باب المحبّة

خاشع بعوامي نذكر فالحب
طاح شعري وظهروا شيباتو
طفاو جمراتي ولا عود لهب
سبحت العمر وسوايع فاتو
مديت حياتي للوقت هرب
جرات سنين من عمري ماتو
قلت نواسي روحي ونزرب
نلحق ع النجمة القمر نساتو
قالت مانسيتك هلالي معذب
وظفار صباعك نفسي شهاتو
الليل يبكيني ودموع تصب
ونار المحبوب شعلت جمراتو
ما دريت الحرقة تنسي لعجب
وننسى لهوى لي الروح بغاتو
قلتلها جعد وجهي والتسرب
وعواج ظهري ذهبت صيفاتو
يا ناري عل لقمر ظنيت تغرب
وقفل باب المحبة وحيراتو
نادانى الكبر وللاقيها ونكتب
يخرج المدفون ليفقلبي رباتو
نار الغربة فج لبعادها تشيَّب
نار الفرقة نار بحطبها شعلاتو
ما دريتهاش طل وايامي تغلب
نذوق مرار الحب ونعقد صلاتو
قالت ملح الدمع عالفم معتب
المنحر مسقي بالموت وصلاتو
نعدد ف الليلات وحوالي تتعب
لاحقني وسواس مكثر دمعاتو
نتمنى نلقاك فراش الموت قرب
من حبك ندرق وتنسيك طياتو
قلتلها ما ننساك روحك ما تصعب
الموت لي يديك ذايق طعماتو
قبري على قبرك مترابك نشرب
وشهودي تشهد فاض ما خباتو
قالت رشات لعظام انايا نحسب
نحصي في ليام وترجع جراتو
في صغري وكبري ما كنت مكتب
اليوم جرى لعمر الهلكة حتماتو
صدري متقطع وقلبي متعصب
تخطفت المحبة والنفس هواتو
من نهار فرقتنا وقليبي يتسبب
نشوفو بحارتنا ونتنفس ريحاتو
قلتلها عديت نغاول ونغصب
على حوشك نمشي نذكر ماراتو
ما دريتها الدنيا تنسانا وتغضب
حبنا من القهرة والروح تمناتو
شيبني لعمر صبرت وما نعتب
عليك الحزن يطول تبقى كياتو
كي تلحق موتي والروح تتسرب
الشهادة على فمي خيالك شافاتو
قالت موتك موتني قاتلني عجب
مانحيا وهواك حلاوتك قبراتو
كلش فيا تهد وتصدد والتخرب
كل حيط بنيتوا طاحت حجراتو
ما لقيت وين نقد نبني والرييب
لي نويتو فالدنيا الدَّفنت حياتو
ندعي مولايا وعلى راسي نعصب
نصلي ونصوم والدعوة لجناتو