اسلماد الشيخ سعيد كربوش

الشيخ سعيد بن موسى كربوش اقن سنعزمان ايورعان نوغرم نتغردايت ايلولد اسقس 1926 . يبدى اعزامس امزوار اسقس 1934 اغربزان نتوات يعزم سوفس نالشيخ الحاج عمر العنق .
اسقس 1937 يوتف اغرباز نالاصلاح تغردايت دفر مناو اسقس يولي غال اوغرم نلقرارة اورني نولماد دوعزام اغرباز نالحياة مان انجم ادعرض القران العمرس 17 نسقس سوفس نالشيخ الوارث سليمان امار نتمدورت نالشيخ بيوض ايتوغ فتبجبى نالمعهد نالحياة ادقل غرس الفضل نوسلف نالمعهد دوجم نوحرش نوعزام اغزر نوغلان.
الشيخ كربوش ايتوغ اتعاون باباس التجارة اغرم نشرشال ايموت دس اسقس 1947 اتونضل تنضلت نالاباضية نوغرمو.
دفر اقدى نوعزامس لقرارة يوتف غال اوسعزم دسلماد نمكراس يبدى اخدام اغرم نتبسة مان يبدى اسلماد اغرباز نالهداية الان دغرباز امزوار اغرمو ايقم المدة نتس نسقسن نت اسلماد تروى نات اغرسان اخدمان تبسة .
اسقس 1956 اتوسبد اسعزم اغربازو فنجال نالقلت نلمان امار نتقراولة ايتوغ دالخطر فنلمادن. سن اوط غال وغلان مان يرني اسعزام دوسلمد اغرباز نالاصلاح يد مناو اسلملدان اسبلان تمدورتنسان اوسعزم دسلمد نلمكاريس دونشار نالعلم دالشريعة.
دفر تمنوننت ندزير يوتف الهيئة نعزابان اتوعين دخ دالضامن نتعشرت نات احمادة مان اعافر اعاون اسجوري نلمور نمدان انلعراس دجراون ددملاقة اسبل اخدامو ارب دقت السيرة انغ العادة تدجور اغلان سبكري مان مدان خدمان لمور نالامة اربي انالعسة دعاون نقللان توزاوين دحباسن نالعرش دوحضار لعراس اموني سوواعظ دوعى نمدان ليجور ابريد نربي.
اسقس 1987 اتوكلف باش اديلي اتقبال الجولة نوجرو نالمعروف اغرمان ندزير ايالفايدة نتدشلا نالاصلاح دلمور نوغلان اتهمان تمدورت نمدان اموني تخليفت نالشيخ بنوح مصباح رب اترحم.
اسن الاربعاء 22 صفر 16 ماي 2001 اويت يوش تنمرت غرس ختن ايتوغ اقت الجولة تمنغغت دزير اتونضال اسن الخميس 17 ماي 2001 اتونضال تنضلت نباعيسى اوعلوان تغردايت 76 نسقسن العمرس يجد دفرس اقن امزروي ايزعلك اربى تمدورتس للوف نمكراس يجد انشانس دونظف الدنت مان يوش امقران يلا اوجدس اقن ونشان دونظف يف ون نالدنت .