أحمد بن شريف ... قصيدة للشاعر خالدي أبو مروة

فيما يلي قصيدة للشاعر خالدي محمد أبو مروة، أُلقيت على الأثير بإذاعة الجزائر من الجلفة، يوم دفن العقيد أحمد بن الشريف




هاذ اليوم تقيب فيه المعريفه *** ويتنفضو فيه اليدين على لعقاب
يا معتاه نهار في هاذ الصيفه *** وتهول قلب الصحيح مع المصاب
طاح سمايا وضاقت برور الشوفه *** وتهمز ريح الشهيلي عَالقُواب
بين ايديا ثنثرو شڤفه شڤفه *** واش نجبر واش نلقى ليه حساب
اللي كان مْروڤ اسوار الجلفه *** تهد الساس وريَّب الحيط مع الباب
دار اجنابو للثرى بعد الوقفه *** وتكا علّ ليمنه وقْطَاه تراب
كان مروڤ جنحتو عنا تضفى *** والجلفاوي وقفتو ديما تتهاب
صد علينا بالحفى عاطي بقفا *** وعاف اللبسه والشباح مع لصحاب
البدر تمسّى والشمع لابد تطفى *** واش اذا ڤعَّدتهم بعد التذواب
يَهْريهم حُمّانهم ولاَّ نسفه *** ولاّ يرشى خيطهم ويعود اسباب
نڤلتني من محنتك هاذ الزّفّه *** وزدتو هوّضتو على قلبي لعطاب
فرسان الهده بأسمو تتلحفى *** والزندات يطيعهم ضرب النّشّاب
كان الراجل في جناحو يتكفى *** وبن شريف جميلهم كي مثل الاب
سبع البيّه عاهدو صادق ووفّى *** على الجزائر سبّل حياتو ما هاب
سيف شْنانا بعدكم ذركه يحفى *** وتتهان الرجله على نيف السياب
البرنوس اللي معزبر فالكفه *** بالذهبي مطروز يتلاهب تلهاب
بن شريف مساملو داير لفّه *** وأكتافو تضوا على البدر اذا قاب
سيدي نايل جدنا زين الخلفة *** وأحمد بن شريف من خيرت لنساب
ما يعقرش النايلي ما يتخفى *** وثرياتو قاطعه من طير عقاب
ولا ليث برور معڤود الدفه *** عالظالم زندات بالمخلب والناب
نعزي فيك النيف وحديث التحفة *** والتاريخ وما كتب صفحة وكتاب
نعزي كل اللي قرا عنّك وشفى *** ونعزي اللي رافڤك فالثوره شاب
نعزي الثوره في حماها والمنفى *** والقاده وجنودها شايب وشباب
نعزي الثاير عالوطن ضفّة ضفّة *** اللي بعدت نسبتو واللي يقراب
نعزي الجيش مع الدرك وكشافة *** والجمارك ساهره تحمي لجناب
والشرطه ورجال فيها متحُوفة *** وجامعات وما تقري في طلاب
والعامل واللي موكل في حرفه *** وسياسي واللي مجرد في لحزاب
أرحمو يا خالقي عند الوقفة *** بين ايديك تخف احروف الحساب
وحسناتو راشحه كيل الكفه *** في جنه نعيمها ضافي يطياب
صبر يا ربي عيالو يتعافى *** واعطيهم من رحمتك صبر وثواب
هذا هو خالدي قال وقفّى *** ونسج كلمه وافيه لهواكم جاب
والصلاة على حبيبي مصطفى *** قد القمح وما تفور بعدن طاب