يبدو أن المير بوكريشة يمثل فأل خير على المواطنين، حيث صادف قدومه على رأس البلدية حلول شهر رمضان المبارك، والمعروف أن رمضان يأتي بخيره معه، وها هو اليوم يستقبل قفة رمضان لمساعدة الفقراء والمساكين في الدشرة، فأرسل البراح ليزف هذا الخبر السعيد للفقراء والمحتاجين . * " البرّاح " يا ديوان الصالحين يا ديوان الصالحين يا ديوان الصالحين الفقراء والمحتاجين يا أهل الدشرة صبح الخير نوضوا بركاكم مالشخير رمضان راهو جاب الخير اسمعوا يا سامعين راها لحقتكم القفة وبوكريشة راه حالف حلفة غير الليستا اكل تتصفى من هاذوك الطماعين ماكان تشيبا لا معريفة ماكان منصب ولا صفة حتى القفة راها خفيفة نشا الله اتكمل يومين فيها كيلو نتاع لفريك للشربة واللحم عليك ويلا ما كش بين ايديك حتى الجومبو راه بنين خمس رواتل تاع الزيت مادام الصيف بروفيت اقلي وأقلب دير فريت بزوج بيضات مقليين فيها كيلو طاماطيش وخوذ رايي ما تراطيش يا وخيي أقفز تعيش الخاوة راهم زادمين فيها كيلو قهوة البودرة وباكي حليب نتاع القبرة وزوج كيلو سكر الحجرة وحتى السميد خمسة وعشرين والبونيس كيلو حميصة ورام يقولوا باطة هريسة خلاصت عليك الموفيسا أتمتع يا مسكين يا ديوان الصالحين يا ديوان الصالحين ياديوان الصالحين افطنوا يا مواطنين . * الديسكور : السلام عليكم يا سكان الدشرة، يا شعبنا المجيد، نتمنا لكم رمضانا سعيدا، و راني عارف بلي عدد الفقراء راه غير يزيد، وعدد الأغنياء الحمد الله ما راهش يزيد، باقين هوما هوما ومالهم الي راه يزيد، امالا نغتنم هاذ الموعد باه نقول للفقراء أصبروا للوعيد وكي ليوم يفوت رمضان وآخرتها عيد، ويا سعدو الي صام صيام مفيد يلقاه عند الله في يوم الوعد والوعيد، أو يا وعدو الي طاح عليها غير لحم وقديد . وزيد... اخواني الفقراء، راني عارف بلي في كروشكم عندكم (الفيد)، ولهذا جمعتكم باه نبشركم بخبر سعيد... ياو راها لحقت القفة نتاع رمضان.. وراني عارف بلي نص الدشرة راه جيعان، ولحق الأوان باه تشوفوا "الرافيطايما" من كل لوان، والسلعة هاذ العام راها منوعة ومبزعة ومبلعة فالشاشيات نتاع لبسلاستيك، فيها كيلو نتاع لفريك، وفيها خمسة وعشرين كيلو نتاع السميد، وكيلو نتاع القهوة نتاع "البودرة"، وفيها كذلك زوج كيلو نتاع السكر "كريسطاليزي"، زوج قواطا نتاع لحليب القبرة، وخمس ليطرات نتاع الزيت صانقو، وكيلو نتاع الحمص، ومفاجآت أخرى تكتشفوها كي تفتحوا "الطريزور" نتاع علي بابا نتاع "الرافيطايما"، لكن المشكلة أنا حبينا نقوموا بالإحصائيات نتاع عدد الفقراء وللأسف ما لحقناش، من كثرتهم (الله يكون فالعون)، ولهذا قررنا نديروا "راكورسي" باش الحساب يجينا ساهل، نحسبوا عدد الأغنياء ونقصّوهم من العدد الإجمالي نتاع سكان البلدية، وبالتالي نلقاو عدد الفقراء (تيستويت)، لكن الوخدة لكبيرة أننا لقينا قير ستة أغنياء فالدشرة، والباقي الكل معوزين ومحتاجين، ولهذا باش ما نخسروش الكواعيط نتاع بطاقات المحتاجين، نظرا لكثرتهم (الله يبارك)، رانا قررنا نعتمدوا بطاقة الهوية نتاع البلدية باش نحددوا الناس الزوالية، لكن لازم تعرفوا أنهم الفقراء درجات، ولهذا قررنا نبداو ملتحت ونجوا طالعين، ومادام كل ناس الدشرة راهم حاضرين في هاذ الاجتماع، ولو أني ما ستدعيتكمش، وقلت لأول مرة الي حب يجي مرحبا، والي ما بغاش ماعليش، لكن راني نشوف أنو الأمر مهم للغاية، ولهذا الدشرة الكل راها هنايا، هذا شي يفرّح، ولهذا نصّرح ونقوللكم يزّينا مالفضايح، كل واحد يروّح يقبض دارو ويريح، ورايح نلحقلو الأمانة حتى لتما، في سرية تامة، من أجل العزة والكرامة نتاع الفقراء والمحتاجين واليتاما، باش نفرّجوا عليهم الغمة ونوصلولهم الرافيطايما، ورح ندير قانون في رمضان هذا، باش في عوض ما نجيبلكم المساعدة بالمادة، ها نعود نبعثهاكم (ماندا)، توصلكم في أقرب مدة، ونتوما تختاروا بكل ارادة واش تحطوا فوق المايدة. وديروا في بالكم بلي هذا غير ديباناج، بريكولاج، مابيد نقضي على الشوماج ونوفّر الخدمة لناس الفيلاج، ونقضي على الفاقابونداج، ونقضي كذلك على لبروفيطاج نتاع الناس الي عندهم فيلا زوج ايطاج، وطامعين في حق الفقير والمحتاج، هاذ المشتاقين الي ما يآمنوا بالدين ما يحضوا على طعام المسكين . وفالأخير بوكريشة المير يقول لكل فقيرة وفقير، رمضان راه يجيب الخير، وراكم تاكلوا خبز الشعير، والحمد لله صحاح على بعض الناس عندهم لملايير، ونهار كامل عند الفيتيرينير، هايا تبقاو على خير . فيصل كرشوش * بوكريشة " بوان كوم " بوكريشة يفتح لكم هذا الفضاء من أجل الإدلاء بآرائكم وطرح أفكاركم وانشغالاتكم، واقتراح المواضيع والأركان، وكذا المشاركة في مشروع الإصلاح والإصلاحية ريثما يعطوه الصلاحية، ويضع تحت تصرفكم بريده الالكتروني ألا وهو: مير بوكريشة عار وبز جمال بوان كوم. " MIRBOUKRICHA@GMAIL . COM " الرسايل والمسايل : يا السي بوكريشة هاذي إحدى نكت بلدية عين معبد الجلفة، منذ عدة سنوات توزع قفة رمضان مرة واحدة في آخر الشهر الكريم، أرجو يا السي بوكريشة بعث جندي من الشروق للتحقيق . الرد: علابالك بلي أنا رئيس بلدية، نحكم في كلشي إلا الصحافة راها خارجة عليّا الطريق، وخاصة هاذوك نتاع الشروق، ياو أنا وما طلقونيش، ولهذا راني نحاول نبعثلهم طلب باه يبعثوا واحد من الجنود نتاعهم، وممكن حتى نتصل بالسي رئيس البلدية نتاعكم، ونقولوا راها عندكم السخانة، ورانا فزمان الصيف، ولهذا يزرب يوزع القفة قبل ما تتبيريما . نشكرك على اهتمامك بينا يا السي بوكريشة وعندي اقتراح واش رايك لو كان تديرني الحارسة الشخصية على خاطر راني نحوّس على خدمة وكل مسابقات التوظيف فيها شبهات مينة من البليدة . الرد : ما كفاتش الحارسة الشخصية الي راها فالدار، نهار كامل تعس فيا تزيديلي نتي، روحي عسي المرميطا لا تنحرق وتقعدوا بلا فطور . يا السي بوكريشة، وعلاه درتولنا رمضان بلاربعاء وما درتوهش بلخميس؟ أيوب من الجزائر . الرد :باش تصوموا 29 يوما والعيد يطيح بالجمعة والسبت .. يا بوكريشة حبيت نسقسيك، وصارحني يرحم والديك أنت باين ناس ملاح وما تكذبش على المواطنين، اللحم تاع الهند زعما مليح؟ الرد: لالا هو مليح، برك عندو أعراض جانبية، ممكن تعودوا تنقزوا وتداربوا الكاراطي كيما لهنودا وتغنوا وتشطحوا كيما هوما، والا تنوضلكم خانة في جبينكم، وفي أغلب الحالات تتبحروا كي يبدى الفيلم ومن بعد فاللخر يصيبوكم نشالله. السلام عليكم، يا أخي بوكريشة أنا شاب لدي 21 سنة متحصل على ليسانس في الهندسة المدنية، أردت الانخراط في صفوف الدرك الوطني الذي، حسب الدليل، يتطلب شهادة ليسانس في أي اختصاص وعندما تقدمت للمجموعة الولائية ببسكرة، إذ بالهندسة المدنية غير مقبولة ويريدون الحقوق و لم النفس والترجمة وعلم الاجتماع وأنا طوال حياتي أردت أن أدرس المواد العلمية والمفضلة وفي نهاية المطاف دراستي كلها غير مقبولة وتبددت الأحلام، فأين المفر؟؟؟ ... شكرا على هذا الفضاء الجميل الرد :ممكن كي شافوك درست هندسة معمارية ماقبلوش يوظفوك، خافوا إذا الجدارمية كي يشوفوك تاع هندسة معمارية يطمعوا ويقولوا هذا جا يبنيلنا السكنة وتتسبب في مشاكل داخل "لابريقاد"، ماتقطعش لياس وحاول مرة أخرى وإلا شوف من جهة أخرى لعل ربي حبلك الخير. مسابقة ناس الدشرة كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله. مستشفى المجانين مجنون بمصلحة المجانين هو وصديقه نزلا إلى البحر للسباحة فغرق الصديق ثم أسرع المجنون إليه وأنقذه من الغرق، وعندها قال طبيب المصلحة للمجنون: عملك البطولي يحتم علينا أن نخرجك من المستشفى لأنك شفيت تماما، ولكن للأسف صديقك الذي أنقذته قد شنق نفسه بعد ذلك، فقال المجنون : لا لم يشنق نفسه بل أنا من علقه لتجف ثيابه . ع . الرحمان نوري لمسامر اتفقوا زوج مسامر ( بخلاء ) باش يغطسوا فالبحر والي يطلع الأول يخلّص فطور لصاحبو، للدرك مازال ما خرجوش . ع . الرحمان نوري طونوبيل مسوريا قالك واحد حابس، زاد حبسو بوليس، قالو واش هاذ الطونوبيل مسوريا، قالو لا من لالمان . أخوكم من الجزائر . شهر العسل قالك واحد تزوج، باش يروح شهر العسل ما كفاوهش الدراهم راح وحدو . الحلاق واحد حابس حل ( كوافور ) حفاف، سماه حلاق لذيذ . فؤاد شينوي ب . خادم ادفع واحد مشحاح راح للبلدية وكي لحق ما دخلش وعاود رجع علاش؟ كان مكتوب فالباب ( ادفع ) . نسرين من العاصمة الضوضاء قال القاضي : من يقوم بأية ضوضاء في قاعة المحكمة سأخرجه في الحال، فرد المتهم بأعلى صوتة : أنا أنا . نسرين من العاصمة القصير قالك مرة واحد قصير عطس خبط راسو فالارض . منير من الجزائر الصيدلية واحد حابس قال للصيدلي أعطيني حليب أطفال، قالو الصيدلي واش اسمو، قالو : عمار . القرد المدلل واحد حابس كان يمشي لقى قرد تايه، أداه وراح عند الشرطي قالو لقيت هاذ القرد تايه واش نعملو؟ قالو الشرطي خوذو لجنينة الحيوانات، راح الحابس، وغدوة منداك شافو الشرطي مزال رافد القرد،، قالو ماشي قلتلك اديه لجنينة الحيوانات؟، قالو البارح اديتو لتما وليوم واقيلا نديه للسينما ولا للسطاد . عبير وهران .
