معروف البيرين من بكري شهدة * واللي فيها من العسل ذوك ولادو كي يقدم يعتاق عمرو ما يردى * وما يتعجر ما يقابل حدادو ومن بكري لميعدات دوا للداء * وجبيرة للي مكسَّر وسنادو ومن بكري هوما حلاوة للقعدة * ووقت الواجب سطرولو ميعادو ذوك اللي هدَّاتهم والله هدَّة * وسيرة للتاريخ بيها يتعادو ذوك أهل الميعاد ورجال الجودة * وطوَّأعين الصاعبة ما يتكادو وأهل الرهبة ذوك لا من يتعدى * وأهل الضنَّة .خيركم ذو ردَّادو واهل الشعر احروف لقصايد تهدا * وما تتخبط طيعة للي رادو ذوك أهلي مانيش زايخ نتحدى. * نار على علم ماهمش رمادو نا لاني مدَّاح لا طالب عهدة * نا واحد مرهون شعره لبلادو نا شعري ماهوش ل (الحملة)سدَّة * يركبها من جا يقطَّع في وادو لا ( حدِّي ) لا حَد لا دونو (حَدة) * ولا حادي لحروف ليا يتقادو نا شعري هزّو تمحميح الكبدة * عالبيرين الزين كي زاد فسادو لا هو جرح فريد تخياطت نفدة *ولا هو هَم يسير عنا تحيادو ولا هو نابت شوك بجوار الوردة! * ضر مقطر مُر, من دك أوتادو ؟ يا بيرين اتخلطت فيك الشهدة * وعسلنا خلطوه بالسكر زادو ماهت فيك وماعت الحالة وحدة * وتساوى فرخ الحجل وصيادو! ولدك فيك (غريب) عدا ما عدا * واللي فيك (ربيب) صدرك توسادو يدي بتربريب ويفوت العَدَّة * وكي يرضى تعطيه من حقي كادو؟!!! ماتت فيك أحلام قلبي من مدة * ومات الصبر وما زهوي واعيادو وما رابطني بيك يا وكري عِدَّة * والعدّة أيام عمري ما زادو. (*) البيرين / 08 ماي 2012.
