باسم الله بديت

- لميت المسك والعنبر وسقيت بيه أصحابي رفعت يدي لربي العالي ينورلي طريقي ويجيبلي نصيبي يفرح قلبي ويتسقم سعدي.
- يا مولاة الورد يا ريحة الياسمين يا حلوة العسل وورقة الحرير جايك من الشمال واليمين من كثرة الخير عقلك يحير بصح بالاك تنساي المسكين كيما حن عليك ربي اتفكري الغير.
- يا مالكتني بزينك يا الزايدة في عذابي في الليل نموت وفي النهار نترجاك أعطيني كلمة من فمك يرحم اللي رباك.
- شديت طرف القمر ولميت قاع النجوم صبت عليا المطر وكان ذا الحال يدوم ندير منديل اخضر امجلجل مرقوم يعود لي الزهر وتغيب عني الهموم.
- طير يا الزمان وما تبطاش جوز على الحومة وزيد الخراش طير على جال مولاتك قلبي حصل عندها وما صبتلو مفتاح.
- فاطمة يا فاطمة يا خليلتي يا فطوم نديرلك في الجو ساقية وفي السما سلوم عليك يا خليلتي نهجر ونروح لبلاد الروم.
- بيني وبين لحبيب رمية وتفاحة تفاحتي من ذهب وفي راسها بلبل البلبل على الساقية والماء يولول واللي حب الخد لحمر ربي يكملو.
- يا قلبي لا تضيق فرج الله قريب اللي في الحبس يطلق الله سراحو شوف وليد لحمام بعد التقصيب خلف عليه الله وقيد جناحو والعاشق ربنا يبادر بسراحو.
- العاشق في دارنا والعشق ربانا والعشق في بيرنا حتى حلا مانا العشق محبقة حتى رمات الغصان والعشق ما ينحيه لا قاضي ولا سلطان.