بوقالة سكوب

برج الحمل
كلام على كلام و الكلام على سقيلة، العين في العين الدّعوة مقبولة.
وحكمته : ضالة الكريم حسن الثّناء.
برج الثور
يا شمس واش بيك ذابلة، إلا بيك الزين راني نفكر فيك، وإذا بيك الزهر ربي ما يتخلي عليك.
وحكمته: طوبي لمن شغله عيبه عن عيوب الناس.
برج الجوزاء
محبس منقوش، مربي على الفشوش، ما يحمل الهانا، أصبر يا خاطري حتى يفرّج مولانا.
ظلم الضعيف أفحش ظلم.
برج السرطان
لزّيت لباب الرياض، الورد عالباب النرجس باسني، الزهر عنقني، والياسمين ما بغَى يكلمني.
وحكمته: العين بريد القلب.
برج الأسد
قطّعت اللحم بيدى وعملت بذور، وسمعت الكلام بوذني وعرفت من قالو، يا قايلين الكلام القبيح واش تربحوا، أنا طاوس في القصر وانتم خفاش النهار ما يضوالو.
وحكمتكم: الغفلة غرور.
برج العذراء
جزت على جنية، قالت لي واش تحوسي يا ولية، قلت لها ماني نحوّس لا على ما ولا على جاه، نحوس على من ضيّعت يولي لي.
وحكمته : الفقه جيش لا يهزم.
برج الميزان
جايز على باب دارنا، لابس تلمساني، قتلو يا شيخ بالاك تنساني، قالى والله ما ننساك، ونصيبك على ربي جاه وسلطاني.
وحكمته: القريب من قَرُبَ نفعه.
برج العقرب
آمّنت بالله، و المنام رؤية من عند الله، حمامة بيضة جات ترفرف عليّ، معاها حصان توقّف بين يديّ.
وحكمته: كرام الناس أسرعهم مودّة.
برج القوس
نبعث لكم دموعي في مشوار زرق، ونبعث كلامي في برية تحرق، ما ننساكم يا ناسى بحق مكة وبلاطها لزرق.
وحكمته: لين الكلام قيد القلوب.
برج الجدي
سمعت قر الحمام في قاع السّجنة، لا من سقاه الما ولا من طاه شعير، يا قمر.. الحمام يعي ويحن، وتتعمّر النافورة، ونعودوا لزمانا كيما كنا.
و حكمته: المشقة كلها في تأديب الجاهل.
برج الدلو
خرجت ليلة الجمعة، في يدى شمعة، خرج لي ملاك حنين قالي: يا بنت السحاب حاجتك راه مقضية، قلت ليه : يا سيدي طالت المدة، قالي: روحي لدارك تصيبيها قدّامك.
وحكمته: النفس مولعة بحب العاجل.
برج الحوت
خرجت بدر البدور تتزعبل في المور، تلقت هذوك الشعور، على الخد إلى ينوّر مثل التفاحة.