بعد توليه منصب رئيس البلدية، وبعد الخطاب الذي ألقاه "السي لقرع بوكريشة" على المواطنين مبينا فيه برنامجه العلمي والعملي، ها هو اليوم يقوم بجولة تفقدية في بعض أرجاء الدشرة، اين لاحظ بعض التجاوزات الغريبة فسجلها في كناشته الصغيرة، وأرسل البرّاح كعادته ليستدعي السكان من أجل عقد تجمع طارئ في ساحة البلدية. * "البرّاح" * يا ديوان الصالحين يا ديوان الصالحين * يا ديوان الصالحين والله ماكم سالكين * بوكريشة راه مهول وراهو حالف ومعول * الي ما يجيش الاول ايسجلو مالغايبين * فالدشرة راح اتجول الراجل قريب هبل * الدنيا لقاها تشعل والحومات مزينين * لعلامات فالطرقان وتصاورو في كل مكان * ولقى حتى مالسكان فالطروطوار مستفين * هاذوا ذراري هاذو بز هاذا يسوطي وينقز * بوكريشة راهو جايز والطرقان مبلعين * بالشنابط او ليموطار والخدامة راحوا روطار * والي رايحين للسبيطار عند الدورة حاصلين * هذا حشيش هذا نوار وهاذا نخل وهاذو شجار * ناضوا بين ليلة ونهار أو عشاو مورقين * * الدشرة كامل مشاها بونتة صغيرة او ما لقاها * باقي حاير في يماها النظافة طاحت منين * ومنين دار على الفيراج ودخل الوسط الفيلاج * لقى الدنيا كامل خماج الباطيمات مدودين * والساشيات نتاع الزبل فالركنة تقول جبل * الناموس او لقمل والطومبات مسركلين * هاذي هي سي د وماج سياسة لبريكولاج * غير ملفوق الماكياج ولداخل مزفتين * ياديوان الصالحين يا ديوان الصالحين * يا ديوان الصالحين واليوم ماكم سالكين * * الديسكور: * بعدما انتهى "البرّاح" من عملية جمع السكان في ساحة البلدية، خرج "السي بوكريشة" بزيه الرسمي الموسمي، حاملا في يده مكبرا للصوت، وراح يخطب في أهل الدشرة قائلا: * اهلا يا ولاد الدشرة، "بيدابور" نشكركم على الحضور ونشكر كل الجمهور، وأنا قدام "البارلور" حبيت نعلمكم بلي "توتالور" رحت ندور، ولقيت الدشرة نور على نور، الدعوة خضرة وكل شي "فور"، ولهذا حبيت نشكر العلماء نتاع "الڤريكيلتور" الي ختارعوا اشجار ونخيل ونوار ينبثوا بين ليلة ونهار، ونشكر كذلك الجماعة الي غرسوا "البوطاوات" نتاع "التريسينتي"، ونشكر كذلك "الماسو" الي فرّش "الطروطوار" وطلسو ونشكر الي خلصو، وكذلك نشكر "بيكاسو" الي خدّم راسو وصبغ الحيوط بهاذ "الفاسو"، ونشكر"ليموطار" الي غلقوا الطريق نتاع "السبيطار" و الخدامة الكل راحوا "روطار"، و نشكر كذلك "الشنابيط" الي كانو عاملين خيط وملصقين الناس فالحيط، و حاطين لبزاوز والتغريت نتاع لعجايز، "السي لقرع راهو جايز"... "بوكريشة" خرج يتمشى الدنيا كامل عاد مفرشة... * نشكركم كي فكرتوا فيا، ونشكركم على المبادرة هذيا، وكنت نشكركم كثر لوكان كملتوا لمزيا، ونقيتوا "الزوبية" والقمامة الي كانت مخبية مور "الباطيما"، و لوكان صبغتوا بقية الدشرة وسويتوا الطرق لمحفرة، وسقمتوها كامل على خطرة، لكن للأسف... عملتوا خدمة الهف، وخبيتوا الكشايف، وما خفتوش يوم الوقوف عند ربي الي راه يشوف، وأحنا على ابواب رمضان، وراني عارف بلي الخدمة هاذيا ، خدمة تقليدية عادية غير قيس ما يفوت رئيس البلدية، ومنين يفوت شهر، "الطريطوارات" تعاود تتكسر، وتذبال الشجر، ويطيح الحجر، و الطرق تتحفر والحيوط تتقشر، وكاين دراهم الشعب الي راه يموت بالشر. ولهذا قررت نستدعي الصيّع صحاب الصنايع، وكذلك اصحاب القرار الي صرفوا مليار "مارشي نوار" باه "يكاموفلوا" الدوار، ونعطيلهم في يدهم نهار، باه يردوا دراهم الشعب دينار بدينار، والا يفوّتوا شهر رمضان "فالبالوار"، ونزيد انحيلهم حتى "لاڤراس" نتاع العيد، يعيدوا "اريور" هاذ العام، خماج فا ، سراقين... وأنتوما ابقاو تصفقوا، الناس الكل فاقوا ونتم مازال تصفقوا، يا الله أتفرقوا... أتفلرقوا والا نقبض واحد نعلقو. * * يوميات "بوكريشة" * في هذا الركن نتعرف على "بوكريشة" في حياته الشخصية، وطريقة تعامله بعيدا عن السياسة والميكرفون والأضواء. * "مشكلة النفايات النفايات" * السي بوكريشة وبعد يوم شاق من العمل والزيارات التفقدية المرتقبة وغير المرتقبة التي قادته الى بعض الاحياء الشعبية، وبعد الخطاب الذي ألقاه على سكان الدشرة، ها هو في مكتبه رفقة المستشار المكلف بالنظافة في البلدية. * بوكريشة: واش آ المستشار نتاع "الزبل"، كيفاه هذا تنظف الدشرة قير وين نفوت أنا؟. * المستشار: ايه الله غالب. * بوكريشة: وليّه ربي هو الي قاللكم نظفوا قير وين يفوت "المير"؟ * المستشار: ماشي...ما كفاناش الوقت، أنت ما عطيتناش الوقت باه أنظفوا كيما لازم. * بوكريشة: ولآه تستناوني حتى نفوت أنا باه تنظفوا؟.. * المستشار: ايه "المير" الي كان قبلك كان يقوللنا نظفوا غير وين نفوت أنا باه الشعب يصفق عليا. * بوكريشة: الشعب يصفق عليه وين يفوت برك، ومور "الباطيمات" الناس تدعي بالشر ومدمرة وعايشة في وسط التلوث، حتى "الطومبات" و"القطوط" ولاو صحاب من كثرة الشبعة نتاع "البوبال". * المستشار: ايه الناس تانيت ماشي منضمين، أحنا نقولولهم "الكاميو" يفوت على التسعة، وهوما يخرجوا الشكاير مع الصبح. * بوكريشة: هاذ الناس الي راك تهدر عليهم هوما الي راهم يخلصوا فيك، بالدراهم نتاع الضريبة، ولهذا لازم تخبرهم بلي "الكاميو" راه يفوت على التسعة، وتحطلهم "بلاكا" مكتوب عليها "الرجاء رمي القمامة على التسعة نتاع الليل". * المستشار: كاين الي ما يعرفوش يقراو، وكاين الي ما يحبوش يقراو، وكاين الي يحبوا يشوفوا الدعوة امسخة، واش نديرولهم؟. * بوكريشة: الي ما يعرفش يقرى ديرلوا تصويرا، ارسملوا فيها شكارة نتاع الزبل مغلوقة، وقدامها ساعة "كترونيك" مكتوب فيها التسعة. * المستشار: درناها...اداو "لبلاكا" وداروها سقف للبراكة. * بوكريشة: يا سيدي ديرلهم مسابقة، وقوللهم الي نفوتوا "سوربريز" ونلقاوه خرّج الشكارة على التسعة نتاع الليل، نحطوا اسمو "فالطمبولا" وممكن يربح "طابونا" والا "كانكي" والا طاجين نتاع البغرير. * المستشار: يا السي بوكريشة، ياو الناس راها ترمي "كويزينيار" و"فريجيدار" واش يديرروا "بالكانكي" نتاعك؟ * بوكريشة: امالا ارسملهم واحد يرمي "فالزبل" وارسم الشمس ملفوق، وارسم "ليمينوط" في يدو. * المستشار: لوكان نفكروا هكذا، النص نتاع الدشرة الكل يروحوا للحبس، وأنا واحد منهم. * بوكريشة: يا سيدي قوللهم يربطوا الشكاير مليح ويجيبوهو لعندي للبلدية، والي يجيب شكارة نتاع "الزبل" نعطولوا عشر الاف فرنك. * المستشار: هكذا يعودوا الذر نتاع لمسيد يبطلوا "ليكول" ويلايموا الشكاير ويجيبوهم للبلدية باه يربحوا مصيرفة، كيما راهم يعملوا مع صحاب "لكماين" نتاع النحاس والحديد و"البلاستيك". * بوكريشة: ولآه راهم يبيعوا "فالبوبال"؟ * المستشار: أنعم سيدي. * بوكريشة: أمالا أنت والخدامين نتاوعك تعودوا تلايموا "الزبل"، باه نديرولو "الريسيكلاج" وأعملولهم "باسينات" نتاع لحديد وحدهم، ونتاع "السجاج" وحدهم.. "سيدي سويت". * المستشار: عملناها... سرقوا "الباسينات" باش يعمروا فيهم الما في ديارهم. * بوكريشة: امالا المشكل رايح يبقى قايم الى قيام الساعة، وراكم خرقتوا "الاوزون" وهلكتوا الصحة العمومية، وفي رمضان صوموا في وسط "الزوبية" وصلّوا التراويح والدعوة تريح، وكي يأذن الاذان أفطروا مع الذبان، ونهار العيد اتبادلوا الشكاير نتاع "البوبال" في عوض القاطو، أخرج عليا يا وجه الشر فا. * * بوكريشة "بوان كوم" * بوكريشة يفتح لكم هذا الفضاء من أجل الإدلاء بآرائكم وطرح أفكاركم وانشغالاتكم، واقتراح المواضيع والأركان، وكذا المشاركة في مشروع الإصلاح والإصلاحية ريثما يعطوه الصلاحية، ويضع تحت تصرفكم بريده الالكتروني الا وهو: مير بوكريشة عار وبز جمال بوان كوم. * "MIRBOUKRICHA@GMAIL.COM" * الرسايل والمسايل: * السلام عليكم، أشكرك جزيل الشكر السي بوكريشة على هذه الصفحة التي أصبحت مطالعتها شيئا ضروريا خلال يومي، وبينما أنا أطالع هذه الصفحة ليوم الجمعة الماضي شد انتباهي موضوع يوميات بطال، لذا أكتب هذا الكلام ردا على أخي عبد الرحمان من الجزائر، الذي قال بأنه بطال وكل يوم يستيقظ صباحا من أجل الخروج الى الشارع والبقاء في اللا شيء، وطبعا سيكون برفقة مجموعة من الشباب، فأنا أرى أن هناك إهمالا كبيرا في حياته، ووقتا من ذهب قام بتركه وراء ظهره، وهذا الكلام ليس له وحده بل لجميع شبابنا الجزائري البطال، لماذا لا يستغلون وقت الفراغ في التنظيف خاصة أن معظم شوارعنا أصبحت مغطاة بالأوساخ والأوبئة، ولم لا تساهم مجموعة من البطالين في الاستفادة من الوقت الضائع وتنظيف الاحياء ولو لمرتين في الأسبوع، وهذا الامر قد يساهم في عدة أشياء ومن بينها عمل الخير وكسب الثواب من الله، وكذا تقديم يد المساعدة لعمال النظافة والمساهمة في تحسين صورة الوطن، ولم لا يساهمون في عمليات التشجير فهي من أهم المجملات، وأرجو من حكومتنا أن تنظر إلينا نحن الشباب، وتوفر لنا مناصب شغل محترمة، تليق برجل مواطن حر في بلده، وأنا أرجو من شبابنا أن ينظر إلى وطنه ويساهم في تنميته وزيادة جماله، لتصبح كلمة -معاك يا الخضرا- بمعنى الجمال والنظافة والاخضرار، وأظن أن هذا هو الحل الوحيد لمشكلة البطالين المنتظرين لفرص العمل، فعلى الأقل ينالون الثواب ويتعودون على العمل، وبهذا الكلام أنا لا أحاول أن أجرح الشباب العاطل أو أنقص من شأنه، وإنما أحاول حل مشكلة عامة ومعالجتها ريثما يفرج الله علينا والسلام عليكم ورحمة الله وبركاته. * أختكم "هناء. ع"/ بريكة - ولاية باتنة. * وأتمنى أن تنشروا رسالتي هذه وكلي ثقة بكم. * حفظكم الله. * * الرد: * هذه هي اماطة الأذى عن الطريق، وهي أدنى شعب الإيمان من بضع وسبعين شعبة، وإذا ما حققناهاش مستحيل نحققوا الي بقاو، والنظافة من الإيمان، والوسخ من الشيطان، واذا الشيطان ادّى الكونجي نتاعو والدنيا مزالت امسخا، حب يققول انو الوسخ راه منا حنا. * * مسابقة ناس الدشرة * كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله. * نكت * المسمار * قالك واحد المسمار "بخيل" حصلّو مسمار فرجلو، راح لطبيب باش ينحيهولو، الطبيب كي شافو ڤالو : 2500 دينار، المريض قالو يرحم باباك عوجو و خليه. * يحيى بوحميل * * سر الحمار الوحشي * مزطول يقول لصاحبو: أنا شي واحد فالدنيا هاذي راه مجنني وما فهمتوش؟ قالو صاحبو واش هو؟ * قال المزطول : الحمار الوحشي بيض ومخطط بلكحل وإلا كحل ومخطط بلبيض؟ * يحيى بوحميل * * غش بغش * قال الفلاح لامرأته: إذا أنا مت.. فتزوجي جارنا. * فقالت له: لماذا؟ * فقال لها: لقد باعني بقرة وغشني فيها، وأنا أريد أن أغشه. * بوزيدي حفيظة/بوسعادة * * الطائرة * قائد الطائرة: الو، برج المراقبة، راك تسمع فيا؟ * برج المراقبة: نعم كابتن رنا نسمعو فيك بكل وضوح. * قائد الطائرة: كاين ثقب في خزان البنزين وراه فرغ ونحن على ارتفاع 10 آلاف قدم واش نديروا؟ * سكت اللاسلكي بضع لحظات... ثم: * برج المراقبة: راك تسمع فيا؟ * قائد الطائرة: بكل وضوح. * برج المراقبة: قول مورايا: (أشهد أن لا اله الا الله وأن محمدا رسول الله). * شيماء. ش/ ب. بوعريرج * * هات أو هاك * قالك جحا كان اللي يجي عندو يقولوا آجحا هات، جحا قال والله اللي يزيد يقولي هات مانخرجلوش، غدوى من ذاك جاه واحد جارو عيطلوا قالوا آجحا هاك، كي خرجلو جحا قالو هاك عمرلي هذا الشكارة بالقمح. * إبراهيم من بومرداس * * زلة شيطان * شيطان زلق في الحمام قال: أعوذ بالله من الشيطان الرجيم. * ياسين من العاصمة
