..مملكة بن بونيا (2)

فخامة الشعب: إخواني المسؤولين...إخواني الفاعلين...رانا قررنا باش نباركوا الزعاف نتاعكم..
ورانا معاكم...فنحن منكم وإليكم كيما كنتوا دايما تقولونا..ومعندناش مشكل باش ننزلوا
لعندكم...وحنا كيما تعرفوا على مد التاريخ دائما كنا ننزلوا ومعندناش مشكل...وحتى ولو
متقبلوناش رانا معاكم..ولي تقولوا عليه رايح يتنفذ بالحرف الواحد..بصح لازم نجلسوا مع بعض..يا
إما تطلعوا لنا ولا نهودوا لكم...المهم لازم نتفاهموا..وأحنا بدورنا رايحين نسمعوا صوتكم
للشعوب المحبة للسلام...ولهذا رايحين في بحر هاذ الأسبوع نديروا زيارة لمملكة المغسّين
ومملكة لي حاسبين رواحهم...ومملكة لي يكرهونا...باش نقولولهم بلي أحنا نبغوا بعضنا بعض...
المسؤولين: ماراناش خوتكم...أخرجوا علينا...تروحوا كلكم يعني تروحوا كلكم...
فخامة الشعب: كيفاش نروحوا كلنا؟؟؟...يا ودي أنعلوا الشيطان...صاح يا سيدي نديروا رانا رحنا
قاع...وممبعد...واش ديروا...؟
المسؤولين: رايحين..آآآآآآآآ...رايحين..آآآآآ...متحوسوش تفهموا..وسعونا برك.
فخامة الشعب: شفتوا كيفاش...يا ودي أنعلوا الشيطان...أحنا منكم وعليكم...صاح يا سيادي
ديروا ممثلين عليكم...باش نتفاهموا معاهم...(على جنب) ياو نحكموكم....
المسؤولين: واش راك تقول يا فخامتك تحت فمك؟؟ على العموم قلنا ترحلوا قاع يعني ترحلوا
قاع...
فخامة الشعب: يا ودي وين نروحو الله يهديكم..هملا أحنا لي غد نجيو لعنكم..مليحة هذي؟؟
المسؤولين: لالا مجيوش لعندنا...رانا غاية وحدنا...
فخامة الشعب: ياو أحنا منجموش ننفاصلوا عن بعضنا البعض يعني منا وإليكم..المهم غد نبعثولكم
البعض منا..نقصد لي يحبوكم وتحبوهم...
المسؤولين: لالا والله ويجو أهنا نروحوا أحنا.
فخامة الشعب: وين تروحوا؟؟
المسؤولين: وين ما تكونوش أنتوما.
فخامة الشعب: وين نكونوا أحنا تكونوا أنتوما...يعني الشيء اللي راكم تطلبوا فيه مستحيل...
المسؤولين: والحل؟؟
فخامة الشعب:عندكم الحق في السير والتصاور والهدرة من الأحد للأحد أما بقية الأيام أحنا عندنا
الحق....هههههههههههههه.
قطع...
(نهوض بعض المعارضين الذين كانوا نائمين...واجتماعهم في زاوية من زوايا القلعة..وخروجهم
ببعض القرارت المسمات على خطى الجامعة البنبونية...)
الناطق باسم المعارضين: يا فخامة الشعب....يا فخامة المسؤولين...يا فخامة الفاعلين...بعد
التحية البنبونية..إليكم ما تمخض عن إجتماعنا بعد التطورات الخطيرة التي وقعت فيها مملكتنا
بسبب تعسف فخامة الشعب..وإذ ذاك خرجنا بالتوصيات التالية:
1- نبارك زعاف طبقة المسؤولين ونطالبه بالاستمرار في الزعاف..
2- نطالب فخامة الشعب بالاستجابة الفورية للمطالب ودون قيد أو شرط
2- رانا مع هاذ الزعاف..
3- وكل ما سيؤول إليه الوضع رانا معاه..سواء هود لي راه الفوق ولا طلع لي راه لتحت..
(حركة غير عادية ...بعض الانشقاقات...وركوب الموج..بالنسبة لبعض أفرد الشعب)
أحد أفراد الشعب المنقلب: سلمية...سلمية..سلمية..
أحد المسؤولين: أشكون أنت؟؟...ماشي كنت مع الشعب؟؟؟...واش جابك ألهنا؟؟؟
أحد أفراد الشعب المنقلب: أنا راني معاكم من بكري...كنت لاعبها معاهم برك...راك
تعرف...إستراتيجية..وفالأول والأخير أنا مسؤول كيما بقية المسؤولين البسطاء.
أحد أفراد الشعب المنقلب (2): سمية..سمية...آآآآآ سلمية..سلمية...راه كاين الزين أهنا ياه..
أحد أفراد الشعب المنقلب (1): ألحقتني حتى لهنا...واش بغيت مني؟..روح بعدني يا سيدي...
أحد أفراد الشعب المنقلب (2): كي تبعدهم..راني نبعدك...حشيتهانا ياك...
أحد أفراد الشعب المنقلب (1): كل واحد يقرا في لوحتو...أحنا مع الواقف...ماشي مع القاعد...
المسؤولين: شكون أنتوما؟؟...ألحقتونا حتى لهنا ولا كيفاش؟؟؟..ها روحوا بعدونا مالكم...
والله والله لوكان ما ترجعوش وين كنتوا أنروحوا أحنا..ها روحوا بعدونا مالكم..ها روحوا...
(نزول طائفة معتبرة من فخامة الشعب لركوب الموجة-سميت بالمنقلبون)
المنقلبون: وين ما ترحوا نروحوا معاكم...تبلينا بيكم وتبليتوا بينا...الله يسهل عليكم..
أحد الفاعلين: آآآآآآآآآآي مشي أنت كنت مع صحاب الفوق؟؟
أحد المنقلبين:أنا كي عرفت الصح هودت...
أحد الفاعلين: و الصح وين راه ؟؟
أحد المنقلبين: راه لتحت .
أحد الفاعلين: ها بصح يعيا يعيا ويطلع...
أحد المنقلبين: نطلعوا معاه.
أحد الفاعلين: وإذا هود؟؟
أحد المنقلبين: نهودوا....
أحد الفاعلين:وإذا.....
يتبع...