السي بوكريشة منذ توليه منصب رئيس البلدية وهو يعمل على إصلاح أوضاع الدشرة وتحسين معيشة سكانها، لكن يبدو ان مقولة (يد وحدة ما تصفق) تنطبق على دشرته، خاصة اذا وجد هذا الأخير نفسه وسط أناس غير صالحين، يعملون على نشر الفساد في البلاد، ويأكلون أموال الناس بينهم بالباطل، ويعملون أشياء لم تكن لتظهر لولا وجود السي بوكريشة على رأس البلدية، حيث قام هذا الأخير بتحقيق معمق واكتشف تجاوزات لم يستطع السكوت عنها، فقرر إرسال البرّاح ليجمع الناس في ساحة البلدية من أجل الاستماع الى الخطاب الذي حضره بوكريشة بهذا الشأن. * البرّاح * يا ديوان الصالحين * يا ديوان الصالحين * يا ديوان الصالحين * على ربي والوالدين * افطنوا يا ناس لبلاد * نوضوا يزينا مالرقاد * راهو صاير الفساد * وأنتم ماشي فايقين * السي لقرع الكابابل * راهو حاسب الكونطابل * أو صاب بلي كاين كابل * ريزو تاع الفاسدين * الزوالي غير يضيع * والمسؤول يشري ويبيع * راهو يعمل مشاريع * بصح ماشي باينين * هذا راح خدم دروج * ابمليار وبناهم عوج * ضربوا شهر ولا زوج * عشاو كامل رايبين * وهذا شرى ليزافيرات * شويا ورق وستيلوات * سقاموا كثر من خمسميات * ان مليون مورقين * وهذا راح باع تراب * تاع الشعب للحباب * والفوقارا في زرداب * في براكة عايشين * وهذا شرى لكمايين * بالملاير ولملايين * باه ينقي لاكومين * كراهم للمقاولين * وهذا دار صفقة وهمية * بالاموال العمومية * كيما يقولوا بالعامية * دراهم البايلك كاينين * يا ديوان الصالحين * يا ديوان الصالحين * يا ديوان النايضين * ايبلغوا الراقدين * * الديسكور: * عندما فرغ البراح من عملية جمع الناس في ساحة البلدية، خرج السي بوكريشة يتصبب عرقا وعلى وجهه علامات الغضب، حاملا في يده مجموعة من الاوراق والملفات، فصعد مباشرة على المنصة وراح يخطب في الناس. * يا جماعة اليوم ما كاين لا سلام ولا كلام ولا (عمّار بو الزوار)، اليوم جمعتكم يا ولاد الدوار، صغار وكبار، باه تسمعوا آخر لخبار، فالوقت الي نتوما راكم راقدين، والا لاتيين بالقفة و بالفوطبال، وتعسوا فالناس، راهم كاينين جماعة لاتيين بالاختلاس، وراهم يسرقوا فأموالكم وادايينكم للإفلاس، وراهم يسرقوا فالساعة هاذيا، وياكلوا فدراهم البلدية، ويستغلوا فالأموال العمومية للمصالح الشخصية، ويطمعّوا فيكم بمشاريع وهمية، ومنين شافوني ما نعرفش العربية، حسبوني جاهل ساهل وحبوا يلعبوا بيا، وأنا اليوم نقول.. راهم طاحوا فالمسؤول مول الفول... * راني عملت الحسابات نتاع الكونطابيليتي نتاع الخزينة نتاع البلدية، ولقيت واحد شاري ادوات المكتب، ولو عمرو ما قرى ما كتب، والعجب المستغرب أنها سقامتلو ميات مليون... ميات مليون على جال كريون وفيش نتاع الكارطون وكبّة نتاع الشرطيطون... ما فهمتش أنا هاذ العتروس اذا عمّر لاتروس بكامل هاذ لفلوس وإلا شرى التروسو ومعوّل يعاود يدخل عروس... يعني يعاود الزواج بالبيجي نتاع البلدية. * وثانيتها راني عملت فيريفيكاسيو نتاع المشاريع التنموية، ولقيتهم خاسرين مليار من أجل بناء حديقة الحيوانات... الورق كاينين، الدراهم خرجوا، الماسو أدى حقو، الطبرونور كيف كيف، الشجر شراوهم، وحتى الحيوانات نتاع سرك عمار جابوهم، ولكن على حد علمي.. من غير هاذ لجنينة الي رانا قاعدين فيها ماكاش جنينة وحدوخرا. * ومن غير هذا راه كاين ثغرات أخرى ما يسعنيش الوقت باه نخوض فيها، لأنكم نتوما ما تفهموهاش، من كثرة الكومبليكاسيو نتاعها، ولكن نوعدكم أني أنا والكونطابل رايحين نتبعوا هاذ الكابل نتاع الريزو نتاع الريسبونسابل بوليتيك الي راهم عاملين الطرافيك، ونخدم بيهم البارك زوليجيك يا سيدي. * بركاو ما تصفقوا، لو جيتوا يد وحدة ما راكم تصفقوا، لأنها يد وحدة ما تصفق، الناس يسرقوا وأنتوما تصفقوا، يا الله أتفرقوا. * بوكريشة بوان كوم * كل من يريد مراسلة رئيس البلدية بدون بروطوكولات أو بيرقراطية وبدون انتظار أو ذهاب وإياب أو معريفة أو رشوة، السي بوكريشة يضع تحت تصرفكم بريده الالكتروني ورقم هاتفه المدونين أسفل الصفحة. * * الرسايل والمسايل * لاعب كرة قدم * انا ياسر من سطيف، نعرف نلعب كرة القدم من صغري، وأنا نلعب في فرنسا، وزيد راني من الكفاءات، على خاطر جبت الباك هذا العام... ايلا تقبلني في الفريق نتع الفوسبال نتع الدشرة. * * الرد: * ما يخفالكش بلي حنا عندنا زوج فرق، فريق المحترفين، وفريق المنحرفين، وما دمت أنت تنشط فالبطولة الأوروبية نحطوك مع الفريق نتاع المحترفين، أبعثلنا قير تصويرتك (بيوميتريك) باش نشوفو على حساب التحفيفة واش من بوسط نحطوك. * * الحمّان * واش يا السي بوكريشة، كيفاش راك مع رمضان والحمان و(السخانة) تاع أوت. مينو زوزو * الرد: * اسكت برك، لوكان ماشي هاذيك الرشقة نتاع الوضوء لوكان الواحد راه مات ملعطش. * * لغز * يا السي بوكريشة عندي لغز هو على شكل عملية حسابية باش نشوفك اذا فور فالرياضيات، كاين حقل زراعي طوله 95 م و عرضه 43م، كم يبلغ عمر الفلاح؟!! م. حسين/قاديرية. * الرد: * ياو كي قرينا هاذ الدرس أنا كنت غايب.... * * الطاقم الفني * يا السي بوكريشة راك كلمتنا على الفريق تاع الدشرة الي كونتوا وعجبتنا الفكرة، بصح ما قلتلناش شكون هو الطاقم الفني. * الرد: * بالنسبة للمدرب راني رايح نحط السي نعسان، باش يرقد فالڤاريطا، ونحط معاه المساعد السي جغلول، باش يشدلوا الكوفيرطا، ما بيد يفوت الموفيطا نتاع الكوب دافريك. * * مسابقة ناس الدشرة * كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة للمشاركة في مسابقة ناس الدشرة والفوز بجائزة رئيس البلدية، السي لقرع بوكريشة يضع تحت تصرفكم وسائل الاتصال المدونة أسفله. * * نكت * مدة الرحلة * وحدة حابسة اتصلت بالخطوط الجوية قالتلهم: كم تستغرق رحله الجزائر -فرنسا؟ قاللها لحظة، قالتلو يعطيك الصحة. * سارة من باب الزوار * * نابوليون * الأب: علابالك يا ولدي بلي نابوليون كي كان قدك كان الأول فالقسم، الابن: وأنت علابالك بلي نابوليون كي كان قدك كان امبراطور فرنسا. * شنوفي سارة * * كبش العيد * قالك وحد الخطرة وحد السيد اشرى كبش العيد قبل عيد الاضحى بشهرين، امالا كانت العائلة كلها تدلل فيه وتلعب معاه حتى انه ياكل معاهم و ينام معاهم في المنزل و عشية عيد الاضحى راح الكبش جبد روحو على العايلة و بدى يبكي جاو سقساوه واشبيك تبكي قالهم »قعدنا بلا عيد السنى الناس اكل شراو الكباش غير احنا«. * سحاب ساعد انيس/ باتنة * * الطائرة الدولية * قالك البلدان كامل تفاهموا يصنعوا طيارة مشتركة، وتفاهموا كل بلاد تجيب بياسة (قطع غيار)، جابوا كامل غير الجزايرين ماجابوا والو ، ستناوهم حتى جاوا صابوهم رافدين بيدون تاع الصبيغة حمرة باش يكتبوا الخطوط الجوية الجزائرية. * فؤاد كاردونا /بئر خادم * * القرد * قالك كان واحد عندو قرد، حب يبيعوا لراح عند واحد صاحبو فالدلالة قالوا بيعهولي، راح السيد عود رجع صاب القرد قاعد وحدو ويحسب فالدراهم. * ع. الجليل بوشارب/ العاصمة * * لقمر والهلال * كانوا زوج حابسين يستناو هلال رمضان، كي شافوه ما تفاهموش واحد يقول هذا هلال لوخر يقول هذا قمر، جاز عليهم واح سقساوه هذا هلال ولا قمر، قاللهم والله ما حومتي. * انتصار/ بوفاريك * * بائع الدجاج * قالك واحد يبيع الجاج، صارعو الصيام ومدوخ، جا ليه واحد قالوا شوفلنا جاجة توزن زوج كيلو، السيد بدا يشوف فالجاج وقاللهم: أيا الي توزن فيكم زوج كيلو تنوض. * عبد الكريم/ بوفاريك * * هاذوك * واحد مزطول حكموه جماعة مسلحين وسقساوه، أنت معانا ولا معى هاذوك، قاللهم انا معاكم، قالولو امالا احنا هاذوك. * مهدي/ الأغواط * * قصيدة رمضانية * قصيدة رمضانية أهديها لكل الصائمين ... و لعمي بوكريشة وسكان البلدية وكل قراء جريدة الشروق اليومية، وأرجو يا سيدي بوكريشة ان تعطيني رأيك فيها. * * إلَى السَّماءِ تجلت نَظْرَتِي وَرَنَتْ *** وهلَّلَتْ دَمْعَتِي شَوَقاً وَإيْمَانَا * يُسَبِّحُ اللهَ قَلْبِي خَاشِعاً جذلاً *** وَيَمْلأُ الكَونَ تَكْبِيراً وسُبْحَانَا * جُزِيتَ بالخَيْرِ منْ بَشَّرتَ مُحتَسِبًا*** بالشَّهرِ إذْ هلَّتِ الأفراحُ ألْوانَا * عَامٌ تَوَلَّّى فَعَادَ الشَّهْرُ يَطْلُبُنَا *** كَأنَّنَا لَمْ نَكَنْ يَوماً ولاَ كَانَا * حَفَّتْ بِنَا نَفْحَةُ الإيمَانِ فارتفعَتْ *** حرَارَةُ الشَّوْقِ فِي الوِجْدَانِ رِضْوَانَا * يَابَاغَيَ الخَيْرِ هَذَا شَهْرُ مَكْرُمَةٍ *** أقْبِلْ بِصِدْقٍ جَزَاكَ اللهُ إحْسَانَا * أقْبِلْ بجُودٍ وَلاَ تَبْخَلْ بِنَافِلةٍ *** واجْعَلْ جَبِينَكَ بِِالسَّجْدَاتِ عِنْوَانَا * أعْطِ الفَرَائضَ قدْراً لا تضُرَّ بِهَا *** واصْدَعْ بِخَيْرٍ ورتِّلْ فِيهِ قُرْآنَا * واحْفَظْ لِسَاناً إذَا مَا قُلتَ عَنْ لَغَطٍ *** لاَ تجْرَحِ الصَّوْمَ بالألْفَاظِ نِسْيَانَا * وصَدِّقِ المَالَ وابذُلْ بَعْضَ أعْطِيَةٍ *** لنْ ينْقُصَ المَالَ لَوْ أنْفقتَ إحْسَانَا * تُمَيْرَةٌ فِي سَبِيلِ اللَّهِ تُنْفِقُهَا *** أرْوَتْ فُؤادًا مِنَ الرَّمْضَاءِ ظَمآنَا * وَلَيلَةُ القَدْرِ مَا أدْرَاكَ مَا نِعَمٍ *** فِي لَيْلَةٍ قَدْرُها ألْفٌ بِدُنْيَانَا * أُوْصِِيكَ خَيْراً بأيََّامٍ نُسَافِرُهَا *** فِي رِِحْلةِ الصّومِ يَحْيَا القَلبُ نَشْوانَا * فَأَوَّلُ الشَّهْرِ قَدْ أفْضَى بِمَغْفِرَةٍ *** بِئسَ الخَلاَئقِ إنْ لَمْ تَلْقَ غُفْرَانَا * وَنِصْفهُ رَحْمَةٌ للْخَلْقِ يَنْشُرُهَا *** رَبُّ رَحِيْمٌ عَلَى مَنْ صَامَ حُسْبَانَا * وَآخِرُ الشَّهْرِ عِتْقٌ مِنْ لَهَائِبِهَا *** سَوْدَاءُ مَا وَفَّرَتْ إنْسًا وَشَيْطَانَا * نَعُوذُ باللهِ مِنْ أعْتَابِ مَدْخَلِهَا *** سُكْنَى لِمَنْ حَاقَ بالإسْلاَمِ عُدْوَانَا * * وَنَسْألُ اللهَ فِي أَسْبَابِ جَنَّتِهِ *** عَفْواً كَرِيمًا وَأَنْ يَرْضَى بِلُقْيَْانَا * أماني * * الرد: * شكرا ايتها المواطنة على هذه القصيدة،التي اجدها جد جميلة ولكن فيها بعض النقائص، خاصة انك تكلمت عن رمضان ولم تذكري الشربة والبوراك... وهذه تعتبر ضرورة شعرية كان يجب عليك الالتزام بها، وسأعطيك مثالا على كيفية كتابة الشعر بالعربية الفصحى. * شهر رمضان أوله لهفةٌ قفةٌ ووقفةٌ في المارشي جيعان * ووسطه غضب و نرفزةٌ وحرب في الطريق والناس زعفانَ * مع أن الشياطين فيه غائبة فغير الشياطين من هناك شيطانَ * وآخره عيد صغير و مسامحةٌ وندم لما تضاربنا مع بعضان * هل التشاراك سيكون تبلعطةٌ وهل المقروط يردنا اخوان * وهل القهوة حليب ساخنة تعاود تزرع بيناتنا لحنانَ * الشاعر بوكريشة
