السبع راه مخبي...

مائة أرنب يريدون أكل حشيش الانتخابات والسبع مخبي.... وين راك يا سبعنا؟ وين راك يا اللي رايح تاكلنا؟ وين راك ياللي رايح تحكم الغابة؟
يا السبع نقولك الصح الصح أريدك أن تظهر وتبان وعليك الأمان على الأقل بعد ظهورك يختفي سعيداني الطبال وغول العيان وحتى بن فليس التعبان.
يالسبع واش راك تستنى...كبرت ماتقدرش تتحرك بالصح حتموعليك تريح سبع وتحكم بحكامك في هذه الغابة.. ما يهمهومش الى أنت كبرت ولالالا.... يهمهم برك أنك تريح تزهر وتزأر باش يخوفو بيك الناس؟
يالسبع المربع في كرسي المرادية ماعليش تسمع واش راه يقول الشعب إلى راك حاب تسمع على كل حال ماشي بالسيف... الشعب راه يقولك أنو السبع الحقيقي لازم يكون قوي في عيون الناس ولازم هو يمشي في الغابة برجليه ماشي برجلين سعيداني ولا غول ولا عمارة بن يونس أخاطرش رجليك ورجليهم ماشي كيف كيف.
يالسبع زيد نقولك الغابة فيها غاشي كبير كبير وهاذ الغاشي لازملهم واحد يتفقدهم ماشي يبعث برك الفاكتور تاعو اللي واسمو سلال باش يهدر معاهم.
الأرانب كثرت وهذا الشي والله غير رجع الحالة مميعة وزيد خليت الجيران يهدرو علينا ويقولو سبعهم ماشي قادر على روحو راح جاب عكاكيز وعواجيز و ما فراتش؟
الغابة راهي ولات فوضى كبيرة بزاف وزيد بن فليس راه يحلف فيك ويقولهم أنما هو السبع الجاي والعسكر راهم معايا قالولي أنت أرنب سمين بزاف لازم العسكر يوقفو معاك.
السؤال هنا يا سبعنا العسكر راهم معاك انت ثاني ولالا؟ هيا قولنا برك على بالنا دخلو بيناتكم المرة اللي فاتت بالصح ماشي حل هذا تاع بن فليس يوقفو معاه العسكر وانت لالا؟ يالسبع وريلنا وجهك برك وقول راك حاب عهدة رابعة ولالا؟