أويحيى لي فالقلب فالقلب.. !

زعف زبانية الرابعة على كثرتهم من تعيين أحمد أويحيى للحديث باسم سيدهم عزيزو في التلفزيون الرسمي الذي يقدم المرشحين وبرامجهم وكان اكثرهم غضبا هو سلال الذي تعرض للتحراش من غول وبن يونس وحتى من شلبية محجوبي.
قال له الغول ..أواه يا سي سلال واقيلا يلعبولك اللعبة ؟
وقال بن يونس .. واقيلا صح أويحيى هو نائب الرئيس بعد التعديل الدستوري الجاي واحنا يمسحونا كامل
صرخ سلال ...خلونا من الهدرة الزايدة هذه
ردّ بن صالح ..ماهيش زايدة يا بن عمي واقيلا الأمور بعد الانتخابات تتبدل واحد فينا ما يلقا بلاصتو ثم كيفاش خرجوه أويحيى هذا من الدار؟ حاب نفهم أنا ؟
جاوبه سلال ...أنا نولي لبلاصتي وربي كبير، ثم أويحي لي راك تحكي عليه عمرو مراح للدار، راكم غالطين فيه هذاك الذيب، ثم كي نولي للوزارة الأولى تشوفو واش ندير فيه
قهقه غول عاليا وقال ..أنا عمبالي راك طامع في شيء أكثر من هذا ؟
قال سلال ..واشنو يا واحد الطماع عمبالك كامل الناس طماعين كما أنت وزير أول تكفيني ؟
قال بن يونس ...قالوا أنت تولي رئيس بعد عمر طويل لسيدي عزيزو
قفز سلال من مكانه وقال ...اششششت يسمعك يقول صح
قهقهه سعداني الطبال وقال ..والله لوكان تصرا نديرلك زردة ما صراتش يا mauvais joueur.
حك سلال رأسه وقال له ..عمبالك نسيتهالك هذه الجملة والله تخلصها على الرغم من انها ماشي تاعك ولكن والله نويلك بعد الانتخابات
قال سعداني ..الى كاين نائب رئيس أنا هو ما كان حتى واحد فيكم ياخي شفتو لوعارة تاعي أنا التوفيق ما طلقتوش.
وفجأة ظهر أويحيى بينهم فسكتوا جميعا وقال لهم .واش كاين يا خاوتي؟ كاش مشكل؟
رد الجميع بابتسامة عريضة جدا ...كنت هايل فالتلفزيون اشحال تعرف تهدر، لكن هل فعلا أنت مقتنع بما تقول أم أن اللي في القلب فالقلب.