الحب

كثيرا ما نحصره في قصص الغرام والعشق وأشعار الغزل، أو نربطه بالشهوات، لننسب إليه أفعالنا الخبيثة، أو نستعمله لإشباع غرائزنا، ونتكلم باسمه عند الخداع، ونستحي من ذكره في بيوتنا، دون أن نعلم بأنه مفتاح الدنيا والآخرة ومعيار الإيمان وهمزة الوصل بين الإنسان والإنسان، لقوله صلى الله عليه وسلم "لا تدخلوا الجنة حتى تؤمنوا، ولا تؤمنوا حتى تحابوا".
قصيدة الحب
يا للي سألتني عن الحب وقلتلي بالله خويا وعلاه
ما تحاولش كاش ما تكتب وتقولي برك وين نلقاه
عييت نقلب شرق وغرب وين يقولولي نستناه
لقيتو كامل كذب في كذب ما تلاقيتو ماعرفت معناه
لا قريب ولا صاحب ولا حبيب تعيش معاه
حياتي كامل وأنا نجرب واحد ما لقيتو يسواه
مانيش فاهم هذا القلب وكأنو ضد مولاه
يحب يشقى يحب يتعذب يحب الواحد لي ينساه
وساعات تلقاني نحب لي يكرهني نجري موراه
ولي يحبني وليا يقرب نهرب عليه مافهمتش علاه
حاول خويا كاش ما تكتب الجواب راني نستناه
لله احكيلي على الحب وقولي برك وين نلقاه
راح نحاول باش نجاوب كيفا ش انا نشوف معناه
ودير في بالك هاذ الحب مراكش وحدك حاصل معاه
شحال من واحد راه يتعذب والحل ديالو مزال ما لقاه
مايفيدوش معاه تجارب مايفيد ملك ولا جاه
اذا فات سكن فالقلب يولي يسير في مولاه
شحال طوع من محارب وحسرة شحال من فارس بكاه
شحال مسلطان عشى مذبذب سمح في ملكو وراح معاه
شحال من بيت عشى رايب دخل فرق ناسو وخلاه
وحصرا شحال من واحد هرب وخلى ولادو يبكو موراه
شحال من شاب شحال من شايب شحال من واحد الحب عماه
لحق حتى ولا يضرب ولادو، زوجتو او يماه
يالي سالتني على الحب على ما نظن والعلم لله
قلبك هو الي راه مخرب وما راكش عارف حتى وين راه
دير في بالك ذاك الحب الي يهرب و تجري موراه
و لما يجري أنت تهرب عمرك ما راح تتلاقى معاه
على خاطر هذاك لعب مديور للي يتبع هواه
ما تنال منو غير التعب ديرو كيما خيالك و انساه
فرغ قلبك و عاود رتب و خلي عقلك يخدم معاه
وقبل ما تحب لازم تحسب باش كي تمدو تمدو لمولاه
هيا نبداو من أول حب ....أول حب هو الله
الي عطالك هذاك القلب الي راك تحوس باش تملاه
ولوكان برك ليه تقرب أقرب منك رايح تلقاه
كلما تحصل قولو يا رب وهو يقولك راني الاه
وبعدو يجي ثاني حب هو حبيبنا و حبيب الله
عليه الصلاة و السلام تعب باش صفى قلبك او نقاه
حبو عليا وعليك واجب سعدو الواحد للي بغاه
يحشر المرئ مع من احب تخيل روحك قاعد معاه
ومن بعدو يجي ثالث حب أنه الواحد يحب يماه
تسع شهور وهو يتقلب وهي مسكينة تتقلب معاه
سنين وسنين وهي تتعذب وين يطيح يلقاها حداه
حتى نهار يولي شايب يبقى طفل في عيون يماه
ومن بعدها يجي رابع حب أنو الواحد يحب باباه
لأنه خرج من بين الصلب والترائب الي جواه
شحال شقى وشحال تعذب باش كبر وباش رباه
ابن ادم وكل ما كسب هو ومالو ملك له
ومن بعد خامس حب هو الشريك لي تعيش معاه
دير في بالك نهار تتحاسب نصف الدين هو تلقاه
تعيش معاه بلي كتب وتتقاسمو كل شي انت وياه
وتتعاشرو ومعاه تنجب طفل صغير لعقايب تلقاه
وهذاك الطفل سادس حب ماتحبش ولد دون سواه
سبعة داعب وسبعة أتعب وسبعة صاحب دور معاه
ومن بعد يجي سابع حب من رحم واحد انت وياه
خوك خوك لا يغرك صاحب حتى الصاحب في الشدة تلقاه
وهذاك الصاحب ثامن حب تتقاسمو كل شي انت وياه
تتعاشروا فالخير والواجب يظللكم ربي انت وياه
وتاسع حب هوما الأقارب الرحم ديالك ما تنساه
ومن بعد يجي عاشر حب جارك الي تسكن حداه
والمريض لي راه يتعذب دقيقة واحدة اقسمها معاه
طل عليه إذا كان تحب ربي سبحانه ثم تلقاه
او اليتيم الي فقد الأب ولا حتى الي فقد يماه
امسحلو راسو وابدا تحسب في كل شعرة أجر تلقاه
والفقير الي ما كسب والي ما لحقش قوت عشاه
واش راك تاكل واش راك تشرب ؟ يالوكان خبزة اقسمها معاه
ومن بعدهم تقدر تحب كل مومن في طريقك تلقاه
لانو ربي سبحانو كتب المومنين خاوة في الله
يالي سالتني على الحب بالنسبة ليا هذا معناه
ايلا ما عجبكش الله غالب روح تحوس وين تلقاه
كلمات فيصل كرشوش
كل الحقوق محفوظة