زمان النفاق

يا لطيف من زمان النّفاق النّاس كيفاشَ رجْعو خدّاعين
ما بْقى بيناتهُم حتى ميثاق ما بقاتلهم ملّة ولا دين
الّي مازال ما فْطن و ما فاق يا ويلو من هاذ المُنافقين
لّي قاعدين يْزَيْنو في الأخلاق يتنكرو ويَخْفِيوْ فعلهُم الشّين

يَسْبَق للمَسجد في أوّل صْفوف و بعد ما يْسَلّم يْسَبْ الدّين
مْطَوّل اللّحية و الشّارب مَنْتوف باش يْبان زعما من السُّنِّيين
كُل عاشوراء يْزكّي بالألوف من مال يَتامى و مَظْلومين
يَدّعي بالخُشوع وبالخوف و فعالو تَسْتْحي منها الشياطين

يَفتي للناس في المُنكروالمَعروف و كي يْرَوّح للدّار يَعْصي الوالدين
قدّاش طَمّاع و قَدّاش مَلْهوف وقُدّام النّاس يْبان من الزّاهِدين
حاسَب نَفْسو إمام غير مَخْلوف النّاس الكُل عَنْدو أُمِّيين
الهَيْبة ترَهّب و المظهر مَتحوف و النّية خاسْرة و أوْسَخ من الطّين

كي تْشوفو تْقول عليه هاذا ظْريف حَدْ ما راح يَسَبْقو للإحْسان
يَدّعي بالحُرْمة و النّيف و عند الصّح تصيبو يولّي جَبان
يْبات يسكر و يشرُب في الكيف ويَفْتي للنّاس بْتَحريم الدّخان
كْلامو الكُل كْذوب و تَحْريف و يْزيد يْبَرْهَنْ لَكْ بالقُرآن

كاين بعض التُجّار يا لَطيف يَخَدْعوك غير بالكْلام الكْثير
يْحَبّو يَدّيوْ دْراهمَك بالسّيف و يْخَلّوَكْ عَنْدْهُمْ زبون أَسير
يْقول لَك أنا سلعتي على الكيفْ وهِي كلها مصنوعة بتزْوير
كي تْشوفو تحلف تقول شَريف وهُو في الحقّ مَرْباوي حَقير

كاين شي موَظفين في هاذ البلاد ضميرْهُم مَرْضان وَلاّ مات
باش يَقْضيوْ مَصالح العِباد لازم تَعْطيلْهُم غيرالرَّشْوات
ويْقول لَكْ هاذا حق ماشي فساد وإذا ترفض مَصالحك خْلات
رْجَع البحر يَطمع في الواد قَلْبو كُل شي حتّى الآيات

كاين الّي عَنْدو زوج وْجوه واحد للمْراية و واحَد للنّاس
يَسْحَر كل النّاس باش يْحَبّوه و في الظلام يطعن في الظهر بالمْواس
عَنْد صْلاحو ما يَسْتَعْرَفْش بْخوه ما تَبْقالو ذمّة ولا إحْساس
يَقْدَرْ يْعادي حَتّى لّي جابوه قُدّام صْلاحو كلّ شي يَنْداس

يا لطيف من زمان النّفاق النّاس كيفاشَ رجْعو خدّاعين
ما بْقى بيناتهُم حتى ميثاق ما بقاتلهم ملّة ولا دين
الّي مازال ما فْطن و ما فاق يا ويلو من هاذ المُنافقين
لّي قاعدين يْزَيْنو في الأخلاق يتنكروا و يَخفيو فعلهم الشّين