غباء خاص

¯ في قلبها.
جاوُبتْ الجدارمي كِسوّلني: وين تسكن؟
مَدْ يَدّو لسلاحو "كانْ بيصطولي بالطبيعة''
قلب الثورة؟
مدّيتْ يَدّي لسلاحي " كان ستيلّو بالطبيعة''
قلب الكلمة.
أ
ر
ت
ا
حْ
كيفاش فاتو باللي الثورة كلمة؟
ريشة خاصة
حطّت لحمامة فوق الجامع، ربي: سلام، دْخَلْ أبو سلام للجامع، طارت لحمامة، وحطّت في المقبرة، سَوَّلتْ عليه، لقِيتْ باللي كان يذبح لحمام، ويشويه في راس الجبلْ.
الحمامة.. ما تصالحش ذبّاحها.
تحالف خاص
فْتَحْتْ عينيّ في نص اللّيل، لقيت الثلج يصب من خلف التاقة، شكون يلوّن خوه: الثلج ولَّ الليل؟ شفتهم يتعاركو، لبيض '' قلبي'' مع لكحل
" حظّي "، فتحت التاقة وزقّيتْ: ما تقدرلكم غير الشمس.. وحّدهم الخوف.. تعانقو.. طلعلي لون يشبه فحمة مكفنة.
نصيحة خاصة
شحال من مرّة لازم نفهّم التاقة: ماشي شرط تدخلي عليّ الشمس؟
شحال من مرّة لازم نفهّم الورقة: ماشي شرط تعكسي واش نكتب؟
نصحتني الشمس: عمرك لا تربح العيب للتاقة والورقة.
تبادل خاص
يا روحي يرحم جنحيك، ما تطيريش بالزّاف، أهبطي شوية على التراب باش نكتب لحمي بلاك يطير.
أسير خاص
نحب السبولة قبل ما تنبت، وبعد ما تنبت، قبل ما تذبال، وبعد ما تذبال، ونكرهها وهي في فمّي، لخاطر نتفكّر باللي بلا بيها ياكُلْني التراب.
صداقة خاصّة
عمرو ما آذاني الغراب، عمري ما قلتلو صباح الخير يا الزين.
إرث خاص
حطّيت عمامة جدّي في يدّي وبكيت، ضَحْكَتْ: منين ورثت الدمعة يا بوجمعة؟ جدّك عمرو ما بكى، تفكّرت جدّي يضحك.. بكاتْ.
سر خاص
طْلَعتْ لراس الشجرة، وحْكِيتْ مْعَ عْروقها، واش جْنِيتْ؟ عْرَفت سرّ التفاحة.
ظل خاص
علاش
كل ما نشوف شجرة نولّي ظلها
وتتكسّل تحتي حروفي؟
نحو خاص
تنفحلي نلم البحر، ونصُبّو في كلمة، نعجن الشمس، ونطيّبها في وسط رمادي، شكون ذاق كسرة الشمس، وزاد جاع؟ شكون يعرب كلمة سْكن فيها البحر؟
حزن خاص
حزني أرنب أبيض، ينط في غابة فَرحتي، ويَاكُلْ من عشب الرّوح.
نص خاص
شي حروف ما يتكتبوش في لوحة المفاتيح، وآنا حزين، وحاب نكتب شي نص أسود، تجنّبت الكلمات اللي فيها ذيك لحروف، لقيت روحي.. كاتب نص منقّط بْلَبَيَضْ.
شوق خاص
أ
توحّشْتَك يا آلجي، توحّشت صمتك في نهار الضجة، وضجتك في صمت الليّل.. وين البسمة بلون الزعاف، والزعاف بلون سطري.
ب
توحشتك يا سطري.
ج
توحشتك يا صخرة الشط/ صدري
د
يا سرّي
تلوّن بلون البحر، واشْرُبْ حكمة التيه.
حيرة خاصّة
أ
علاش كل ما نسافر نكتب؟ علاش كل ما نكتب، نرجع لعتبة بيتي، ونحلم نسافر؟
ب
علاش الرصاصة ما ترجعش، كِتعرف باللي غلطت في طريقها؟
ج
كيفاش تحقد لغزالة على الصيّاد؟
د
ويني؟
اجتهاد خاص
للأنثى مِثلُ حظِّ الذكرينِ
كِنزل آدم كان وحدو، وكانو زوج بنات: حوّا والأرض.
حقد خاص
يدّي تورطت في الكلمة، وحشمت ترجع، غاضها الحال، فشّتْ غيضها في فّاد القاموس.
مدرسة خاصّة
الكلب: ذيلي ماشي أعوج في راسي.
اجتماع خاص
اجتامعت مع روحي.. أدّاها النعاس، فزّيت خرّجتها من القاعة.
إعجاب خاص
تعجبني العشبة، لاصقة في التراب، وما تشوف غير مع السما.
عجز خاص
كيفاش نكتب حضور الوردة
وغياب الصّديقة؟
رماد خاص
رمادي ماشي رمادي، رمادي رماد الشمس كِحْرَقتْها.
معراج خاص
شفت روحي تتسلّق في روحها، كالدّودة في منقار: تطلع.. حتى وهي مكتفة.
اكتشاف خاص
أ
الموت يخاف اللي ما يخافوهش، يحسّو بيه قبل ما يجي، ويكتبولو وصية: ما تورثناش.
ب
لون الموت لون الخوف.
عقاب خاص
جالست الربيع، وهو يائس، ورداتو ذبلانين، وصوتو أخضر مصفار: واش بيني وبين الشتا؟ واش لازمو باش ما نولّيش صيف؟، والشتا متخبّي وْرا سحابة تشبه كذبة بيضا، ويلوّن وجه الربيع بْلَصْفَر.
حق خاص
من حق البر علي: نسمعو، من حقي على البحر: يسمعني، من حق البحر على نصّي: يشبهلو.
مقاومة خاصة
نقاوم الظلمة بكلمات بيضا، نكتبها في عز الليل، يسلّم المشعال للشمس.
مسافة خاصّة
الخطوة بيني وبين روحي: تعيّي المجرّات.
الخطوة بين المجرّات: سبقتني ليها النملة.
المهرجان الوطني للمسرح المحترف: 23 ماي 2013