باسم الله بديت

- دزيت باب الرياض والنسرين ناداني والورد فتح لي الباب والزهر عانقني.. والياسمين ذاك الشباب هو اللي معذبني.
- ما نديها طويلة سلوم راشي ما نديها قصيرة فكرون ماشي نديها مربوعة قدّْ كي علم الباي ماشي.
- خرجت في الليل نطلب في الله صبت النجوم دايرين وقالولي صلي على رسول الله *ص* واللي تستناهم راهم راجعين.
- قالي طبيبي بلا ما يدري تداوى يا عليل ودائي ودوايا عند حبيب لمحبتو بخيل وقتاش يا عمري ترحمني وترحم دموعي اللي تسيل؟
- لسمر يا لسمر يا شباب الحومة واشبيك غضبان وزعلان علينا احنا ما نسوى بلا بيك لوجه ربي راضينا وراضى علينا.
- قريب الرفيقة يا قريب الرفيقة بيني وبينك طويقة.. يا مخلي في قلبي شقيقة.. تروح وين تروح بصح تعيا ترجع ليا ونرد لقلبك الحريقة.
- ما ناكلش من جنان الجنة لو يشهيني وما ناخذش الشيخ ولو يغنيني ناخذ الشباب ابيض ولا سمر المهم هولي يملالي عيني.
- دزيت باب الحبيب دفة على دفة فراشو من حرير نرقد وندفا بوقالو من ذهب نشرب لا نروى وكلامو من عسل غير نذوق نشفى.
- انت سبيبط وانا خويط فيك انت سنيسلة وانا خمسة تحميك انت خويتم وانا حجرة تبهيك وين تروح تلقاني وغير انا لي ندِّّيك.