08 باسم الله بديت

- حليت باب الجنان لقيت الملاح رقود تنهدت الدالية و تحرك العنقود قال القمر فالسماء نكشف على السحاب يذوب خلي الحبيب لحبيبو واللي في قلبو حاجة الله يبلغ المقصود.
- نزلت لقاع البحر خرجت لي جنية قالت لي وشبيك يا لالا مهمومة تكلمي افتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا.
-يا لي جاية من العين وبيدك مليتي السلة سبحان من أعطاك الزين وزاد في بهاك ذيك الحلة.
- النور يا النور والنور عينيا طبطبوا على الباب وجابو لي اللي عزيز عليا راني نتمنى من ربي يجي يطلب يدي من ماليا.
- الشمعة يا الشمعة يا الشمعة الضواية لو كان نعرف وشبيك نمسح هذيك الدمعة من خديك ونرد وجهك مرايا يا ربي يا معبود اقبل دعاية يرجع لي زهو الزمان ويعيا الحبيب قاعد معايا - علاش يا لالة التخمام رحمة الله واسعة وكبيرة لو كان جات بالكلام نتحدثو ونعطوك تدبيرات هما بصح كل شي بالمكتوب ويعيا والخير يبان وتزول عليك الهموم وتروح الحيرة - أعلميني يا لالة نهار تروحي لحمامك نرفدلك السلة ونمشي قدامك ندور على يمينك ونزيد على شمالك ونبقى لك خديم وطايع على طول زمانك.
- السفينة اللي جات باش نلاقيها باللوز والسكر نرش سواريها والورد والياسمين نهديه للركاب فيها وبالمسك والعنبر نعطر أمَّاليها.
- يا الشمس الضواية يا العالية في سماك لو كان صبتك مرايا نشوف وجهي بضواك يعود ربحي وغنايا ويقسم سعدي ذاك.