمدلو لملايين
والي عندو راس المال يولي يسير الفوطبال
كيما يديروا فالريال وارسونال وكاملين
الي موالف يشري ويبيع ايولي يربح لجميع
والي ما يعرفش يضيع كيما ضاعوا اللوليين
والجوار يعود يتباع على حساب وش عندو فلكراع
وين يشروه يروح ذراع كي يقرروا المسيرين
ومنا وهكا اتعود تسمع النادي الي عندو يطلع
باش يلعب أو يتمتع فالدرجات اللولين
والي ما عندوش يقلّع للدوزيام ديفيزيو يطبّع
والا تلقاه يشارع كي تراكم عليه الدين
الدين تاع البلدية الي تسلفو للأندية
باه يبنوا بيه الأرضية ويشروا بيه اللاعبين
والي حصل منهم فالدين يحط ( آفوندر ) فاللاعبين
ويبيعهم لوحدوخرين الي راهم قادرين
يا ديوان الصالحين يا ديوان الصالحين
يا ديوان الصالحين على ربي والوالدين
مسابقة ناس الدشرة
تحت الرعاية السامية لتخامة رئيس المزلش الشعبي البلدي السي لقرع بوكريشة، وبرعاية جريدة الشروق اليومي، نعلم كل سكان الدشرة وقراء الجريدة أن كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة يريد نشرها في الجريدة أو الإجابة عن السؤال بالمسابقة الفكرية، والفوز بجائزة رئيس البلدية التي ستسلم نهاية شهر رمضان للفائزين الأربع وأولهم صاحب أو صاحبة أكثر نسبة من المنشورات، ثم يليه صاحب أو صاحبة أحسن مشاركة، ثم صاحب أو صاحبة أكثر قدر من الإجابات الصحيحة، وفي الأخير صاحب أو صاحبة الحظ في عملية القرعة التي ستجرى نهاية رمضان بحضور ( شيخ الجامع ) .
من أجل التواصل والمشاركة السي بوكريشة يضع تحت تصرفكم وسائل الاتصال المدونة أسفله .
النكت
هارلي دافيد سون
كاين واحد القبيلة متخلفين ما يعرفوا حتى وسيلة مواصلات، واحد منهم شرى موطو (دراجة نارية) من نوع (هارلي دافيد سون) كي لحق لعندهم دارو بيه كامل وخلعوا واش هاذي الحية، واحد فيهم قالو: أسمع كي تولد ما تنسانيش..
حسان من اسطاوالي
الحفرة
كانت بلدية مسؤوليها كلهم أغبياء، وكانت فيها حفرة كل يوم واحد يطيح فيها، عملوا مزلش باه يلقاو حل لهذه الحفرة، قاللهم الأول يا جماعة نحطوا سيارة اسعاف قدام الحفره باش المصابين ينتقلوا بسرعة، قام الثاني قال لالا نبنو مستشفى قدام الحفرة أحسن، وقف رئيس البلدية قاللهم كلكم أغبياء، علاش ماشي نردموا هذه الحفرة ونحفر واحدة أخرى قدام المستشفى ...
نورة بلقاسمي
رونالدو
واحد حابس كان يشوف فالماتش تاع الجزاير سمع المعلق قال : خطأ لصالح غزال، قال لصاحبو غزال وسمو عبد القادر ولا صالح؟
نورة بلقاسمي
الحفاف
قالك واحد راح عند الحفاف ايا كي حففلو وستيكاه قالو ماعنديش الدراهم ايا الحفاف قالو امالا تقعد هنا حتى تتغوفل .
بيدرو / المسيلة
البيضة
واحد نهار واحد الراجل شرى جاجة تبيض بيض بلا قشرة، كي دار تحاليل لقاها تشرب هندل شولدرز ضد القشرة .
نور الدين مالكاليتوس
التلميذ
سأل أستاذ تلميذه عن أكثر شيء يعجبه في المدرسة فقال التلميذ : الجرس يا أستاذ
قرباب ميلود من سطيف
الصائم
اتصل مستمع بالإذاعة فطلب منه المنشط اختيار ما يريد سماعه، فقال الصائم : مقطع من آذان المغرب .
سهام من تيزي وزو
المحشش
واح محشش سقساه وليدو قالو بابا كيفاه نعرفوا واحد بلي راه محشش، قالو شوف يا وليدي، المحشش هاذوك الزوج شجرات يشوفهم ربعة، قالو الطفل بصح كاين شجرة وحدة يا بابا .
علاء غربي
البورصة
واحد من كثر ما خسر بالبورصة طاح مريض هزوه عند الدكتور، كي شافو الدكتور وكضف عليه قالو، يوه الضغط تاعك راه وصل سبعين، قالو بيع بيع وناض يجري ...
علاء غربي
اللوطو
قالك واحد ربح فاللوطو خمس ميات مليون، قالك والله نشارجيها كامل فالتلفون، كي عمر الكريدي، قالتلو تاع الخدمات، يبقى رصيدك إلى أن تقوم الساعة .
علاء غربي
أنا وعمي
قال القاضي للمتهم : ماذا تعمل؟
أجاب المتهم : قبل الظهر لا عمل لي، وبعد الظهر مع عمي .
فقال القاضي : وماذا يعمل عمك؟
أجاب المتهم : قبل الظهر يعمل معي، وبعد الظهرلا يعمل
علاء غربي
تعليم الأبناء
واحد الطفل سأل باباه قالو واش هي ناطحة السحاب؟، قالو باباه والله ما علابالي، زاد قالو واش هي النازا؟ قالو والله ما نعرف؟ زاد سقساه وين جاي البحر الميت؟ قالو والله ما نكذب عليك، نطقت يماه قالتلو: اسكت يا ولد راك قلقت باباك، قاللها راجلها: لالا خليه يسقسي باه يتعلم .
سارة من الجزائر
الناموس
قالك زوج ناموسات كانوا فالمستشفى تحت العناية المركزة، وحدة قالت لصحبتها : واقيلا ( لفليت ) قالتلها لالا بليغة .
عدلان من العاصمة
غباء اليهود
من سجن الاحتلال الإسرائيلي، أراد أسير فلسطيني مساعدة والده الشيخ الكبير في حرث الأرض، فبعث إليه رسالة كتب له فيها لاتحرث الأرض إني أدفن فيها أسلحة خطيرة، ما إن قرأ الاسرئليون الصهاينة الرسالة حتى أسرعوا وقلّبوا الأرض شبرا شبرا وحرثوها.
محمد القيم من الجزائر
علاش تحلف؟
قال القاضي : والله الي يعمل الضوضاء والحس والهاراج غير نخرجو من القاعة، ناض المتهم، وقالو علاش تحلف يا سيد القاضي؟ وبدى يصفق ويزغرت .
سارة من الجزائر
المسابقة الفكرية
سؤال اليوم : ما هي أشهر أنواع الخبز المعروضة على أرصفة الدشرة خلال شهر رمضان؟
حظ سعيد ...
بوكريشة بوان كوم
كل من يريد مراسلة السي بوكريشة رئيس المزلش الشعبي البلدي، بدون بروطوكولات أو بيرقراطية وبدون انتظار أو ذهاب وإياب أو معريفة أو رشوة، السي بوكريشة يضع تحت تصرفكم بريده الالكتروني ورقم هاتفه المدونين أسفل الصفحة وهو في انتظار (الرسايل والمسايل) ويعدكم (بالبوان كوم ) وليس ( النات كوم ) .
الرسايل والمسايل
رمضان
ياسي بوكريشة علاه رمضان تاع السنة جاز بالخف والناس كامل كانت متخوّفة من السخانة تاع أوت وكانوا يقولوا الموت ولا أوت . رشيد كامش ولاية بومرداس
الرد :
ممكن رمضان جاز بلخف كي ما ضيفناهش مليح وما قمناش بيه، وبالنسبة للسخانة نتاع أوت نظن ما حسينالهاش كي جات قدام السخانة نتاع الأسعار برك .
طلب إقامة
السلام عليكم يا السي بوكريشة، كل ما نسمع ولا نقرأ عليك نحلم باش نجي نسكن عندكم فالدشرة، مع العلم أني بدون منزل إذا تقبل نجي نسكن عندكم، صح فطورك .
الرد: تخلّي الكبش نتاع بوسعادة والكرم نتاع ناسها وتجي لعندي تضرب اللحم نتاع الهند، ياو خيمة في بوسعادة ولا برطما فوسط الزحمة نتاع الدشرة هاذي، أقعد وين راك حتى يتنهدوا المسؤولين نتاوعكم ويعطوك سكنة.
التراويح
السلام عليكم قالولي يا السي بوكريشة راك أمام تاع المسجد نتاع الدشرة تاع الولاية تاعكم، ولما سمعت القرار تاع وزارة الشؤون الدينية من أجل التقصير، راك أتصلي بالناس ثلث ركعات تاع التراويح، حبيت نجي نصلي عندكم.
الرد :
ما دام عجباتك الثلث ركعات وحاب تقصّر فالصلاة، راهي كاينا واحد الدشرة هدمّوا الجامع نتاعهم، وراهم يعملوا فمكانو (السي جوكي) نتاع الموسيقى، وجابوا المغنيين وراهم يشطحوا فوق تراب المسجد(الله لا تربّحهم).
طلب عاجل
يا سي بوكريشة راني حاب نتزوج عاجلا مادا بيك تشوفلي وحدة بنت ملياردير وحدها عند باباها، وهو قريب يموت باش نتهلى فيها وتتهلى فيا بزاف .
الرد : يا وليدي الطفلة بنت الميلياردير كاينة، لكن باش يموت ما نضمنلكش .
تذكير بطلب
السلام عليكم، أنا من ولاية تيسمسيلت أرسلت المئات من الطلبات إلى بلديتنا لكنهم لم يجيبوني، ماذا أفعل؟
سعيد من تيسمسيلت
الرد :
فيريفي العنوان مليح، ممكن راه غالط، وساعات راهم يغلطوا وباه يعطوك البلدية بوان كوم يعطوك البلدية نات كوم .
الخمّاس
بونجور سيدنا المير، يا سى بوكريشة راني ملّي نشفى لروحي وأنا نخدم عند الناس ماقدرتش نلقى حتى خدمة سطابل، كلش بالوجوه والمعريفة، وما قدرتش أندير التاويل ولاّ نتزوج، شوفلنا كاش خدمة في دواركم وكاش زاوالية تقبل بيا هكذا أنفوطي عليك مدى الحياة.
محمد من بومرداس .
الرد :
سيدنا هو ربي وأحنا عبادو، هو رب الي ما عندوش والي عندو، وإذا راك تعبدو، أطلب الرزق من عندو، وإذا راك تستناه من الناس هاذو، هوما في روحهم راهم في يدهم يمدّوا، وبالنسبة للانتخابات أنا رابح تسوطوا ولا تقعدوا.
ناس الكوالة
نحن سكان حي الكوالة، نطلب منكم أن تلبوا طلباتنا المتمثلة في إصلاح الإنارة العمومية المعطلة، وتعبيد طريق الحي الباقي على حاله منذ مدة بالرغم من الطلبات والشكاوى المتعددة التي أرسلناها .
قفة رمضان
يا سي بوكريشة صح رمضانك أولا
لقد تحصلت على قفة رمضان بعد جهد كبير، لوكان حجيت على رجليا راني وصلت المهم ... القفة فيها حوايج ما يوصلوش 500 دج، وكيفاه تاع التضامن يقول 3000دج للقفة؟؟؟
الرد : شوف ممكن ادفقت فالطريق، كل ما تمشي تنقص، وهذا هو حال الذي لا يحظ على طعام المسكين .
نشرة الدشرة
زلشات الاستماع
المكلف بالتجارة والطراباندو :
السلام عليكم أعزائي المشاهدين في النشرة الرئاسية ....
أوضح السيد جربوع المكلف بالتجارة خلال زلشة الاستماع التي عقدها أمس مع تخامة رئيس المزلش الشعبي البلدي السي بوكريشة، بأن سوق المواد الغذائية في الدشرة عرفت تحسنا ملحوظا من حيث الكم والنوع، حيث سجلت مصالحنا (يقول جربوع) ارتفاعا ملحوظا في نسبة السلع المسترجعة عن طريق (الزيزي) والتي سيتم تخزينها ثم إعادة بيعها لبعض المقاولين الخواص ليعيدوا عرضها في السوق السوداء مرة أخرى، مما يعود على البلدية بمنافع كثيرة، ونظرا لكثرة السلع المعروضة في الشوارع وتنوعها، يطمئن السي جربوع تخامة رئيس المزلش، ويعلمه بأن ما نراه في أزقتنا وشوارعنا من مواد غذائية قد يكفي جيلنا وأجيال قادمة، ومن الممكن حتى تسويقها إلى الخارج نظرا لكثرتها، مما شكل لنا فائضا في المخزون وعائقا في حركة السير، وبالنسبة لمراقبة الجودة قال السي جربوع بأن مصالحه تقوم بمداهمات مراقبة غير مرتقبة، تقودهم إلى بعض الأحياء الراقية، خوفا على سكانها من الوقوع في الغش أو الإصابة بحالات تسمم، وبالنظر إلى تشديد المراقبة على محلات الأحياء الراقية، فقد أصبح تجار هذه المناطق يغلقون المحلات ويخرجون سلعهم إلى الشوارع والأسواق الشعبية الفوضوية، حيث لا توجد رقابة، وحتى المراقبون في نهاية الدوام عندما يفرغون من عمليات التفتيش، يحملون القفة ويتوجهون نحو الأسواق الشعبية حيث يجدون في الطروطوارات ما لا يجدونه في المحلات، فيغتنمون الفرصة لاقتناء ما لذ وطاب من السلع، وأضاف السي جربوع بأن السوق تشهد تطورا ملحوظا في نوعية المواد المفروشة على الأرصفة، فنجد مثلا (المايونيز) سليمة بالرغم من عرضها على الهواء تحت أشعة شمس خلال شهر أوت ومن دون مبرد، وكذلك اللحوم البيضاء والحمراء والسمراء والأسماك أصبحت تعرض على الأرصفة في غضون الرابعة مساء، ونجدها سليمة و(فريشكة) وحتى عيناها زرقاوتان من شدة الجمال، والخبز كذلك أصبح متوفرا على حافة الطرقات والناس تشتري وتختار وتحمل الخبز في يدها ثم تعيد وضعه في السلة بكل شفافية وديمقراطية، وعرفت أنواع الخبز تطورا ملحوظا خلال هذا الشهر ومن أشهرها (خبز طويل، خبز مدور، خبز رقيق، خبز فوقاس، مونيس فرنسيس، مونيز سبنيول، خبز الشعير، خبز الزيتون، البريوش، المطلوع، الكسرة، وخبز السانوج) وبالنسبة للتجار العشوائيين فقد أصبحوا يهتمون(بالماركوتينج)، حيث يعرضون السلع ذات النوعية الجيدة على الواجهة، من أجل جلب الزبائن، وعندما يقرر أحدهم الشراء يخرجون له سلعا من القاع عكس تلك التي في الواجهة، وبالنسبة للأسعار يقول السي جربوع بأنها قد عرفت استقرارا يتناسب والقدرة الشرائية، أو بالأحرى القدرة الإلهية التي يعيش بها المواطن، وختم السيد جربوع المكلف بالتجارة جلسته بالثناء على السي بوكريشة الذي جعل من السوق جنة، ووفر فيها مالا عين رأت ولا أذن سمعت وما لا يخطر على بال بشر، فكل شيء أصبح متوفرا ويختم السي جربوع الموضوع بشعار كل مصنوع مبيوع، الكرش للجوع والراس ديما مرفوع .
نهاية النشرة قدمناها لكم من تلفزيون الدشرة، ولمعرفة المزيد من الأخبار والتفاصيل اضربوا دورة إلى المارشي .... تصبحون على خير .
بورصة الدشرة
يمكنكم المشاركة في هذا الركن بإرسال أسعار كل المواد الغذائية وغيرها من المواد الاستهلاكية التي تسجلونها في محلات بلدياتكم وأسواقها وأرصفتها عبر التراب الوطني ...
سوق رصيف باب الوادي العاصمة
البطاطا الشابة : 55 دج
البطاطا الراكية : 45 دج
البطاطا لمخلطة : 50 دج
الطماطيش شابة : 70 دج
الطماطيش معبزة : 40 دج
الطماطيش مخلطة : 50 دج
الفلفل حلو شباب : 60 دج
فلفل حلو مذبال : 45 دج
الزرودية شابة : 45 دج
الزرودية مزنجرة : 30 دج
السلاطة الشابة : 50 دج
السلاطة مذبالة : 40 دج
اللحم الجزائري : 950دج
اللحم الهندي : 650 دج
الجاج فري مفرّغ : 400 دج
الجاج فري معمّر : 300 دج
الخبز شباب : 20 دج
الخبز عادي : 15 دج
الديول عادي : 50 دج
الديول على ورقة : 60 دج إذا لقيت !
العنب كحل : 120 دج
العنب خضر : 100 دج
التمر ( الدڤلة ملفوق برك ) : 400 دج
التمر الڤرباعي لمدوّد : 260 دج
البخسيس ( التين ) : 120 دج
لحشيش ولمعدنوس :
ربطة فارغة : 10 دج
ربطة معمرة : 20 دج
عيش يا قلّيل
أحمد حجاج من باب الوادي