ألام و آمال

شعر شعبي جزائري

من الصعب جدا التعبير عن عواطفنا،وخاصة إذا كانت عواطف حب ، فكل الكلام الذي نقوله في الغزل نشعر أنه يخفي كلاما آخر لم نقله، لا أدري إذا كانت لهجتنا قاصرة عن التعبير على مثل هذه الأحاسيس ، أم السر في تركيبتنا الذهنية كشعراء شعبيين ، لا تبخلوا علينا بنقدكم وأرائكم .
خويا هني وين رحت اقبيل انت وقاسم شباح للقعدة
اتحبو تعاونو الي قليل شرفة ومرابطين وقيادة
شعارة وشيوخ والتمثيل زعاما واخصايل ازيادة
وسلامي لولاد تيسمسيل كل شاعر يستاهل اقصيدة
مالي طاقة انردكل اجميل كلمة شكر تكون شهادة
بيا قصة صرات وقت ا مقيل قبل الظهر جوايه الوحدة
تلاقيت اخليلة بدون اخليل ذاك اليوم غفلو الصيادة
تبعتتها بالعين وين اتميل هذا العيضة كانت اوحيدة
في مشيتها اتفشل القليل وتقتل كل اعشيق في المبدا
شلفاوية جات للتسجيل سألتني ما صبت كي نبدا
سألتني سؤال كان اجميل قلتلها مجروح م الكبدة
اجلسنا في اجنان مسك اليل من ذا الجنان هداتلي وردة
قلتلها يابنت زين الصيل كل اخصايل فيك موجودة
خوالك شرفة كاسبين الخيل يلقاو البارود والشدة
واد شلف مازال بيك يسيل ما ينشف ماتعمرو رعدة
بنت حميس مالالها تمثيل امربيها على الحيا عمدة
شبوبها ماكان في ذالجيل قلبي عليها ما بغى يهدا
حتى انا قاري كتاب اخليل والي هي عاصية تهدا
الونشريس ليا يكون مهيل ناسي ماتو فيه شهد
نتحده مهما يكون طويل يطوال ونثنيه بقصيدة
باليقشة وبخور زنجبيل بالجدول انطوعو يهدا
ذاك البعد يكونلي تسهيل في طوعك ماتكودني كودة
لايمتي من الزين كل جميل العين الزرقة شفارها سودة
خدك ضاوي كي نجوم اليل ولا عظلم في اسماه اقدا
زنجي تاه على كتاف ايميل مثل الثعبان ساكن الرفدة
ريق عسل يشفي القلب عليل معصور وقت الصيف من شهدة
كل الي كتبو عليك قليل بن كريو وشيوخ حمادة
ياكنزة راني عليك هبيل سكنتي بين القلب والكبدة
سيدي معمر ما تكون ابخيل ليك امسلم طالب النجدة
حشمتك بالواحد الجليل طالب ربي ليك في السجدة
نلقاها واديرلي تاويل وتبقى مثل التاج مرفودة
على لبنات تبان تاج جميل مانعشق من غيرها وحدة
الشاعر : حجو عبد القادر المدعو باشا