بوقالات20

عمارة‮ الحاج‮ لخضر رشّيت عتبة باب العمارة بالزهر والطّيب، وسقيت كل الأحباب بالعسل والزبيب، وكي نسيت جاني جواب كنت نستناه من عند البعيد، قالي يا لخضر راك عيّدت قدام ما يجي الناس العيد، سألت مصباح وليندة وتواتي وزدت معاهم بوعكاز السعيد، قالولي ماراناش عارفين إذا كان حنا ضعاف ولا‮ لخضر‮ قوي‮ ويدير‮ بينا‮ واش‮ يريد‮!‬
عائلة‮ الجمعي
يا سعد من جمعنا فاميليا واحدة مع قاسم، محبتو مع سيد أحمد ڤناوي مرغوبة وقدر حاكم، صالح أوڤروت التفراج عليه في رمضان لازم، بصح سميرة صحراوي ناقصها شويا كوميديا وخوها (بيدرو) لاعبها بزاف فاهم، والمسكينة (دوجة) خوختنا اليابسة.. هدرتها قليلة واللي في قلبها ربي بيه‮ عالم‮!‬
قلوب‮ في‮ صراع
قلبي عليك يتوجع يا مصطفى يا لعريبي، ضاعت حياتك بين هدرة وهدرة وخلاوك تقول مرتي غبنتني واش بيه نسيبي، راهو معاك عمار (معروف) من المصير يا حبيبي، ونافع جندي ولّى ضار في المسلسل وتمثيله زاد في عذابي!
البذرة
بذرتنا مسوّسة وناسها مكرفسين، اللي يشوفها ما يعرف راسها من الكرعين، عجايمي ما يهش ما ينش ورجع بعدما كان وحش إنسان مسكين، وفتيحة بربار استقالت بعد هذا العمر الطويل من مهنة الممثلين، بن شنات طبعها بأغنية ماشي كيما لخرين، يا ويح من صدق وأمّن بلي الجزء الثاني كيما‮ لوّلين‮!‬
حال‮ وأحوال
ديدو‮ ديدو‮ زهري‮ عكسهالي‮ وحالي‮ مال،‮ المخرج‮ (‬بادي‮) لعبها‮ فاهم‮ ودار‮ حال‮ وأحوال،‮ بوعكاز‮ ضيّع‮ حب‮ الناس‮ وكثروا‮ عليه‮ لقوال،‮ وعاشوري‮ غاب‮ وياريتو‮ ما‮ رجع‮ بمسلسل‮ نجاحو‮ من‮ المحال‮!‬
طاقم‮ وقراء‮ "‬الشروق‮"‬
مزينو نهار اليوم صحا عيدكم، فرحتكم كبيرة الله يكثر أحبابكم، قالوا 600 ألف يكفي قلت أواه على المليون عينكم، كرمتوا علماء وزدتوا دعمتوا فرق ورياضات هاذي من شيمكم، إن شاء الله لعياد تكثر في "الشروق" ومن الطيحة ردوا بالكم.. مول البوقالات يهني كل الناس وماتنساوش‮ راينا‮ هو‮ رايكم‮!‬