ات مليشت : لقصر نتغرم دوعزام

اغرم نات امليشت دقن سغرمان نغزر نوغلان اتوبنى دنج اقن وورير يوسد جار اغرم نات ازجن دوغرم نتغردايت .اغرم اتوبنى ابدى نالقرن مراو دقن ميلادي . قبل ابنى نوغرم نات املشت اتوغ قبلس اغرم نوداي اتوبنى اقدى نالقرن فيداكس هجري 395 هجري بعد امرارس اولين مدان غال اوغرم نوجانا.
اغرم نوداي مدنس توسنان سوخدام نالكلال انغ الفخار دقت الحرفة اتوسنان سس مدان نات املشت سبكري فنجال نالوجد نجدي دالتاولات نوجد نمناو لنواع نالكلال اتوسحقان تدار انغ تمدورت نمدان . الكلال اتوغ دالاقتصاد نوغرم بلا ابسون اضضنين انوخدام نزرابة دسوشا دالتاولات نوفوس.
سنعزمان دورعان نوغلان ابو جعفر الحاج مسعود الان اتونضل اداين ات املشت يوسد سوورير ننفوسة ليبيا مع يواس اسقس 407 هجري يتوغ اسعزام انلمادن اغرم نوداي . تنفوستس مشهورة وني يجمض ختن يتوغ ابريدس غلا الحيج بعد اغراق نالبابور لجوايه نمالطا القرن فيد مراو ميلادي . مدان نات املشت ادجينت يموت امبصح دفر مراو نسقسان اعاود ابايند اتملشت مان مدان اولومنان بل الحاج مسعود زذغ يلا ادر دفر مناو اسقسان نوجماضس . الحاج مسعود اتوفى اسقس 1167 ميلادي 563 هجري مان انيلس يلا غال اماروا اداين ات املشت .
سنعزمان دخ امقرانان اتوسنان ات املشت الشيخ با عبد الرحمان الكرتي اعاش امار نالشيخ عبد الرحمن الكافي اتشرد اغرم نات املشت يلا غرس غال اماروا اقت تمجيدا توسمى سسمس تنضلت نات املشت . توغان جرون دس ادموان دمقرانن نغزر نلمزاب اومشاور دومفهام فتمشراس نوغلان دبسون اتهمان تمدورت نات اغرسان اماشي جرون دس غال اماروا تمجروين نتمسردين اسقارن المؤتمر نلا اله الا الله مان اتملاقانت دس قاع تمسردين نغزر نلمزاب اومساول فتمشراس مع اعزام نالقران دوصوضف ننفاش مان اسوتورنت يوش امقران ادحفظ اغلان دورى نلبلاء .
سنعزمان نوغرم نات امليشت دخ الشيخ احمد بن محمد فرصوص دقن سودموان نعزابان يوري مناو لكتوب فومزروي نوغلان دنعزامنس .
القصر نات مليشت دقن سغرمان الان اولرقيب اقن اوسع فنجال نالقلت نالوجد نتمورا نالبنيان مان مدان وطان غال ودا ي مان تمورا نتكرزت دتجموين امبصح اسقسان نالثمنينات يرقب ادسان نوغرم سايولوا تمو ابوي نتموار دولاي نالبنيان اماس نوورير دترجوين نومان اساوضنت غال ودا ي مان اولدقم اقن الطرف يرعى قاع اتواش سالسيما.
اغرم نات املشت دغرم جار اغرمان نغزر نلمزاب الان لاش غرس النظام نوزوني نومان نوسوف لغوابس فنجال نالقلت نالوجد نترجوين انغ اقن اغزر اوسسي نتجموين مدان تشلان فومان نترسين اتوحفرنت اماس نغزر دوماس نتجموين.