شعر شعبي

ورقة المتين مزينها ورقة ومانعطيها غير للي تستاهل
كاسبها من الحلال ماهيشي سرقة ولي هي صاعبة بها تسهل
ورقة المتين عجبتني زرقة تشبه عين حبيبتي زرقة تقتل
يامرسولي رواح طفي ذالحرقة وحش الزينة راه في جوفي شاعل
منها راني مريض ماعندي طاقة طال عليا غيابها ماهو ساهل
نبكي طول الليل بكي بلا شفقة لما يبان الحال بحري يتهول
ننظر في لبنات في وسط الزنقة يهيج عليا الوحش نبقى نتخيل
حي السبع نحوسو زنقة زنقة ونتبع جميع من تلبس لكحل
هذو عشر ايام من بعد اللقا ونا في العذاب لوني متبدل
ذا النوارة جات عندي تستسقا رشتني بعطور عندي ماتتمل
كانت وسط جنان وردة معشوقة ولي شم عطورها راح امهول
من ذالشجرة اليوم طاحتلي ورقة خايف منذالغصن في يدي يذبل
من غيرها موحال ماعندي ثقة ومن غيرها موحال في الحب انبدل
ماذا تبعوها الناس العشاقة ذاك الغصن بعيد لامن ليه وصل
داخل جوفي كي الغابة المحروقة واش يطفي نارها فيا تشعل
انا قدامها وهي مشتاقة تهدر بالمحمول وتزيد تراسل
كنا زوج حباب حبر مع ورقة لا حاسد لا رقيب فينا يدخل
سلكني يا شيخ راني في غرقة في ذا البحر اليوم راني نساول
الشاعر حجو عبد القادر المدعو باشا